រដ្ឋាភិបាលថ្មីបញ្ឈប់ ការផ្តល់ដីសម្បទាន សេដ្ឋកិច្ចឲ្យក្រុមហ៊ុន
ភ្នំពេញៈ រាជរដ្ឋាភិបាលកម្ពុជាអាណត្តិ ទី៥ បានប្រកាសថា ខ្លួនលែងផ្តល់ដីសម្បទានសេដ្ឋកិច្ច ទៅឲ្យក្រុមហ៊ុនឯកជនទៀតហើយ ប៉ុន្តែនឹងបង្កើនល្បឿនក្នុងការផ្តល់ដីសម្បទានសង្គមកិច្ចទៅដល់ ប្រជាពលរដ្ឋដែលគ្មានដីពិតប្រាកដជំនួសវិញ។
មជ្ឈដ្ឋានជាតិ និងអន្តរជាតិជាច្រើន បានធ្វើការរិះគន់យ៉ាងខ្លាំងក្លា ជាច្រើនឆ្នាំមកហើយ ចំពោះគោលនយោបាយផ្តល់ដីសម្បទានសេដ្ឋកិច្ចរបស់រដ្ឋាភិបាល ដែលបើតាមអង្គការ អាដហុក នៅក្នុងឆ្នាំ ២០១២ រដ្ឋាភិបាល បានផ្តល់ដីសម្បទានសេដ្ឋកិច្ច ទៅឲ្យក្រុមហ៊ុនឯកជនមានចំនួនរហូតដល់ជិត ៣ លានហិកតានោះ បានធ្វើឲ្យមានផលប៉ះពាល់យ៉ាងខ្លាំង ទាំងខាងសង្គម និងធនធានធម្មជាតិ ដោយពួកគេបានលើកឡើងថា ការផ្តល់ដីសម្បទានសេដ្ឋកិច្ច ជាប្រភព ដែលធ្វើឲ្យកើតមានជម្លោះដីធ្លីដ៏រីករាលដាល និងការបំផ្លិចបំផ្លាញធនធានធម្មជាតិដ៏មហន្តរាយ ជាពិសេសការកាប់បំផ្លាញព្រៃឈើក៏ដោយសារតែដីសម្បទាន.សេដ្ឋកិច្ចខ្លះត្រូវបានផ្តល់នៅក្នុង តំបន់ព្រៃស្តុក ឬតំបន់ព្រៃអភិរក្ស។
យោងតាមកម្មវិធីនយោបាយ របស់រាជរដ្ឋាភិបាលនីតិកាល ទី ៥ ដែលបានចេញផ្សាយកាលពីថ្ងៃពុធ បានឲ្យដឹងថា រដ្ឋាភិបាលបញ្ឈប់ការផ្តល់ដីសម្បទានសេដ្ឋកិច្ចទៅឲ្យក្រុមហ៊ុន ឯកជន។
ការគ្រប់គ្រងសម្បទាននឹងត្រូវពង្រឹងឲ្យបានត្រឹមត្រូវ តាមច្បាប់លិខិតបទដ្ឋាន និងកិច្ចសន្យាជាពិសេសតាមរយៈការបង្កើនយន្តការចុះពិនិត្យផ្ទៀងផ្ទាត់ជាប្រចាំនូវសកម្មភាពវិនិយោគរបស់ក្រុមហ៊ុនទទួលដីសម្បទាននានាដែលបាន ចុះកិច្ចសន្យាជាមួយរាជរដ្ឋាភិបាលដើម្បីធានាដល់កិច្ចដំណើរការ នៃសកម្មភាពវិនិយោគផង និងការទប់ស្កាត់នូវភាពអសកម្មផ្សេងៗដែលអាចកើតមានទាក់ទងនឹងដីសម្បទាន។
