លើកគ្នាមួយគ្រួសារ ទៅលួចបង្គោល ភ្លើងទាំងកណ្តាលថ្ងៃ ត្រូវប៉ូលិសចាប់ខ្លួន ៤នាក់ និងឡានពីរគ្រឿង
ភ្នំពេញ: នគរបាលខេត្តកំពង់ចាម បានចាប់ខ្លួនប្តីប្រពន្ធ និងកូនមួយគ្រួសារ ជាមួយរថយន្តស្ទួចចំនួនពីរគ្រឿង ដែលផ្ទុកបង្គោលភ្លើងសង់ពីស៊ីម៉ង់ត៍ ដែលបានដឹកចេញពីភូមិទួលវិហារ ឃុំជីរោទ៍២ ស្រុកត្បូងឃ្មុំ កាលពីរសៀលថ្ងៃទី១៦ ខែកញ្ញា ឆ្នាំ២០១៣។
លោក គង់ សីហុង នាយប៉ុស្តិ៍នគរបាលឃុំជីរោទ៍២បានប្រាប់ CEN កាលពីថ្ងៃទី១៧ ខែកញ្ញា ថា ជនសង្ស័យដែលថ្លើមធំ ហ៊ានលួចបង្គោលភ្លើងគេ ទាំងកណ្តាលថ្ងៃនោះ ទី១- ឈ្មោះ ច្រឹង សុភាព អាយុ ៥៣ ឆ្នាំជាប្តី ទី២- ឈ្មោះ សំ ថុល អាយុ ៥៣ ឆ្នាំដែរ ជាប្រពន្ធ ទី៣- ឈ្មោះ ច្រឹង សំណុល ហៅ ឆៃណា អាយុ២៧ឆ្នាំជាកូនប្រុសមានទីលំនៅភូមិទី១២ សង្កាត់កំពង់ចាម ក្រុងកំពង់ចាម និង ទី៤- ឈ្មោះ រ៉ាន់ និរោធ ភេទប្រុស អាយុ២២ ឆ្នាំ ជាព្រូឡាន។
លោកនាយប៉ុស្តិ៍បានឲ្យដឹងទៀតថា ចំណែករថយន្តអាចស្ទូចផង និងដឹកផង មានចំនួនពីរគ្រឿងម៉ាក់ហ៊ីយ៉ុងដាយមួយគ្រឿង ស្លាកលេខ កំពង់ចាម 3A-3370 ចាប់បាននៅរង្វង់នាគព័ន្ធស្រុកកំពង់សៀមនិងមួយគ្រឿងទៀត លេខ កំពង់ចាម 3A-2250 ចាប់បាននៅស្រុកបាធាយ។
សមត្ថកិច្ចជំនាញរបស់ការិយាល័យកម្រិតស្រាលនៃស្នងការនគរបាលខេត្តកំពង់ចាម កំពុងសួរចម្លើយ ដើម្បីកសាងសំណុំរឿង ចាត់ការតាមនីតិវិធី៕ប្រភព ពី CEN
Read more: http://www.cambodiapage.info/?p=15509#ixzz2fDpeFqYY
