លបចូលផ្ទះគេត្រូវម្ចាស់ ដឹងទាន់ប្តឹងប៉ូលិសឱ្យចាប់ ខ្លួនសារភាពថាប៉ងលួចអង្ករ
ខេត្តកំពង់ឆ្នាំង ៖ នគរបាលព្រហ្មទណ្ឌក្រុងកំពង់ឆ្នាំង បានចាប់ឃាត់ខ្លួនជនសង្ស័យម្នាក់ កាលពីវេលាម៉ោង៩និង៣០នាទីព្រឹក ថ្ងៃទី២៩ កញ្ញា តាមបណ្តឹងរបស់ម្ចាស់ផ្ទះថាបានលបចូលក្នុងផ្ទះបំណងលួចទ្រព្យសម្បត្តិកាលពីវេលាម៉ោង១១និង៣០នាទីយប់ ថ្ងៃទី២៨ កញ្ញា នៅភូមិត្រពាំងចិក្សា សង្កាត់កំពង់ឆ្នាំង ។
លោក ហ៊ុល វាសនា អធិការរងនគរបាលក្រុងកំពង់ឆ្នាំង បានឱ្យដឹងថា ជនសង្ស័យរូបនេះឈ្មោះ ផាន់ ខេមរា ហៅឆ្លូញ អាយុ២០ឆ្នាំ មានស្រុកកំណើតនៅខេត្តបាត់ដំបង តែបានមកស្នាក់នៅក្នុងភូមិខាងលើ ។ នៅយប់ថ្ងៃកើតហេតុ ជននេះបានលួចឆ្កឹះគន្លឹះទ្វារផ្ទះរបស់ឈ្មោះ ស៊ិន សំបាន ភេទស្រី អាយុ៤៩ឆ្នាំ នៅក្នុងភូមិត្រពាំងចិក្សា ហើយចូលទៅក្នុងផ្ទះបំណងលួចយកទ្រព្យសម្បត្តិ តែពេលនោះម្ចាស់ផ្ទះដឹងទាន់បើកភ្លើងមើល ឃើញឈ្មោះនេះរត់ចេញទៅវិញ ក៏ស្រែកឆោឡោឡើងផ្អើលដល់អ្នកជិតខាង ។ លុះព្រឹកឡើងម្ចាស់ផ្ទះក៏បានមកប្តឹងនគរបាល ទើបមានការចាប់ឃាត់ខ្លួនជនសង្ស័យឈ្មោះ ផាន់ ខេមរា ហៅឆ្លូញ នេះតែម្តង។
នៅចំពោះមុខសមត្ថកិច្ចនគរបាល ជនសង្ស័យសារភាពថា ខ្លួនពិតជាបានលបចូលផ្ទះគេមែន ប៉ុន្តែបំណងគ្រាន់តែចង់លួចអង្ករប៉ុណ្ណោះ ។ ទោះជាយ៉ាងណា នគរបាលក្រុងកំពង់ឆ្នាំងបានកសាងសំណុំរឿងបញ្ជូនជនសង្ស័យខាងលើទៅសាលាដំបូងតាមនីតិ វិធីច្បាប់ ៕
