សំណុំរឿងលោកនេនស្លាប់ តុលាការលើក ពេលសវនាការ អ្នកស្លាប់មិន ទាន់ទទួលយុត្តិធម៌
ខេត្តកំពង់ចាម ៖ ថ្ងៃសវនាការលើកទី២ដែលគ្រោងនឹងប្រព្រឹត្តទៅនាព្រឹកថ្ងៃទី១៩ កញ្ញា លើករណីដែលព្រះចៅអធិការវត្តបើុស បានប្រើហិង្សារហូតបណ្ដាលឱ្យសាមណេរមួយអង្គព្រះនាម ម៉ាន់ សុខហេង អនិច្ចធម្មនាពេលកន្លងមក នោះ គេឃើញមេធាវីការពារឱ្យជនរងគ្រោះ និងមេធាវីការជនចាប់ចោទបានបង្ហាញខ្លួនដោយមានទាំងមន្ត្រីអង្គការសិទ្ធិមនុស្ស និងជនជាប់ចោទចំនួន៤នាក់ ។
ដោយឡែកចៅអធិការវត្តមិនមានវត្ដមាននៅក្នុងពេលនោះទេ ហើយអ្វីដែលគួរឱ្យសោកស្ដាយនោះគឺសវនាការលើកទី២នេះក៏ត្រូវបានលើកពេលទៅថ្ងៃក្រោយវិញ ដោយមិនបានកំណត់ពេលច្បាស់លាស់ ដែលធ្វើឱ្យគ្រួសារសាមណេរ(លោកនេន)រងគ្រោះមិនរំពឹងថា នឹងទទួលបានយុត្តិធម៌នោះឡើយ ។
លោកមេធាវី គា អ៊ាវ ការពារឱ្យជនរងគ្រោះបានឱ្យដឹងថា ក្នុងករណីខាងលើនេះរូបលោកសូមឱ្យស្ថាប័នមានសមត្ថកិច្ចមេត្ដាមានវិធានការផ្សឹកចៅអធិការវត្តជាមុនសិន ទើបងាយស្រួលដល់ការបើកសវនាការ ព្រោះកាលពីគម្រោងសវនាការលើកទី១នាពេលកន្លងទៅកាលពីព្រឹកថ្ងៃទី៦ កញ្ញា មិនមានវត្តមានចៅអធិការជាជនជាប់ចោទដើម្បីសួរដេញដោលគ្នាទៅវិញទៅមក និងមិនទទួលបានលទ្ធផលផ្លែផ្កានោះទេ ។ កត្ដានេះធ្វើឱ្យភាគីម្ដាយជនរងគ្រោះមានការសោកស្ដាយជាខ្លាំងរហូតសម្រក់ទឹកភ្នែក ។ លោកមេធាវីបានប្រាប់បន្តថា ជាមួយនោះដែរសម្ដេចអគ្គមហាសង្ឃរាជាធិបតី ទេព វង្ស ក៏បានចេញលិខិតក្រើនរំលឹក១ច្បាប់ទៀតចុះថ្ងៃទី១៧ កញ្ញា សូមឱ្យលោកប្រធានសាលាដំបូងខេត្តជួយចាត់វិធានការឱ្យជនជាប់ចោទលាចាកសិក្ខាបទ(សឹកពីព្រះសង្ឃ)ជាមុនសិន មុននឹងយកជនជាប់ចោទទៅវិនិច្ឆ័យតាមផ្លូវច្បាប់រដ្ឋ ។
លោកស្រីសុភក្ត្រ ប្រធានមន្ទីរធម្មការ និងសាសនាខេត្តបានឱ្យដឹងថា ក្នុងករណីនេះត្រូវបានភាគីរងគ្រោះចោទប្រកាន់មកលើចៅអធិការវត្តបើុសថា កាលពីថ្ងៃទី១៣ មេសា ឆ្នាំ២០១២ ចៅអធិការអង្គនេះបានប្រើហិង្សាមកលើសាមណេរ(លោកនេន)ព្រះនាម ម៉ាន់សុខហេង ។ ក្រោយពីមានបញ្ហានេះកើតឡើងក៏លេចឮថា គេបានដឹកលោកនេនដែលរងរបួសមកកាន់មន្ទីរពេទ្យបង្អែកខេត្ត ហើយបានបណ្ដាលឱ្យអនិច្ចធម្ម រួចដឹកយកទៅបូជានៅវត្តបឹងកុក ក្រុងកំពង់ចាម ដោយគ្មាននរណាដឹងទេ គឺលួចបូជាស្ងាត់ៗបំបាត់ភស្ដុតាង ។ លុះពេលមានការសុើបអង្កេតក៏ត្រូវបានខាងមន្ទីរពេទ្យខេត្តបដិសេធ ។
