ជនសង្ស័យ លួចម៉ូតូម្នាក់ត្រូវ សមត្ថកិច្ចស្រុក កំពង់សិលា ក្របួចបាន
ស្រុកព្រៃនប់ ៖ ជនសង្ស័យលួចម៉ូតូម្នាក់ក្នុងចំណោម២នាក់ត្រូវសមត្ថកិច្ចស្រុកព្រៃនប់សហការជាមួយសមត្ថកិច្ចស្រុកកំពង់សិលាស្ទាក់ឃាត់ខ្លួនបានកាលពីវេលាម៉ោង៨ និង៣០នាទីយប់ ថ្ងៃទី៣ សីហា ២០១៣ នៅតាមបណ្តោយផ្លូវជាតិលេខ៤ ក្នុងស្រុកកំពង់សិលា ខេត្តព្រះសីហនុ។
ជនសង្ស័យដែលសមត្ថកិច្ចឃាត់ខ្លួនបានឈ្មោះរស់ សំអាត ភេទប្រុស អាយុ២៤ឆ្នាំ ស្នាក់នៅភ្នំពេញ ចំណែកម្នាក់ដែលរត់រួចឈ្មោះរស់ សំអឿន ភេទប្រុស អាយុ៣០ឆ្នាំ ទាំង២នាក់ជាបងប្អូនបង្កើតនឹងគ្នា។ តាមប្រភពពីសមត្ថកិច្ចបានឱ្យដឹងថា ជនសង្ស័យទាំង២នាក់បានជិះម៉ូតូម្នាក់មួយគ្រឿង ដែលជនសង្ស័យជាប្អូនជិះម៉ូតូម៉ាកឌ្រីមសេ១២៥ពណ៌ខ្មៅ ស៊េរី២០០៨ អត់ស្លាកលេខ ចំណែកជនសង្ស័យជាបងជិះម៉ូតូម៉ាកវ៉េវឆ្លាម (អាល់ហ្វា) ពណ៌ក្រហម ពាក់ស្លាកលេខព្រះសីហនុ១B៥៧២២ ។
សមត្ថកិច្ចបន្តថា ជនសង្ស័យទាំង២នាក់ធ្វើដំណើរពីខេត្តព្រះសីហនុឆ្ពោះទៅរាជធានីភ្នំពេញ តែពេលដល់ពាក់កណ្តាលផ្លូវបានជួបនឹងបារ៉ាស់ដែលសមត្ថកិចដាក់ស្ទាក់ផ្លូវ ជននោះក៏ជិះម៉ូតូបំបុក រួចធ្វើដំណើរទៅមុខទៀត លុះទៅដល់ភូមិស្ទឹងឆាយ ស្រុកកំពង់សិលា ជនសង្ស័យជាបងបានផ្តួលម៉ូតូម៉ាកវ៉េវឆ្លាមចោល រួចរត់ចូលព្រៃបាត់ ចំណែកជនសង្ស័យជាប្អូនបានជិះម៉ូតូបន្តដំណើរទៅមុខទៀត លុះទៅដល់ស្ទឹងច្រាលក៏ជួបរនាំងសមត្ថកិច្ចស្រុកកំពង់សិលាក៏បកមកក្រោយវិញ តែជួបសមត្ថកិច្ច ក៏សម្រេចចិត្តផ្តួលម៉ូតូរត់ចូលព្រៃសម្ងំលាក់ខ្លួនរហូតដល់ម៉ោង៨ និង៣០នាទីយប់ប្រហែលជាត្រជាក់ពេកទ្រាំមិនបានជនសង្ស័យក៏រត់ចេញមកវិញត្រូវសមត្ថកិច្ចស្រុកកំពង់សិលាក្របួចជាប់បញ្ជូនឱ្យសមត្ថកិច្ចស្រុកព្រៃនប់ចាត់ការបន្ត។
ចំពោះម៉ូតូទាំង២គ្រឿងនេះ សមត្ថកិច្ចមិនទាន់ស្គាល់ម្ចាស់នៅឡើយទេ ហើយក៏មិនទាន់សន្និដ្ឋានថា ជនសង្ស័យទាំង២ធ្វើសកម្មភាពលួច ឬប្លន់ដែររង់ចាំស្រាវជ្រាវបន្តទៀត៕ប្រភព កោះសន្តិភាព!!!
