ខ្មែរក្រោមទាមទារឲ្យ វៀតណាមកាត់សេចក្តី ព្រះសង្ឃនិងយុវជន ដោយតម្លាភាព
សហព័ន្ធខ្មែរកម្ពុជាក្រោម ទាមទារឲ្យរដ្ឋាភិបាលវៀតណាម កាត់សេចក្តីព្រះសង្ឃពីរអង្គ និងយុវជនខ្មែរកម្ពុជាក្រោម ពីរនាក់ផ្សេងទៀតដោយតម្លាភាព ហើយប្រសិនបើរកឃើញថា ពួកគេគ្មានទោសដូចការចោទប្រកាន់នោះទេ ត្រូវតែដោះលែងជាបន្ទាន់។
អាជ្ញាធរវៀតណាម បានចាប់ខ្លួនព្រះសង្ឃ និងយុវជនខ្មែរកម្ពុជាក្រោម ដោយចោទពីបទបង្កអសន្តិសុខសង្គម។ ការចោទប្រកាន់នេះ ត្រូវបានសហព័ន្ធខ្មែរកម្ពុជាក្រោមបដិសេធថាមិនមែនជាការពិត ប៉ុន្តែជាល្បិចរបស់អាជ្ញាធរវៀតណាម ដើម្បីគាបសង្កត់ខ្មែរកម្ពុជាក្រោមរស់នៅលើទឹកដីកម្ពុជា។
តុលាការខេត្តសុកត្រាង ប្រទេសវៀតណាម នឹងបើកសវនាការកាត់សេចក្តីព្រះសង្ឃ និងយុវជនខ្មែរកម្ពុជាក្រោម នៅថ្ងៃទី២៧ ខែកញ្ញា ក្រោយពេលចាប់ខ្លួនតាំងពីខែឧសភា ឆ្នាំ២០១៣។
សេចក្តីថ្លែងការណ៍សហព័ន្ធខ្មែរកម្ពុជាក្រោម សរសេរថា ដីកាតុលាការវៀតណាម ចោទព្រះសង្ឃខ្មែរកម្ពុជាថា មានគម្រោងចាកចេញទៅបរទេស ដើម្បីប្រឆាំងតវ៉ានឹងរដ្ឋាភិបាលវៀតណាម និងរៀបចំឲ្យពលរដ្ឋផ្សេងទៀតចាកចេញពីប្រទេសវៀតណាម។
លោក ថាច់ ង៉ុកថាច់ ប្រធានសហព័ន្ធខ្មែរកម្ពុជាក្រោម មានប្រសាសន៍ពីប្រទេសកាណាដា ថា លោកព្រួយបារម្ភថា ព្រះសង្ឃ និងយុវជនខ្មែរកម្ពុជាក្រោម មិនបានទទួលការជំនុំជម្រះដោយយុត្តិធម៌ ហើយត្រូវបានបង្ខំអោយទទួលទោសដែលពួកគេមិនបានប្រព្រឹត្ត។
លោកបន្តថា អាជ្ញាធរវៀតណាម ទើបជូនដំណឹងឲ្យក្រុមគ្រួសារព្រះសង្ឃ និងយុវជនខ្មែរកម្ពុជាក្រោម កាលពីសប្ដាហ៍មុន មុនពេលកំណត់នៃសវនាការនៅថ្ងៃទី២៧ ខែកញ្ញា។ លោកថា ការជូនដំណឹងនេះ មិនបានផ្តល់បានឱកាសគ្រប់គ្រាន់សម្រាប់ក្រុមគ្រួសារស្វែងរកមេធាវីការពារជនជាប់ចោទ ក្នុងដំណើរការជំនុំជម្រះក្តី។
លោក ថាច់ ង៉ុកថាច់ អះអាងថា ការចាប់ខ្លួនព្រះសង្ឃខ្មែរកម្ពុជាក្រោម ធ្វើឡើងក្រោយពេលព្រះសង្ឃមិនព្រមចូលធ្វើជាសមាជិកសមាគមព្រះសង្ឃស្នេហាជាតិវៀតណាម និងក្រោយពេលព្រះសង្ឃបានផ្សព្វផ្សាយឯកសារវីដេអូ សុំឲ្យពិភពលោកជួយខ្មែរកម្ពុជាក្រោម រស់នៅប្រទេសវៀតណាម៕
ប្រភពពី វិទ្យុអាស៊ីសេរី
