ឆក់កាបូបបានសម្រេច រួចបាញ់មួយគ្រាប់ របួសជនបរទេសម្នាក់
ភ្នំពេញ: ជនសង្ស័យ២នាក់ជិះម៉ូតូឌុបគ្នា ធ្វើសកម្មភាពឆក់កាបូបជនបរទេស និងបាញ់១គ្រាប់ បណ្តាលឲ្យរបួសនារីម្នាក់ របួសចំភ្លៅឆ្វេង ត្រូវបានរថយន្តសងគ្រោះដឹកទៅគ្លីនិក ឃឹម រ៉ានី នៅចំណុចជិតផ្សារចាស់ សង្កាត់វត្តភ្នំ ខណ្ឌដូនពេញ កាលពីវេលាម៉ោងជិត៨យប់ថ្ងៃទី២៨ ខែកញ្ញា ឆ្នាំ២០១៣។
សមត្ថកិច្ចបានឲ្យដឹងថា នារីរងគ្រោះ ឈ្មោះ សាគីកូ សាកាយា ណាជី អាយុ៣៣ឆ្នាំ ស្នាក់នៅសណ្ឋាគារប៉ាស៊ីហ្វិក។ ជនរងគ្រោះចូលមកកម្ពុជា ចំនួន ៥ថ្ងៃ ជាភ្ញៀវទេសចរ ហើយថ្ងៃនេះជាថ្ងៃទី១។
បើតាមសម្តីអ្នកបកប្រែភាសានិយាយថា នៅមុនពេលកើតហេតុរូបគាត់ និងប្អូនស្រី បានដើរតាមផ្លូវលេខ១៣ ខណៈមកដល់ចំណុចកើតហេតុ ក៏មានជនសង្ស័យ ២នាក់ជិះម៉ូតូសង់សេ ១២៥ពណ៌ខ្មៅ មកឆក់កាបូបរបស់គាត់ ហើយមានការប្រទាញប្រទង់គ្នានោះក្រុមជនសង្ស័យ បានដកកាំភ្លើង បាញ់ចំភ្លៅខាងឆ្វេង របស់ជនរងគ្រោះ រួចជិះម៉ូតូគេចខ្លួនបាត់ទៅ។
ក្រោយកើតហេតុស្ត្រីរងគ្រោះ ត្រូវបានសមត្ថកិច្ចបញ្ជូនទៅកាន់មន្ទីរពេទ្យឯកជន ឃឹម រ៉ានី៕
