ជនសង្ស័យ២នាក់ ត្រូវសមត្ថកិច្ចឃាត់ខ្លួន ពីបទចាប់រំលោភក្មេង ស្រីអាយុ១៥ឆ្នាំ
រាជធានីភ្នំពេញ ៖ កម្លាំងសមត្ថកិច្ចបានធ្វើការចាប់ឃាត់ខ្លួនយុវជន២នាក់ ក្នុងចំណោមបក្ខពួក៣នាក់ បន្ទាប់ពីទទួលបានពាក្យបណ្តឹងពីស្ត្រីម្នាក់ ដែលបានប្តឹងចោទប្រកាន់ពួកគេ ថាបានចាប់រំលោភកូនស្រីរបស់គាត់ កាលពីវេលាម៉ោង៧ និង៣០នាទីយប់ ថ្ងៃទី២៨ ខែកញ្ញា ឆ្នាំ២០១៣ នៅចំណុចក្នុងគុម្ពោធព្រៃមួយកន្លែងស្ថិតនៅភូមិចំការឪឡឹក សង្កាត់កាកាប ខណ្ឌពោធិ៍សែនជ័យ។
បើតាមប្រភពព័ត៌មានពីសមត្ថកិច្ចបានឲ្យដឹងថា ជនសង្ស័យទាំង២នាក់ ដែលត្រូវសមត្ថកិច្ចចាប់ឃាត់ខ្លួននេះមានឈ្មោះ ប្រាក់ ធីម អាយុ១៧ឆ្នាំ មានស្រុកកំណើតភូមិកោះវែក ឃុំបឹងសាឡាងខាងត្បូង ស្រុកកំពង់ត្រាច ខេត្តកំពត និងម្នាក់ទៀតមានឈ្មោះ នឿន ខេង ហៅវណ្ណា អាយុ២១ឆ្នាំ មានស្រុកកំណើតនៅភូមិពាមក្រស្នា ឃុំពាមក្រស្នា ស្រុកស្ទឹងត្រង់ ខេត្តកំពង់ចាម។ ចំណែកជនរងគ្រោះមានអាយុ១៥ ឆ្នាំមានទីលំនៅត្រង់ចំណុចកើតហេតុខាងលើ។
នៅចំពោះមុខសមត្ថកិច្ចជនសង្ស័យបានធ្វើការបដិសេធថា ពួកខ្លួនមិនបាននាំគ្នាចាប់រំលោភជនរងគ្រោះនោះទេ គឺគ្រាន់តែនាំជនរងគ្រោះទៅដើរលេងតែប៉ុណ្ណោះ ព្រោះពួកគេនិងជនរងគ្រោះ គឺជាមនុស្សរាប់អានគ្នា។ បច្ចុប្បន្ន ជនសង្ស័យត្រូវបានសមត្ថកិច្ចឃុំខ្លួនជាបណ្តោះអាសន្ន ដើម្បីកសាងសំណុំរឿងបញ្ជូនទៅកាន់តុលាការចាត់ការទៅតាមនីតិវិធីច្បាប់៕
__________________________
ប្រភពពីវត្តភ្នំ
