ជម្រះក្តីបរទេស ស្បែកខ្មៅពីរនាក់ ប្រើ ATM ក្លែងក្លាយលួចដកប្រាក់
ភ្នំពេញៈ បុរសបរទេសស្បែកខ្មៅ ២ នាក់ក្នុងនោះ រួមមាន ជនជាតិស្រីលង្កាម្នាក់ និង ម៉ាឡេស៊ីម្នាក់ ត្រូវបានតុលាការរាជធានីភ្នំពេញ បើកសវនាការជំនុំជម្រះ និង កាត់សេចក្តី កាលពីម្សិលមិញ ជាប់ពាក់ពន្ធនឹងការលួចដកប្រាក់ពីម៉ាស៊ីនដកប្រាក់ស្វ័យប្រវត្តិ (ATM)របស់ធនាគារ សិង្ហបូរីចំ កាត់ ជាង ១៣ម៉ឺនដុល្លារនៅក្នុងរាជធានីភ្នំពេញ ប្រព្រឹត្តកាលពីអំឡុង ខែមេសា ឆ្នាំ២០១៣។
លោក តែ សំអាង ចៅក្រមនៃសាលាដំបូងរាជធានីភ្នំពេញ បានមានប្រសាសន៍ថា៖ ជនជាប់ចោទ ឈ្មោះ Aruna Salam ភេទប្រុស អាយុ ៣៤ ឆ្នាំ ជនជាតិស្រីលង្កា ជាទេសចរ និង ឈ្មោះ Delvin Joseph ភេទប្រុស អាយុ ៣១ ឆ្នាំ ជនជាតិម៉ាឡេស៊ី ជាទេសចរ ត្រូវបានតុលាការជំនុំជម្រះ ពីបទ«លួច»។ ជនជាប់ចោទទាំង២ ត្រូវបានតុលាការចោទប្រកាន់ពីបទ៖« លួច» តាមមាត្រា ទី ៣៥៦ នៃ ក្រមព្រហ្មទណ្ឌ នៃ ព្រះរាជាណាចក្រកម្ពុជា និង ត្រូវចាប់ខ្លួនដោយកងរាជអាវុធហត្ថលើផ្ទៃប្រទេស កាលពីថ្ងៃទី ១២ ខែ មេសា ឆ្នាំ ២០១៣។
លោកចៅក្រមបានមានប្រសាសន៍ថាៈ«ពួកគេបានប្រើប្រាស់ កាត ATM ក្លែងក្លាយ លួចដកប្រាក់ ពីម៉ាស៊ីន ATM របស់ធនាគារសិង្ហបូរី SBC អស់ជាង ១៣ ម៉ឺនដុល្លារអាមេរិកនៅក្នុងរាជធានីភ្នំពេញ។ ពួកគេ ត្រូវបានឃាត់ខ្លួន ដោយសមត្ថកិច្ចអាវុធហត្ថ ខណៈដែលកំពុងតែលួចដកប្រាក់ពី ម៉ាស៊ីន ATM ធនាគារសិង្ហបូរី SBC នៅក្នុងទីតាំង ២ កន្លែងផ្សេងគ្នា នៅក្នុងសង្កាត់ជ័យជំនះ ខណ្ឌដូនពេញ និង នៅសង្កាត់ទន្លេបាសាក់ នៅក្នុងខណ្ឌចំការមន រាជធានីភ្នំពេញ កាលពីថ្ងៃទី ១២ ខែមេសា ឆ្នាំ ២០១៣»។
លោកចៅក្រមបានបន្ថែមថា បន្ទាប់ពីការឃាត់ខ្លួន សមត្ថកិច្ចអាវុធហត្ថលើផ្ទៃប្រទេស បានដកហូត ប្រាក់មួយចំនួន និង កាត ATM ក្លែងក្លាយជាច្រើនពីពួកគេ។ ពួកគេត្រូវបានឃុំខ្លួន នៅមន្ទីរពន្ធនាគារ កែប្រែ ព្រៃស កាលពីថ្ងៃ ១៤ ខែ មេសា ឆ្នាំ ២០១៣ ។
យោងតាមរបាយការណ៍ របស់កងរាជអាវុធហត្ថលើផ្ទៃប្រទេស បានឲ្យដឹងថាៈ ជនសង្ស័យទាំង ២ ខាងលើនេះ ត្រូវបានចាប់ឃាត់ខ្លួន កាលពីថ្ងៃទី ១២ ខែ មេសា ឆ្នាំ ២០១៣ ដោយសមត្ថកិច្ចនៅទី តាំង២កន្លែងផ្សេងគ្នា ក្នុងនោះ ឈ្មោះ Delvin Joseph ត្រូវបានឃាត់ខ្លួន នៅចំណុច ម៉ាស៊ីន ATM ស្ថិតនៅសង្កាត់ទន្លេបាសាក់ នៅក្នុងខណ្ឌចំការមន ហើយសមត្ថកិច្ចបានដកហូតបានប្រាក់ចំនួន ៥០០០ ដុល្លារពីគាត់ ព្រមទាំងកាតATM ក្លែងចំនួន ៣៤កាត់ពីគាត់។ ចំណែកឯឈ្មោះ Aruna Salam ត្រូវបានឃាត់ខ្លួន នៅចំណុចម៉ាស៊ីន ATM ក្នុងសង្កាត់ជ័យជំនះ ខណ្ឌដូនពេញ។
ក្រោយឃាត់ខ្លួន សមត្ថកិច្ចបានដកហូតបានប្រាក់ប្រមាណ ៨០០០ ដុល្លារអាមេរិកពីរូបគាត់ ព្រមទាំងកាត ATM ក្លែងក្លាយជាច្រីនទៀតពីគាត់។ សរុបកាត ATM ក្លែង ដែលសមត្ថកិច្ច បានដកហូតពី ជនសង្ស័យទាំង២ ខាងលើនេះ មានចំនួនប្រមាណ ៨០ កាត ATM ក្លែងក្លាយ។
នាពេលសវនាការកាលពីម្សិលមិញ ជនជាប់ចោទទាំង ២ ខាងលើ បានទទួលសារភាពអំពីកំហុស របស់ពួកគេ និង សំណូមពរឲ្យតុលាការមេត្តាជួយបន្ធូរបន្ថយទោស ពួកគេឲ្យបានទាបបំផុត ដើម្បី ពួកគេ អាចឆាប់រួចផុតទោស និង ឆាប់បានវិលត្រឡប់ទៅកាន់ប្រទេសរបស់ពួកគេវិញ។ ចំណែកឯ ឈ្មោះ តឹក សុផល តំណាងធនាគារសិង្ហបូរី SBC ដែលជាភាគីដើមបណ្តឹង នៅក្នុងសំណុំរឿងនេះ បានទាមទារឲ្យ ជនជាប់ចោទទាំង២ សងប្រាក់សរុប ចំនួន សរុប ១៣៣.១៩៨ ដុល្លារសហរដ្ឋអាមេរិក ទៅធនាគារវិញ។
តុលាការនឹងប្រកាសសាលក្រម នៃ សំណុំរឿងនេះ នៅថ្ងៃទី ១១ ខែ តុលា ២០១៣ ខាងមុខនេះ៕
_________________________
ប្រភពព័ត៌មានពី៖ ខ្មែរប៉ុស្តិ៍
ប្រភពព័ត៌មានពី៖ ខ្មែរប៉ុស្តិ៍
