ណាត់សង្សារវ័យក្មេងដើរលេង ហើយរៀបគម្រោងសម្លាប់ប្លន់យកម៉ូតូ រត់មិនរួចពីខ្នោះ
ខេត្ដកំពង់ស្ពឺ ៖ បុរសម្នាក់ដែលបានដាច់ចិត្ត សម្លាប់សង្សារជាទីស្រឡាញ់ ប្លន់យកម៉ូតូត្រូវបាន នគរបាលស្រុកគងពិសី ស្វែងរកចាប់ខ្លួនបានហើយ កាលពីល្ងាចថ្ងៃទី២៥ ខែតុលា ឆ្នាំ២០១៣ នៅចំណុចភូមិទួលកាតុក ឃុំសែដី ស្រុកសំរោងទង ខេត្ដកំពង់ស្ពឺ ដើម្បីកសាងសំណុំរឿង បញ្ជូនទៅកាន់តុលាការ ចាត់ការតាមនីតិវិធី។
ជនសង្ស័យមានឈ្មោះ ស៊ឹម ចាន់ដារ៉ា អាយុ ២១ឆ្នាំ ចំណែកនារីរងគ្រោះមានឈ្មោះ យ៉ុម យូ អាយុ ២២ឆ្នាំ មានទីលំនៅក្នុងភូមិចាស់ ឃុំពេជ្រមុនី ស្រុកគងពិសី ខេត្ដកំពង់ស្ពឺ ។ ឈ្មោះ ស៊ឹម ចាន់ដារ៉ា បានសារភាពថា គាត់និងនារីរងគ្រោះ បានស្គាល់គ្នាជាសង្សារ តែនាងជាមនុស្ស ដែលមានទំនាក់ទំនងច្រើន ធ្វើឱ្យគាត់មានកំហឹង រហូតមកដល់ ថ្ងៃទី២៣ ខែតុលា ឆ្នាំ២០១៣ គាត់ក៏បានណាត់នាងមកជួបគ្នា ហើយដឹកតាមម៉ូតូ ទៅកាន់ទំនប់ទឹកអូរស្វាយ ស្ថិតនៅឃុំ ស្រង់ ស្រុកគងពិសី រួចក៏ធ្វើសកម្មភាព សម្លាប់នាងចោលនៅទីនោះ។
ឈ្មោះ ស៊ឹម ចាន់ដារ៉ា បានបន្ដថា ក្រោយធ្វើសកម្មភាពរួចហើយ គេក៏យកម៉ូតូរបស់នារីរងគ្រោះ ជិះគេចខ្លួនរហូតដល់ល្ងាចថ្ងៃទី២៥ ខែតុលា ឆ្នាំ២០១៣ ក៏ត្រូវសមត្ថកិច្ចចាប់ឃាត់ខ្លួនតែម្តង។ រឿងហេតុដែលនាំឱ្យមានការស្អប់នាង ដោយសារតែគាត់បានចំណាយប្រាក់ អស់យ៉ាងច្រើនក្នុងការដើលេង ស៊ីចាយជាមួយគ្នារហូត ដល់ពេលថ្មីៗនេះស៊ើបដឹងថា នាងមានទំនាក់ទំនងជាមួយអ្នកផ្សេង ក៏រៀបចំផែនការ សម្លាប់នាងចោលតែម្ដងទៅ ។ យ៉ាងណាក៏ដោយគេយល់ថា វាគ្រាន់តែជាពាក្យដោះសា របស់ជនសង្ស័យប៉ុណ្ណោះ៕
_________________________
ប្រភពព័ត៌មានពី៖ វត្តភ្នំ
ប្រភពព័ត៌មានពី៖ វត្តភ្នំ
