ភ្លើងប្រចណ្ឌ ស្ត្រី២នាក់វាយតប់ គ្នាផ្អើលពេញផ្សារទំនប់ទាំងព្រឹក
រាជធានីភ្នំពេញ ៖ ដោយសារតែអំណាចភ្លើងប្រចណ្ឌឆេះរោលក្តៅងំ ធ្វើឱ្យស្ត្រីម្នាក់បង្កជាជម្លោះវាយតបស្ត្រីម្នាក់ទៀតដែលជាអ្នកស្គាល់គ្នា ផ្អើលពេញផ្សារទំនប់ទាំងព្រឹក វេលាម៉ោង១០និង២០នាទីថ្ងៃទី១៩ កញ្ញា ២០១៣ ហើយត្រូវសមត្ថកិច្ចឃាត់យកទៅសួរនាំនៅប៉ុស្តិ៍នគរបាលទួលសង្កែ ។
ស្ត្រីបង្កហេតុឈ្មោះអ៊ុក ធុរ៉េន អាយុ៤០ឆ្នាំ ស្នាក់នៅផ្ទះលេខ៦៦ សង្កាត់បឹងកក់១ ខណ្ឌទួលគោក មានកូន៥នាក់ ចំណែកស្ត្រីរងគ្រោះឈ្មោះអ៊ួង ហួច អាយុ៤៤ឆ្នាំ មានទីលំនៅផ្ទះលេខ៤០៦ ផ្លូវ៥៩៨ ភូមិទួលសង្កែ សង្កាត់ទួលសង្កែ ខណ្ឌទួលគោក រងរបួសមុខនិងម្រាមដៃ មានប្តីនិងកូនហើយដែរ ។
បើតាមអ្នកឆ្លើយឆ្លងព័ត៌មានកោះសន្តិភាពឱ្យដឹងថា ស្ត្រី២នាក់ខាងលើជាអ្នកស្គាល់រាប់អានគ្នា ។ នៅព្រឹកថ្ងៃកើតហេតុស្ត្រីបង្កបានទៅផ្សារទំនប់ ហើយឃើញស្ត្រីរងគ្រោះ ក៏ស្ទុះទៅប្រវាយប្រតប់ បោចសក់ក្រញៅរយះមុខ រួចស្រែកជេរថាលួចស្រឡាញ់ប្តីរបស់គាត់ បង្កឱ្យមានការភ្ញាក់ផ្អើលពេញផ្សារតែម្តង ៕
