លោក សុរិយា ស៊ូប៊ែឌី ទាមទារឲ្យសភាកម្ពុជា មានបក្សធំទាំងពីរចូលរួម
អ្នករាយការណ៍ពិសេសនៃអង្គការសហប្រជាជាតិ ដែលបានធ្វើការឃ្លាំមើលអំពីសិទ្ធិមនុស្ស និងស្ថានការណ៍នយោបាយរបស់កម្ពុជា ច្រើនឆ្នាំមកហើយនោះ បានធ្វើសេចក្ដីរាយការណ៍នៅចំពោះមុខក្រុមប្រឹក្សាសិទ្ធិមនុស្សអង្គការសហប្រជាជាតិ នៅទីក្រុងហ្សឺណែវ អំពីស្ថានការណ៍នានារបស់កម្ពុជា ក្រោយពេលបោះឆ្នោត ពិសេសទៅទៀតនោះ ថា កម្ពុជា កំពុងឆ្លងកាត់របបប្រជាធិបតេយ្យអន្តរកាល។
អ្នករាយការណ៍ពិសេសនៃអង្គការសហប្រជាជាតិ បានប្រកាសនៅចំពោះមុខក្រុមប្រឹក្សាសិទ្ធិមនុស្ស អង្គការសហប្រជាជាតិ នៅទីក្រុងហ្សឺណែវ ថា ប្រទេសកម្ពុជា ត្រូវធានាឲ្យសភាមានបក្សជាប់ឆ្នោតទាំងអស់ចូលរួម។
លោក សុរិយា ស៊ូប៊ែឌី (Surya Subedi) ជាអ្នករាយការណ៍ពិសេសអង្គការសហប្រជាជាតិ។ លោកមានប្រសាសន៍នៅខណៈលោកបានដាក់របាយការណ៍ទី៥ របស់លោកទៅកាន់ក្រុមប្រឹក្សាសិទ្ធិមនុស្សអង្គការសហប្រជាជាតិ កាលពីថ្ងៃទី២៥ កញ្ញា ថា សភាកម្ពុជា ត្រូវតែមានបក្សជាប់ឆ្នោតទាំងពីរចូលរួម ពីព្រោះថា គណបក្សទាំងពីរនេះ ប្រជាពលរដ្ឋបានបោះឆ្នោតជូនមានសំឡេងប្រហាក់ប្រហែលគ្នា។
លោក ស៊ូប៊ែឌី បានរិះគន់ទៅលើការស៊ើបអង្កេតភាពមិនប្រក្រតី ដែលរដ្ឋាភិបាលមិនព្រមបើកឲ្យទូលំទូលាយក្នុងការស៊ើបអង្កេត ដោយផ្អែកលើការដោះស្រាយរបស់គណៈកម្មាធិការជាតិរៀបចំការបោះឆ្នោត (គ.ជ.ប) និងផ្អែកលើការដោះស្រាយរបស់ក្រុមប្រឹក្សាធម្មនុញ្ញ ដែលសាធារណជនដឹងថា ស្ថាប័នទាំងពីរនេះមិនឯករាជ្យនោះ។
ឆ្លើយតបនឹងបញ្ហានេះ មន្ត្រីជាន់ខ្ពស់គណបក្សប្រជាជនកម្ពុជា លោកបណ្ឌិត ជាម យៀប បានឲ្យដឹងថា ទ្វាររដ្ឋសភានៅតែបើកចំហ ផ្ទុយទៅវិញ គណបក្សប្រឆាំងខ្លួនឯងទៅវិញទេដែលមិនព្រមចូលសភានោះ។ លោក ជាម យៀប អះអាងថា ការចូលប្រជុំសភាដំបូងនោះ ព្រះមហាក្សត្របានចេញព្រះរាជសារអញ្ជើញសមាជិកសភាទាំង ១២៣រូប ក្នុងនោះមានគណបក្សសង្រ្គោះជាតិ ៥៥រូប ដូច្នេះ គណបក្សប្រជាជនកម្ពុជា គោរពរដ្ឋធម្មនុញ្ញ ហើយការលើកឡើងរបស់ លោក សុរិយា ស៊ូប៊ែឌី នេះ គ្មានអ្វីគួរឲ្យខ្វល់ខ្វាយនោះឡើយ។
