ខឹងប្រពន្ធមិនព្រមឲ្យរួមរ័ក្ស យកថ្នាំកណ្តៀរមកផឹកសម្លាប់ខ្លួន
រាជធានីភ្នំពេញ ៖ មានរឿងហេតុគួរឲ្យហួសចិត្តមួយបានកើតឡើង កាលពីវេលាម៉ោង ១០និង៣៥នាទីយប់ថ្ងៃទី២៩ ខែកញ្ញា ឆ្នាំ២០១៣ ស្ថិតនៅផ្ទះជួលមួយកន្លែង នៅចំណុចផ្លូវលេខ១៧ សង្កាត់ផ្សារចាស់ ខណ្ឌដូនពេញ ដោយសារតែមានបុរសម្នាក់តូចចិត្ត ព្រោះតែសុំប្រពន្ធរួមរ័ក្សមិនបាន ក៏យកថ្នាំសម្លាប់សត្វកណ្តៀរមកផឹកដើម្បីធ្វើអត្តឃាតខ្លួនឯង។
បើតាមប្រភពព័ត៌មានពីកន្លែងកើតហេតុបានឲ្យដឹងថា ជនរងគ្រោះដែលលេបថ្នាំសម្លាប់ខ្លួននេះមានឈ្មោះ ផន ម៉ៅ អាយុ២៤ឆ្នាំ មានមុខរបរជាជាងក្រឡឹង មានស្រុកកំណើតនៅខេត្តកំពង់ចាម ចំណែកប្រពន្ធមានឈ្មោះ ស្រីពៅ អាយុ២១ឆ្នាំ មុខរបរ ជាអ្នកលក់ខោអាវនៅផ្សារសូរិយា។
បើតាមការរៀបរាប់របស់ស្ត្រីជាប្រពន្ធបានឲ្យដឹងថា មុនពេលកើតហេតុ ជនរងគ្រោះបានត្រឡប់មកពីផឹកស៊ីជាមួយមិត្តភក្តិនៅខាងក្រៅ រហូតស្រវឹងធ្លាក់ភ្នែក។ ពេលនោះដោយសារតែខ្លួនខឹងនឹងប្តីដែលរវល់តែដើរផឹកស៊ីមិននាំប្រពន្ធដើរលេង ខ្លួនក៏មិនបាននិយាយរកហើយចូលទៅដេកមុន។ ភ្លាមៗនោះ ជនរងគ្រោះបានមកឱបពីក្រោយ និងបានយកដៃស្ទាបអង្អែលខ្លួនប្រាណ ប៉ុន្តែនាងបានវៀសដៃនោះចេញ ហើយប្តីក៏បានស្ទុះ មកសង្កត់ពីលើហើយចាប់ថើបញក់ញី និងសុំនាងរួមរ័ក្ស តែត្រូវបាននាងបដិសេធ និងបានស្តីបន្ទោសឲ្យប្តីថា «ចេះទៅផឹកស៊ីនៅខាងក្រៅ ឲ្យទៅរួមរ័ក្ស ជាមួយស្រីនៅខាងក្រៅទៅ កុំមកប៉ះពាល់ប្រពន្ធនៅផ្ទះ»។
គ្រាន់តែស្តីឲ្យប៉ុណ្ណឹង ជនរងគ្រោះក៏បានងើបទៅវិញក្នុងស្ថានភាពស្រងូតស្រងាត់ ដោយស្ត្រីជាប្រពន្ធមិនចាប់អារម្មណ៍ដោយនឹកស្មានថាគាត់ទៅបន្ទប់ទឹក។ លុះបាត់យូរពេកមិនឃើញត្រឡប់មកវិញ នាងក៏ដើរទៅមើល ស្រាប់តែឃើញប្តីរបស់នាងកំពុងតែប្រកាច់បែកពពុះមាត់ ដោយនៅក្បែរខ្លួនមានថ្នាំសម្លាប់សត្វកណ្តៀរមួយកញ្ចប់។ ភ្លាមៗនោះស្ត្រីខាងលើ បានស្រែកឆោឡោឡើង បង្កឲ្យមានការភ្ញាក់ផ្អើលដល់អ្នកជិតខាងនាំគ្នាមកចោមរោមមើល។
បន្ទាប់ពីកើតហេតុ ជនរងគ្រោះត្រូវបានអ្នកជិតខាង ជួយដឹកតាមរ៉ឺម៉កកង់បីយកទៅធ្វើការសង្គ្រោះបន្ទាន់នៅមន្ទីរពេទ្យ។ អាចចាត់ទុកថាជាសំណាងល្អ ដែលជនរងគ្រោះត្រូវបានគេបញ្ជូនយកមកធ្វើការសង្គ្រោះបានទាន់ពេលវេលា ទើបអាចរួចផុតពីសេចក្តីស្លាប់ កុំអីត្រូវក្ស័យជីវិតព្រោះតែរឿងសុំប្រពន្ធរួមរ័ក្សមិនបាន៕
_______________________
ប្រភពពីវត្តភ្នំ