កម្មវិធីនយោបាយបានលើកឡើងទៀតថា៖ «បន្តខិតខំ កាត់បន្ថយ និងឈានទៅលុបបំបាត់ឲ្យបានភាពអនាធិបតេយ្យរំលោភកាន់កាប់ដីគ្រប់ប្រភេទដោយខុសច្បាប់ ទប់ស្កាត់ការប្រមូលដីទុកមិនប្រើប្រាស់ មិនធ្វើអាជីវកម្មដោះស្រាយទំនាស់ដីធ្លីប្រកបដោយតម្លាភាព និងយុត្តិធម៌»។ ជាងនេះទៅទៀត ត្រូវបន្តបែងចែកនិងប្រើប្រាស់ដីរដ្ឋសម្រាប់គោលបំណងឯកជន និងសាធារណៈ ប្រកបដោយតម្លាភាពនិងសមធម៌ ឆ្លើយតបទៅនឹងតម្រូវការដីរបស់ប្រជាជនទូទៅជាពិសេសប្រជាជន ក្រីក្រ យុទ្ធជនពិការ គ្រួសារយុទ្ធជនពលី អតីតកងកម្លាំងប្រដាប់អាវុធ និងគ្រួសារដែលគ្មានដី ខ្វះដី ហើយត្រូវការដីពិតប្រាកដ តាមរយៈកម្មវិធីសម្បទានដីសង្គមកិច្ច និងធ្វើប្រទានកម្មដោយធានាឲ្យបាននូវសមធម៌ ស្ថិរភាពសង្គម សន្តិសុខស្បៀង និងការសម្រួលដល់វិនិយោគ។
កម្មវិធី នយោបាយនេះបានឲ្យដឹងទៀតថា៖ «បង្កើនល្បឿនផ្តល់ដីសម្បទានសង្គមកិច្ច នៅលើមូលដ្ឋាននៃសន្និធិរដ្ឋក្នុងការអនុវត្ត នយោបាយចាស់ សកម្មភាពថ្មីលើវិស័យដីធ្លី»។ រាជរដ្ឋាភិបាលនឹងរក្សាផ្ទៃដីដែលគ្របដណ្តប់ដោយព្រៃឈើ ដោយត្រូវបង្កើនការការពារធនធានព្រៃឈើ ពិសេស ការពង្រឹងការអនុវត្តច្បាប់ ស្តីពីព្រៃឈើ ការទប់ស្កាត់ បង្ក្រាបបទល្មើសព្រៃឈើ ជំរុញការដាំដើមឈើឡើងវិញ និងបង្កើនសមត្ថភាព សហគមន៍ព្រៃឈើនៅលើមូលដ្ឋានធានាចីរភាព និងប្រសិទ្ធភាពគ្រប់គ្រង។
រាជរដ្ឋាភិបាល នៅតែបន្តការចុះបញ្ជី និងផ្តល់កម្មសិទ្ធិដី ទាំងដីរដ្ឋ និងដីឯកជន និងដីសហគមន៍ដើម្បីធានាសុវត្ថិភាពនៃការកាន់កាប់ដីធ្លីដោយជំរុញល្បឿននៃការចុះបញ្ជីដី សំដៅឈានទៅសម្រេចឲ្យបាន ១០០ ភាគរយនូវការចុះបញ្ជីតាមផែនការនៃបទបញ្ជាលេខ ០១ របស់រាជរដ្ឋាភិបាល ជិត ២ លានហិកតា នៅរវាងដើមឆ្នាំ ២០១៤ ក្នុងក្របខ័ណ្ឌនៃការអនុវត្តនយោបាយចាស់ សកម្មភាពថ្មី លើវិស័យដីធ្លី។