ទោះបីជាយ៉ាងនេះក្ដី ប្រធានគណបក្សសង្គ្រោះជាតិ លោក សម រង្ស៊ី បានអះអាងថា សភាបង្កើតថ្មី និងរដ្ឋាភិបាលនេះ ជារដ្ឋាភិបាលខុសច្បាប់។ ហើយគណបក្សសង្គ្រោះជាតិ មិនចូលរួមប្រជុំសភានេះ គោរពទៅតាមឆន្ទៈប្រជាពលរដ្ឋជាម្ចាស់ឆ្នោត ពីព្រោះការបោះឆ្នោតមិនមានយុត្តិធម៌។ លោកបញ្ជាក់ថា គន្លឹះដ៏សំខាន់គណបក្ស។
លោក ស៊ូប៊ែឌី លើកឡើងថា ដើម្បីអោយរដ្ឋសភាក្លាយជាតំណាងពិតប្រាកដរបស់ពលរដ្ឋកម្ពុជា ទំាងមូល និងដើម្បីអោយសិទ្ធិបោះឆ្នោត ត្រូវបានអនុវត្តប្រកបដោយប្រសិទ្ធភាព នៅថ្ងៃទី២៨ ខែកក្កដា កន្លងទៅនោះ រដ្ឋសភាត្រូវតែមានតំណាងគណបក្សទាំងពីរ។
លោក ស៊ូបែឌី បានជំរុញអោយមានការបន្តការពិភាក្សាក្នុងកម្រិតមួយសមរម្យ ដោយឈរលើទស្សនៈដោះស្រាយការជាប់គាំងក្នុងពេលបច្ចុប្បន្ន ដោយមិនបង្អង់ពេលវេលា។ ហើយបើមានបាតុកម្មទៀត លោកទទូចសាជាថ្មីឲ្យមានភាពស្ងប់ស្ងាត់ និងអត់ធ្មត់។
បេសកជនពិសេសបានកត់សម្គាល់ចំពោះការអត់ធ្មត់ជាទូទៅរបស់អាជ្ញាធរក្នុងការមិនប្រើកម្លាំង កាលពីប៉ុន្មានសប្ដាហ៍កន្លងទៅ ប៉ុន្តែ លោកនៅតែសម្ដែងក្តីព្រួយបារម្ភខ្លាំងចំពោះការប្រើកម្លាំងហួសហេតុ និងមិនរើសមុខក្នុងព្រឹត្តិការណ៍មួយចំនួន នាពេលកន្លងមក ដូចជាការបង្ក្រាបអ្នកបឹងកក់ ដោយជនស្លៀកស៊ីវិល ដោយការផ្ដាច់ចរន្តអគ្គិសនីនៅពេលយប់ និងករណីផ្សេងៗទៀត។ លោក ស៊ូប៊ែឌី ឲ្យអាជ្ញាធរកម្ពុជា បញ្ឈប់ជាបន្ទាន់សកម្មភាពបង្ក្រាបលើហ្វូងបាតុកម្ម នៅថ្ងៃខាងមុខ និងដោយគ្មានការរឹតបន្តឹង។
លោក ស៊ូបែឌី បានបង្ហាញរបាយការណ៍ទី៥ របស់គាត់ទៅកាន់ក្រុមប្រឹក្សាសិទ្ធិមនុស្ស អង្គការសហប្រជាជាតិនៅទីក្រុងហ្សឺណែវ ដែលរួមមានអនុសាសន៍ទៅកាន់រដ្ឋាភិបាល។ របាយការណ៍នោះ លើកពី ការកំណែទម្រង់តុលាការ កំណែទម្រង់រដ្ឋសភា និងកំណែទម្រង់បោះឆ្នោត អាចប្រើជាមគ្គុទ្ទេសក៍សម្រាប់សមាជិករដ្ឋសភាមកពីគណបក្សទាំងពីរ ក្នុងពេលដែលកម្ពុជា កំពុងធ្វើដំណើរឆ្ពោះទៅកាន់លទ្ធិប្រជាធិបតេយ្យសេរីពេញលេញបន្ថែមទៀត ប្រកបដោយនិរន្តរភាព សន្តិភាព និងការអភិវឌ្ឍសេដ្ឋកិច្ច ប្រកបដោយសមធម៌៕
ប្រភពពី វិទ្យុអាស៊ីសេរី
