កាល​ពី ​មួយ​សប្ដាហ៍​មុន​ពេល​ចុះ​ផ្សាយ​អត្ថបទ​នេះ​ ខ្ញុំ​បាន​អំពាវ​សុំ​​អោយ​សប្បុរសជន​នានា ទាំង​ក្នុង​ក្រុង​ក្រៅ​ក្រុង ឬ ក្រៅ​ប្រទេស​អោយ​ជួយ​ដល់​អ្នក​ភូមិ​បូរី​កីឡា​ដែល​កំពុង​ជួប​នូវ​ភាព​ខ្វះ​ខាត លំបាក​វេទនា​ដោយ​ការ​អភិវឌ្ឍន៍​។

លុះ​ក្រោយ​មក​យើង​​ក៏​ទទួល​បាន​នូវ​អំណោយ​ជា​ច្រើន​ហួស​ពី​ការ​ស្មាន និង​មាន​ក្រុម​យុវជន​ដែល​មក​ពី​បណ្ដាញ​សង្គម Facebook ជា​ច្រើន​នាក់​ថែម​ទៀត បាន​សហការ​គ្នា​ដើម្បី​ធ្វើ​សកម្មភាព​ការងារ​មួយ​នេះ ដែល​មាន​ខ្ញុំ សាម៉ាឌី ជា​អ្នក​ដឹក​នាំ។ ស្ថានភាព​ជាក់​ស្ដែង យើង​ពិត​ជា​មិន​អាច​ស្មាន​ដល់​នោះ​ទេ ព្រោះ​ពួក​គាត់​​បាន​លើក​ដៃ​សំពះ អរគុណ​ដល់​ក្រុម​យុវជន និង​សប្បុរស​ជន​ឯទៀតៗ ដែល​បាន​បរិច្ចាគ​សំលៀក​បំពាក់​ ស្បែក​ ជើង ​ផ្ទាល់​ខ្លួន ខ្លះ​ទៀត​ក៏​បាន​ចូល​រួម​ជា​សៀវភៅ ប៊ិច ទៀត​ផង។ ខាង​អ្នក​តំណាង​​សហគមន៍​​បូរី​កីឡា​ក៏​បាន​ថ្លែង​អំណរគុណ​ផង​ដែរ​ថា​៖

សហគមន៍​បុរី​កីឡា៖ យើងខ្ញុំ​ទាំង​អស់គ្នា ជា​ជនរងគ្រោះ​ដោយសារ​ការបណ្តេញចេញ​ដោយ​បង្ខំ បាត់បង់​ផ្ទះសម្បែង និង​ទ្រព្យសម្បត្តិ កាលពី​ថ្ងៃ 3 មករា 2012 កន្លងទៅ ។

សូម​គោរព​ថ្លែងអំណរគុណ ចំពោះ​ទឹកចិត្ត​សប្បុរសធម៌ ដ៏​ថ្លៃថ្លា របស់​ពុក​ម៉ែ បងប្អូន និស្សិត បុគ្គលិក​ក្រុមហ៊ុន និង​ក្រុមយុវជន​ស្ម័គ្រចិត្ត នៅ​ទីក្រុង​ភ្នំពេញ និង​តាម​បណ្តា​ខេត្ត ដែល​បាន​នាំយក​អំណោយ មក​ចែកជូន​យើងខ្ញុំ​ទាំងអស់គ្នា នៅ​ថ្ងៃអាទិត្យ ទី 23 ខែ មិថុនា ឆ្នាំ 2013 នេះ ។

អំណោយ​ទាំងនោះ​រួមមាន  ក្នុង​មួយ​គ្រួសារៗ​ទទួលបាន អង្ករ 2គីឡូក្រាម, មី 5កញ្ចប់, ខោអាវ 1ស្បោង, និង​សម្ភារៈ​ក្មេង​រៀន ដូចជា សៀវភៅ 6ក្បាល, ប៊ិច 3ដើម, ខ្មៅ​ដៃ 3ដើម, ជ័រលុប 2ដុំ, ទឹកលុប 2ដើម ។ សូម​គោរព​ជូនពរ​បងប្អូន​ម្ចាស់​អំណោយ និង​ក្រុមយុវជន​ស្ម័គ្រចិត្ត​ទាំងអស់ ជួបប្រទះ​នូវ​សុខភាព​ល្អ កម្លាំង​ពលំ​មាំមួន និង​សម្រេច​ជោគជ័យ​គ្រប់​ភារកិច្ច ៕

សូម​មើល​វីដេអូ​សកម្មភាព​ពួក​យើង​ដូច​ខាង​ក្រោម