កាលពីខែ ឧសភា ឆ្នាំ ២០១២ លោកនាយករដ្ឋមន្ត្រី ហ៊ុន សែន បានចេញបទបញ្ជាលេខ ០១ ស្តីពី វិធានការពង្រឹង និងបង្កើនប្រសិទ្ធភាពនៃការគ្រប់គ្រងសម្បទានដីសេដ្ឋកិច្ច ដោយផ្អាកផ្តល់ដីសម្បទានសេដ្ឋកិច្ច ទៅឲ្យក្រុមហ៊ុនឯកជនក្នុងគោលបំណងកាត់បន្ថយវិវាទដីធ្លី។ នៅថ្ងៃ ទី១៤ មិថុនា លោក ហ៊ុន សែន ក៏បានថ្លែងជាសាធារណៈបញ្ជាឲ្យអាជ្ញាធរទូទាំងប្រទេសធ្វើការវាស់វែងបែងចែកដីធ្លី ឲ្យប្រជាពលរដ្ឋ ដែលមានទំនាស់ដីធ្លីជាមួយក្រុមហ៊ុនដីព្រៃសម្បទាននិងដីសម្បទានសេដ្ឋកិច្ច។
បើ តាមរបាយការណ៍របស់សមាគមការពារសិទ្ធិមនុស្ស អាដហុក ដែលបានចេញផ្សាយកាលពីខែ កុម្ភៈ បានឲ្យដឹងថា ក្នុងឆ្នាំ ២០១២ រដ្ឋាភិបាល បានផ្តល់ដីសម្បទានសេដ្ឋកិច្ច ចំនួន ២ ៦៥៧ ៤៧០ ហិកតា ឲ្យទៅក្រុមហ៊ុនឯកជន ដែលក្នុងនោះផ្ទៃដីចំនួន ២/៣ បានកាត់ចេញពីដីការពារដោយព្រះរាជក្រឹត្យ។ នៅក្នុងឆ្នាំដដែលនោះសមាគម អាដហុក បានទទួលបណ្តឹងវិវាទដីធ្លីចំនួន ៧០ ករណីដែលប៉ះពាល់លើផ្ទៃដី ១០១ ៤០៨ ហិកតា និងប្រជាពលរដ្ឋ ១០ ៦៨៩ គ្រួសារ។
លោក អ៊ឹម ឈុនលឹម រដ្ឋមន្ត្រីក្រសួង ដែនដីនគរូបនីយកម្ម និងសំណង់ ពុំអាចទាក់ទងដើម្បីធ្វើការអត្ថាធិប្បាយបានទេកាលពីថ្ងៃម្សិលមិញ។
បុរសម្នាក់នេះពិការជើងដោយសារការពារដីពីការរំលោភរបស់ក្រុមហ៊ុនដីសម្បទាន។ រូបថត ជីវ័ន
ដោយសារតែកន្លងមក ការដាក់ចេញនូវវិធានការផ្សេងៗ របស់រដ្ឋាភិបាល មិនត្រូវបានយកទៅអនុវត្តឲ្យមានប្រសិទ្ធភាព ដូចជាការលុបបំបាត់កុងត្រូលជជុះ ការទប់ស្កាត់ការកាប់បំផ្លាញព្រៃឈើជាដើម។ល។ មនុស្សជាច្រើនគិតថា កម្មវិធីនយោបាយថ្មីនេះក៏នឹងមិនត្រូវបានរដ្ឋាភិបាលយកទៅអនុវត្តឲ្យមានប្រសិទ្ធភាពផងដែរ។
លោក គុជ វ៉េង តំណាងប្រជាពលរដ្ឋ ដែលមានទំនាស់ដីធ្លីជាមួយក្រុមហ៊ុន ភាពីម៉ិច គ្រុប ក្នុងស្រុក ក្រគរ ខេត្ត ពោធិ៍សាត់ ហើយ ដែលបានជាប់ពន្ធនាគារអស់រយៈពេល ៣ ខែ ១៥ថ្ងៃ បានថ្លែងថា លោកពុំមានជំនឿលើកម្មវិធីនយោបាយរបស់រដ្ឋាភិបាលនេះទេ ពីព្រោះកាលពីពេលកន្លងមក ការសន្យានានាទាក់ទងនឹងបញ្ហាដីធ្លី មិនត្រូវបានធ្វើឲ្យមានប្រសិទ្ធភាពឡើយ។
