បក្សសង្គ្រោះជាតិ ថ្វាយលិខិតព្រះមហាក្សត្រ ថាមិនចូលរួមប្រជុំសភា
បេក្ខជនតំណាងរាស្ត្រជាប់ឆ្នោតរបស់គណបក្សសង្គ្រោះជាតិទាំងអស់ បានដាក់លិខិតថ្វាយព្រះករុណាសម្ដេចព្រះ នរោត្តម សីហមុនី នៅព្រឹកថ្ងៃទី១៩ កញ្ញា ដោយបញ្ជាក់ថា បេក្ខជនជាប់ឆ្នោតទាំងអស់របស់គណបក្សសង្គ្រោះជាតិ នឹងមិនទៅចូលរួមប្រជុំទៅតាមការកោះអញ្ជើញរបស់ព្រះមហាក្សត្រទេ ។
មន្ត្រីនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ថា មូលហេតុចម្បងដែលគណបក្សសង្គ្រោះជាតិ មិនទៅចូលរួមប្រជុំសភានោះ ដោយសារថា បេក្ខជនជាប់ឆ្នោតរបស់គណបក្សសង្គ្រោះជាតិគោរពតាមឆន្ទៈរបស់ប្រជាពលរដ្ឋដែលទាមទារឲ្យរដ្ឋាភិបាលបង្កើតគណៈកម្មការស៊ើបអង្កេតលទ្ធផលបោះឆ្នោតជាមុនសិន។
ទន្ទឹមនឹងនេះ ក្រុមមន្ត្រីអង្គការសង្គមស៊ីវិលគ្រោងនឹងដាក់ញត្តិរួមគ្នាថ្វាយព្រះមហាក្សត្រដើម្បីពន្យារពេលប្រជុំសភាលើកដំបូងនៅថ្ងៃទី២៣ កញ្ញា នេះសិន រហូតដល់មានការឯកភាពគ្នារវាងគណបក្សជាប់ឆ្នោតទាំងពីរ។
ប្រធានគណៈកម្មាធិការអព្យាក្រឹត និងយុត្តិធម៌ដើម្បីការបោះឆ្នោតដោយសេរីនិងត្រឹមត្រូវនៅកម្ពុជា ហៅថា និកហ្វិច លោកបណ្ឌិត ហង្ស ពុទ្ធា បានឲ្យដឹងនៅថ្ងៃទី១៩ កញ្ញា ថា បន្ទប់ឃ្លាំមើលស្ថានការណ៍បោះឆ្នោត ដែលមានអង្គការជិត ២០រួមគ្នា នឹងដាក់ញត្តិថ្វាយព្រះមហាក្សត្រព្រះបរមនាថ នរោត្តម សីហមុនី ឲ្យពន្យារពេលការប្រជុំសភា ដើម្បីទុកឱកាសឲ្យគណបក្សជាប់ឆ្នោតទាំងពីរឯកភាពគ្នាសិន។
លោក ហង្ស ពុទ្ធា បានលើកឡើងថា នៅក្នុងបរិបទនយោបាយបច្ចុប្បន្ន ការពន្យារពេលបើកកិច្ចប្រជុំសភាលើកដំបូងនេះ ជាមធ្យោបាយល្អបំផុតសម្រាប់ទុកឱកាសឲ្យគណបក្សទាំងពីរមានការឯកភាពគ្នាជាមុនសិន។
មន្ត្រីនាំពាក្យគណបក្សសង្គ្រោះជាតិ លោក យឹម សុវណ្ណ អះអាងថា ប្រជាពលរដ្ឋនៅទូទាំងប្រទេសដែលគាំទ្រគណបក្សសង្គ្រោះជាតិនោះ នឹងយកស្នាមមេដៃធ្វើជាញត្តិថ្វាយព្រះករុណា ព្រះបាទសម្ដេចព្រះ នរោត្តម សីហមុនី នៅថ្ងៃទី២០ កញ្ញា តាមរយៈគណបក្សសង្គ្រោះជាតិ។ ខ្លឹមសារក្នុងញត្តិនោះ សុំឲ្យបេក្ខជនតំណាងរាស្ត្រជាប់ឆ្នោតនៃគណបក្សសង្គ្រោះជាតិ កុំចូលចូលប្រជុំសភា និងសុំឲ្យព្រះមហាក្សត្រពន្យារពេលការបើកសម័យប្រជុំលើកដំបូងនៅថ្ងៃទី២៣ កញ្ញា ខាងមុខ ដើម្បីឲ្យគណបក្សទាំងពីរមានការឯកភាពជាតិជាមុនសិន។ ប៉ុន្តែចំនួនប្រជាពលរដ្ឋប៉ុន្មានសែននាក់ពិតប្រាកដនោះ លោក យឹម សុវណ្ណ មិនអាចបញ្ជាក់បានទេ អាស្រ័យលើចំនួនជាក់ស្ដែងដែលប្រមូលបានរហូតដល់ថ្ងៃទី២០ កញ្ញា ដែលជាថ្ងៃចុងក្រោយ។
វិទ្យុអាស៊ីសេរីមិនអាចទាក់ទងមន្ត្រីជាន់ខ្ពស់គណបក្សប្រជាជនកម្ពុជា បានទេ នៅថ្ងៃទី១៩ កញ្ញា ដើម្បីសួរអំពីការកោះប្រជុំសភាលើកដំបូងដែលគ្មានវត្តមានតំណាងរាស្ត្រជាប់ឆ្នោតនៃគណបក្សសង្គ្រោះជាតិនេះ។ ប៉ុន្តែនៅថ្ងៃទី១៩ កញ្ញា គណបក្សប្រជាជនកម្ពុជា បានចេញសេចក្ដីថ្លែងការណ៍បញ្ជាក់ថា បេក្ខជនជាប់ឆ្នោតទាំងអស់នៃគណបក្សប្រជាជនកម្ពុជា នឹងទៅចូលរួមប្រជុំទៅតាមការកោះអញ្ជើញរបស់ព្រះមហាក្សត្រ ដែលទ្រង់ជានិមិត្តរូបនៃឯកភាពជាតិ និងនិរន្តរភាពជាតិ។
មន្ត្រីជាន់ខ្ពស់គណបក្សសង្គ្រោះជាតិ និងមន្ត្រីជាន់ខ្ពស់គណបក្សប្រជាជនកម្ពុជា បានជួបចរចាគ្នាដើម្បីដំណោះស្រាយនយោបាយចំនួនពីរលើកមកហើយនៅមន្ទីររដ្ឋសភា កាលពីថ្ងៃទី១៦ និងថ្ងៃទី១៧ កញ្ញា ខណៈដែលគណបក្សសង្គ្រោះជាតិ ដឹកនាំប្រជាពលរដ្ឋរាប់ម៉ឺននាក់ធ្វើបាតុកម្មអហិង្សារយៈពេលបីថ្ងៃ ប៉ុន្តែលទ្ធផលចរចាគ្នានេះមិនទាន់ឯកភាពគ្នានោះឡើយ ពិសេសគឺការបង្កើតគណៈកម្មការស៊ើបអង្កេតលទ្ធផលបោះឆ្នោត៕
ប្រភពពី វិទ្យុអាស៊ីសេរី
