របាយការណ៍៖ កម្មករកាត់ដេរនៅកម្ពុជា ត្រូវទទួលប្រាក់ ខែយ៉ាងតិច ១៥០ ដុល្លារ ទើបមានជីវភាព រស់នៅសមរម្យ
របាយការណ៍ថ្មី ចុងក្រោយ រៀបចំដោយមជ្ឈមណ្ឌលអប់រំច្បាប់សម្រាប់សហគមន៍ នៅកម្ពុជា CLEC សហការជាមួយអង្គការតស៊ូមតិខាងការងារ របស់ចក្រភពអង់គ្លេស Labor Behind the Label ( LBL ) បង្ហាញថា កម្មករកាត់ដេរ នៅកម្ពុជា ត្រូវទទួលបានប្រាក់ខែយ៉ាងតិច ១៥០ ដុល្លារអាមេរិក ទើបកម្មករកាត់ដេរ មានជីវភាពរស់នៅសមរម្យ។ កម្មករកាត់ដេរ សព្វថ្ងៃ ទទួលបានប្រាក់ខែ ៨០ ដុល្លារ។ ការចរចាដំឡើងប្រាក់ខែកម្មករ នឹងត្រូវធ្វើឡើង នៅខែមករាឆ្នាំ២០១៤ ខណៈដែលពេលនេះ រដ្ឋាភិបាល សមាគមថៅកែរោងចក្រកាត់ដេរ និងសហជីពកម្មករ បានបង្កើតក្រុមការងារចម្រុះត្រីភាគី ដើម្បីស្រាវជ្រាវពីតម្រូវការជាក់ស្តែងរបស់កម្មករ។
ការសិក្សាស្រាវជ្រាវថ្មីមួយ អំពីជីវភាពរស់នៅរបស់កម្មករកាត់ដេរ នៅកម្ពុជា ត្រូវបានធ្វើឡើង ចាប់តាំងពីខែកញ្ញា ឆ្នាំ២០១។ តាមរបាយការណ៍ កម្មករកាត់ដេរនៅកម្ពុជា យ៉ាងហោចណាស់ ត្រូវទទួលបានប្រាក់ខែទាបបំផុត ១៥០,០៦ ដុល្លារអាមេរិក ក្នុងមួយខែ ទើបកម្មករកាត់ដេរ មានជីវភាពរស់នៅសមរម្យ។
លោក មឿន តុលា ប្រធានកម្មវិធីសិទ្ធិការងារ របស់មជ្ឈមណ្ឌលអប់រំច្បាប់សម្រាប់សហគមន៍ បានលើកឡើងថា របាយការណ៍ស្តីពីប្រាក់ខែកម្មករ ដែលបានប្រកាសចេញផ្សាយ នៅថ្ងៃទី១៩កញ្ញា បានមកពីការសាកសួរកម្មករតាមបណ្តារោងចក្រគោលដៅ ការថ្លឹងទម្ងន់ និងវាស់កម្ពស់កម្មករ ព្រមទាំងការត្រួតពិនិត្យលើចំណីអាហារ ដែលកម្មករទទួលទានរាល់ថ្ងៃ។
របាយការណ៍បង្ហាញថា កម្មករកាត់ដេរម្នាក់ យ៉ាងហោចណាស់ ត្រូវចំណាយលើចំណីអាហារ ជាង ៧៥ ដុល្លារ ក្នុងមួយខែ។ រីឯការចំណាយផ្សេងៗទៀត ក្រៅពីអាហារ រួមមាន ថ្លៃផ្ទះជួល ទឹកភ្លើង និងសម្ភារៈប្រើប្រាស់ដទៃទៀត មានប្រមាណ ៧៥ ដុល្លារ ក្នុងមួយខែ។
លោក មឿន តុលា បញ្ជាក់ថា របាយការណ៍រកឃើញថ្មីនោះ ត្រូវបញ្ជូនទៅកាន់រដ្ឋាភិបាល អ្នកបញ្ជាទិញ សមាគមថៅកែរោងចក្រកាត់ដេរ និងសហជីពកម្មករ សម្រាប់ធ្វើជាមូលដ្ឋាន ក្នុងការចរចាដំឡើងប្រាក់ខែដល់កម្មករកាត់ដេរ។
របាយការណ៍ថ្មីខាងលើនេះ ត្រូវបានតំណាងរដ្ឋាភិបាល ទទួលយកមកពិនិត្យ។ ប៉ុន្តែការចរចាលើការដំឡើងប្រាក់ខែកម្មករកាត់ដេរ ត្រូវធ្វើឡើងតាមគណៈកម្មការចម្រុះត្រីភាគី ដែលមានក្រសួងសង្គមកិច្ច ក្រសួងការងារ សមាគមរោងចក្រកាត់ដេរ និងសហជីពកម្មករ។ គណៈកម្មការចម្រុះត្រីភាគីនោះ ត្រូវបានបង្កើតឡើង ដើម្បីសិក្សាស្រាវជ្រាវលើប្រាក់ឈ្នួលអប្បបរមា សម្រាប់កម្មករកាត់ដេរ។ គណៈកម្មការចម្រុះ បានបើកកិច្ចប្រជុំ លើកទី១ កាលពីថ្ងៃទី១៣កញ្ញា។
លោក វង្ស សុវណ្ណ អគ្គលេខាធិការរង នៃគណៈកម្មការដោះស្រាយបញ្ហាបាតុកម្ម កូដកម្ម នៅគ្រប់មុខសញ្ញា របស់ក្រសួងសង្គមកិច្ច បានលើកឡើងថា អនុគណៈកម្មការចំនួន ៤ ត្រូវបានបង្កើតឡើង ដើម្បីស្រាវជ្រាវជីវភាពរស់នៅរបស់កម្មករ ក៏ដូចជាលទ្ធភាពរបស់និយោជកថៅកែរោងចក្រ ក្នុងការតម្លើងប្រាក់ខែដល់កម្មករ។ កិច្ចប្រជុំត្រីភាគី ដើម្បីដំឡើងប្រាក់ខែកម្មករកាត់ដេរ នឹងត្រូវធ្វើឡើង នៅខែមករា ឆ្នាំ២០១៤។ កម្មករកាត់ដេរសព្វថ្ងៃ ទទួលបានប្រាក់ខែ ៨០ ដុល្លារ ក្នុងមួយខែ។
របាយការណ៍របស់ក្រសួងការងារ បង្ហាញថា គិតត្រឹមខែកញ្ញាឆ្នាំ២០១៣ នៅទូទាំងប្រទេស មានរោងចក្រសហគ្រាស ចំនួន ៥.៣៧១ និងមានកម្មករសរុបប្រមាណ ៨០៦.៩១៦ នាក់។ រីឯការនាំចេញផលិតផលកាត់ដេរ កាលពីឆ្នាំ២០១២ មានតម្លៃជាង ៤០០០ លានដុល្លារ៕
ប្រភពពី វិទ្យុបារាំងអន្តរជាតិ