លោកបានថ្លែងថា៖ «ខ្ញុំមិនជឿដាច់ខាត ពីព្រោះលើកមុន រឿងព្រៃឈើ គាត់ហ៊ានសន្យាថា នឹងកាត់កចោល ប្រសិនបើគាត់ទប់ស្កាត់បទល្មើសព្រៃឈើមិនបានតែគាត់មិនបានកាត់កឯណា នៅពេលបទល្មើសព្រៃឈើនៅតែមាន។ គាត់បានបង្កើតការផ្តល់ដីសម្បទានសេដ្ឋកិច្ចធ្វើឲ្យប៉ះពាល់ដល់ព្រៃឈើនិងការរស់នៅរបស់ប្រជាពលរដ្ឋទូទាំងប្រទេស»។
លោក សុន ឆ័យ តំណាងរាស្ត្របក្សសង្គ្រោះជាតិ ដែលធ្វើពហិការមិនចូលរួមប្រជុំរដ្ឋសភាលើកដំបូងបានថ្លែងថា លោកស្វាគមន៍ចំពោះគោលនយោបាយថ្មីនោះ ប៉ុន្តែរដ្ឋាភិបាលថ្មីដែលមានមនុស្សដដែលនោះ នឹងមិនអាចធ្វើបានដូចការប្រកាសរបស់ខ្លួននោះទេ ដូចជា កាលពីពេលកន្លងមកក៏មានការប្រកាសផ្អាកផ្តល់ដីសម្បទានសេដ្ឋកិច្ចដែរ តែនៅតែមានចេញអាជ្ញាប័ណ្ណឲ្យក្រុមហ៊ុនជាបន្តបន្ទាប់។
លោកបានថ្លែងថា៖ «បើចង់ទប់ស្កាត់ឲ្យបាន លុះត្រាតែមានយន្តការចាប់មន្ត្រីដែលខិលខូចយកមកផ្តន្ទាទោស។ ការដែលផ្តល់ដីសម្បទានសេដ្ឋកិច្ច ៩៩ ឆ្នាំទៅឲ្យក្រុមហ៊ុននោះ គឺពុំដែលផ្តល់ផលប្រយោជន៍ដល់ជាតិទេ គឺមានតែការបំផ្លាញជាតិ និងធ្វើឲ្យប៉ះពាល់ដល់ប្រជាពលរដ្ឋតែប៉ុណ្ណោះ»។
លោក ចាន់ សុវេត មន្ត្រីស៊ើបអង្កេតជាន់ខ្ពស់សមាគមការពារសិទ្ធិមនុស្ស អាដហុក បានថ្លែងថា លោកមានការភ្ញាក់ផ្អើល នៅពេលដែលបានស្តាប់ឮ អំពីការសន្យារបស់រដ្ឋាភិបាលថ្មី ថាមិនមានការផ្តល់ដីសម្បទានសេដ្ឋកិច្ចនៅក្នុងអាណត្តិនេះទៀត ពីព្រោះសង្គមស៊ីវិល និងប្រជាពលរដ្ឋបានធ្វើការទាមទារឲ្យផ្អាកនោះជាយូរមកហើយ។
លោកបានថ្លែងថា៖ «កម្ពុជាបានផ្តល់ដីសម្បទានសេដ្ឋកិច្ចនោះគឺច្រើនជ្រុលហើយ បើនៅតែផ្តល់ទៀតនោះ តើមានដីឬអត់? ដូច្នេះរដ្ឋាភិបាលត្រូវតែពិនិត្យឡើងវិញចំពោះក្រុមហ៊ុនមួយចំនួន ដែលបានទទួលដីសម្បទានថា តើរដ្ឋាភិបាលនឹងចាត់វិធានការយ៉ាងណានៅពេលដែលក្រុមហ៊ុននោះធ្វើខុសកិច្ចសន្យានោះ?»៕
ប្រភពពី ភ្នំពេញប៉ុស្តិ៍