ចំណែកខាងគណៈកម្មការវត្តបឹងកុកដែលតាមគាំទ្រចៅអធិការវត្តជាប់ចោទលើកហេតុផលថា រាល់ការបូជាសពនៅឈាបនដ្ឋានដរាបណាមានលិខិតបញ្ជាក់ពីមន្ទីរពេទ្យខេត្តច្បាស់លាស់ ។ រហូតមកដល់ពេលនេះ មិនទាន់មានភាពច្បាស់លាស់នៅឡើយទេ ហើយសពក៏មិនដឹងនៅទីណាដែរ ខ្លះថាអនិច្ចធម្មខណៈដឹកតាមផ្លូវ ហើយត្រូវបានដឹកទៅធ្វើបុណ្យនៅក្រូចឆ្មារវិញ ។
ការផ្សឹកព្រះសង្ឃលុះត្រាណាតែរកកំហុសឃើញកំហុស ដូច្នេះមេត្ដាសូមឱ្យបន្តធ្វើការសើុបអង្កេត បន្ថែមទៀតលើករណីនេះដើម្បីរកយុត្តិធម៌ជូនជនរងគ្រោះ ។ ចំណែកចៅអធិការវត្តវិញក៏មានភស្ដុតាងមួយចំនួនដែរគឺកាលពីថ្ងៃទី២៩ មេសា ឆ្នាំ២០១២ លោកនេន នាម ម៉ាន់ សុខហេង បាននិមន្តចេញពីវត្តទៅសូត្រមន្តក្នុងពិធីមង្គលការរបស់កូនអ្នកស្រុកក្រូចឆ្មារ ។ ចំពោះពេលវេលាប្រព្រឹត្តដែលចោទមកលើចៅអធិការវត្តគឺមានភាពផ្ទុយគ្នាស្រឡះ ។ កត្ដានេះសូមឱ្យស្ថាប័នសាលាដំបូងខេត្តជួយរកយុត្តធម៌ជូនចៅអធិការវត្តនាម ស្រួយ គឹមហ៊ង ផងដែរ ប្រសិនណាបើរកកំហុសឃើញមែននោះ ត្រូវផ្សឹកយកទៅវិនិច័្ឆយទោសតាមច្បាប់រដ្ឋ ។
នៅក្នុងពាក្យបណ្ដឹងរបស់លោកខៃ ជឹម ត្រូវជាញោម(ឪពុក)របស់សាមណេរ(លោកនេន) ម៉ាន់ សុខហេង បានបញ្ជាក់ថា ហេតុអ្វីបានជានៅពេលកើតហេតុរថយន្តរបស់មន្ទីរពេទ្យបង្អែកស្រុកក្រូចឆ្មារដឹកលោកនេនធ្លាក់ពីលើព្រះវិហារនិគ្រោធារាម តាមស្ត្រីអ្នកបម្រើលោកក្នុងវត្តទូរស័ព្ទហៅកាលពីវេលាម៉ោង៨និង៣០នាទីព្រឹកថ្ងៃទី១៣ មេសា ២០១២ ។
ប៉ុន្តែចៅអធិការវត្ត ស្រួយ គឹមហ៊ង បែរជាទូរស័ព្ទប្រាប់គាត់ជាឪពុកថា កូនញោមរត់តាមស្រីបាត់ទៅហើយ ដែលនេះជាការលាក់បាំងការពិត ។ ចំពោះរូបថតដែលលោកនេន ម៉ាន់ សុខហេង និមន្តទៅសូត្រមន្តក្នុងពិធីអាពាហ៍ពិពាហ៍នៅក្នុងឃុំបើុស កាលពីថ្ងៃទី២៩ មេសា ឆ្នាំ២០១២ នោះគឺផ្ទុយពីឯកសាររបស់មន្ទីរពេទ្យបង្អែកស្រុកក្រូចឆ្មារកាលពីថ្ងៃទី១៣ មេសា២០១២ គឺជាករណីផ្ទុយគ្នាទាំងស្រុងឬក៏ជារឿងបំភ្លៃការពិត ៕ប្រភពពី កោះសន្តិភាព
