ចាប់ខ្លួនជនឆបោកលក់ «ថ្មស៊ីដែក» ក្នុងតម្លៃ5.000ដុល្លារអាមេរិក
ខេត្តក្រចេះ ៖ សាលាដំបូងខេត្ត កាលពីល្ងាចថ្ងៃទី២៩ កញ្ញា បានសម្រេចឃុំខ្លួនបុរសម្នាក់នៅពន្ធនាគារខេត្តពីបទប្រព្រឹត្តហិង្សាដោយចេតនា និងឆបោក ។ ការឃុំខ្លួននេះបានធ្វើឡើងបន្ទាប់ពីជននេះត្រូវបានកម្លាំងនគរបាលស្រុកសំបូរចាប់ឃាត់ខ្លួននៅឃុំអូរគ្រៀង ស្រុកសំបូរ រយៈពេល២ថ្ងៃរួចមក ខណៈជនម្នាក់នេះ និងបក្សពួកបានបង្កើតករណីឆបោក និងព្រួតគ្នាវាយជនរងគ្រោះ ។
លោកអនុសេនីយ៍ទោ ឈិន សំបូរ អធិការរងនគរបាលស្រុកសំបូរ ទទួលបន្ទុកផ្នែកព្រហ្មទណ្ឌបានឱ្យដឹងថា ជនសង្ស័យរូបនេះឈ្មោះ ស្រី ដេត អាយុ៤៧ឆ្នាំ មានទីលំនៅក្នុងឃុំដារ ស្រុកចិត្របុរី ។ កាលពីថ្ងៃទី២៧ កញ្ញា ជនម្នាក់នេះនិងបក្សពួកបានយកថ្មស៊ីដែកក្លែងក្លាយ ដែលគេចាត់ទុកថាជារបស់ស័ក្តិសិទ្ធិតាមអបិយជំនឿទៅលក់ឱ្យឈ្មោះ វ៉ាន់ ធី រស់នៅក្នុងឃុំអូរគ្រៀង ស្រុកសំបូរ ក្នុងតម្លៃ៥ពាន់ដុល្លារ តែជនរងគ្រោះបានប្រគល់ប្រាក់កក់ឱ្យ៣.៥០០ដុល្លារមុន ។ ក្រោយពីទទួលប្រាក់កក់រួច ជននេះនិងបក្សពួកមួយចំនួនទៀតក៏គេចខ្លួន ហើយជនរងគ្រោះប្រទះឃើញក៏ទារយកប្រាក់វិញ តែត្រូវជននេះនិងបក្សពួកមួយចំនួនទៀតព្រួតវាយបណ្តាលឱ្យរងរបួសយ៉ាងដំណំ ។
លោកអនុសេនីយ៍ទោ ឈិន សំបូរ បានឱ្យដឹងទៀតថា បន្ទាប់ពីទទួលបានពាក្យបណ្តឹងរាយការណ៍រួចមកកម្លាំងនគរបាលស្រុកក៏ចុះចាប់ឃាត់ខ្លួនជនម្នាក់នេះ ឯបក្សពួកមួយចំនួនទៀតរត់គេចខ្លួនបាត់ ។ ទោះបីជាយ៉ាងណា ក្រុមជនទាំងនេះសមត្ថកិច្ចបានកំណត់អត្តសញ្ញាណអស់ហើយ និងកំពុងស្រាវជ្រាវចាប់ខ្លួនបន្តទៀត ៕
