លោក ប៉ែន សុវណ្ណ អតីតនាយក រដ្ឋមន្ត្រីឈានទៅ កាន់តំណែងជា អ្នកតំណាងរាស្ត្រ
លោក ប៉ែន សុវណ្ណ អតីតនាយករដ្ឋមន្ត្រីរយៈពេលខ្លីនៃរបបសាធារណរដ្ឋប្រជាមានិតកម្ពុជា នឹងទទួលបានកៅអីតំណាងរាស្ត្រសម្រាប់នីតិកាលទី៥នៃរដ្ឋសភា បើទោះបីជាពេលនេះ គណបក្សសង្គ្រោះជាតិរបស់លោកបានប្រកាសមិនទទួលស្គាល់លទ្ធផលនៃការបោះឆ្នោតក្តី។
យោងតាមលទ្ធផលក្រៅផ្លូវការដែលផ្សាយដោយគណបក្សប្រជាជនកម្ពុជា និងអង្គការខុមហ្វ្រែលនោះគណបក្សប្រជាជនកម្ពុជា និងគណបក្សសង្គ្រោះជាតិ បានទទួលអាសនៈចំនួនរៀងៗខ្លួននៅមណ្ឌលខេត្តកំពង់ស្ពឺ។ ដូច្នេះវាជាការបើកផ្លូវឲ្យ លោក ប៉ែន សុវណ្ណ អ្នកនយោបាយជើងចាស់ វិលត្រឡប់ចូលក្នុងស្ថាប័ននីតិបញ្ញត្តិរបស់កម្ពុជា ដោយសារលោកឈរនៅលេងរៀងទីមួយ ខណៈលោក នុត រំដួល និង លោក សុខ អ៊ុំស៊ា ដែលជាសហការីរបស់លោកឈរនៅលំដាប់ទីពីរ និងទីបី។
យោងតាមលទ្ធផលក្រៅផ្លូវការដែលផ្សាយដោយគណបក្សប្រជាជនកម្ពុជា និងអង្គការខុមហ្វ្រែលនោះគណបក្សប្រជាជនកម្ពុជា និងគណបក្សសង្គ្រោះជាតិ បានទទួលអាសនៈចំនួនរៀងៗខ្លួននៅមណ្ឌលខេត្តកំពង់ស្ពឺ។ ដូច្នេះវាជាការបើកផ្លូវឲ្យ លោក ប៉ែន សុវណ្ណ អ្នកនយោបាយជើងចាស់ វិលត្រឡប់ចូលក្នុងស្ថាប័ននីតិបញ្ញត្តិរបស់កម្ពុជា ដោយសារលោកឈរនៅលេងរៀងទីមួយ ខណៈលោក នុត រំដួល និង លោក សុខ អ៊ុំស៊ា ដែលជាសហការីរបស់លោកឈរនៅលំដាប់ទីពីរ និងទីបី។
គណបក្សប្រជាជនកម្ពុជាដែលកាលពីអាណត្តិទី៤ បានគ្រប់គ្រងអាសនៈរហូតដល់ទៅ៥ក្នុងចំណោម៦នោះ ប៉ុន្តែពេលនេះត្រូវបាត់បង់ចំនួន២អាសនៈ។ យោងតាមលទ្ធផលក្រៅផ្លូវការនោះ បេក្ខជនដែលបានជាប់ឆ្នោតសម្រាប់គណបក្សប្រជាជនកម្ពុជានៅមណ្ឌលកំពង់ស្ពឺ គឺលោក សាយ ឈុំ អគ្គលេខាធិការបក្ស លោក ឆាយ ថន រដ្ឋមន្ត្រីក្រសួងផែនការ និងលោក កង ហ៊ាង អតីតអភិបាលខេត្តកំពង់ស្ពឺផ្ទាល់តែម្តង ខណៈលោក ហ៊ុន ម៉ានី កូនប្រុសសម្តេច ហ៊ុន សែន មិនបានទទួលកៅអីឡើយ។
លោក ប៉ែន សុវណ្ណ គឺជាអតីតនាយករដ្ឋមន្ត្រីដំបូងនៃរបបសាធារណរដ្ឋប្រជាមានិតកម្ពុជា ក្រោយការដួលរលំនៃរបបខ្មែរក្រហម ប៉ុន្តែលោកបានកាន់កាប់តំណែងនេះតែក្នុងរយៈពេលប្រមាណ៦ខែប៉ុណ្ណោះ ពីថ្ងៃទី២៧ ខែមិថុនា ដល់ថ្ងៃទី៥ ខែធ្នូ ឆ្នាំ១៩៨១ ។ លោកក៏លេខានៃបក្សបដិវត្តន៍ប្រជាជនកម្ពុជា ចាប់ពីឆ្នាំ១៩៧៩ ដល់ ថ្ងៃ ៥ ធ្នូ ១៩៨១ ។
យោងតាមឯកសារនានា តំណែងនាយករដ្ឋមន្ត្រីត្រូវបានជំនួសដោយលោក ចាន់ ស៊ី ខណៈលោក ហេង សំរិន កាន់កាប់តំណែងលេខាបក្ស បន្ទាប់ពីលោក ប៉ែន សុវណ្ណ ត្រូវបានប៉ូលិសពិសេសវៀតណាមចាប់ខ្លួនយកទៅដាក់គុកនៅទីក្រុងហាណូយ។ លោកត្រូវបានដោះលែងកាលពីថ្ងៃទី២៥ ខែមករា ឆ្នាំ១៩៩២ បន្ទាប់ជាប់ឃុំឃាំងអស់រយៈពេលប្រមាណ១០ឆ្នាំ។
ក្នុងបទសម្ភាសមួយជាមួយវិទ្យុអាស៊ីសេរី លោក ប៉ែន សុវណ្ណ ដែលបានអះអាងខ្លួនឯងថា ជាអ្នកបង្កើតរណសិរ្សសាមគ្គីសង្គ្រោះជាតិ២ធ្នូ ឆ្នាំ១៩៧៨ និងជាមេដឹកនាំរំដោះជីវិតប្រជាជនចេញពីរបបប្រល័យពូជសាសន៍នាថ្ងៃទី៧ ខែមករា ឆ្នាំ១៩៧៩ នោះ បានត្រឡប់ទៅធ្វើកសិកម្មវិញនៅខេត្តតាកែវ ដែលជាទីកំណើត។
កាលពីឆ្នាំ១៩៩៨ លោកបានបង្កើតគណបក្សទ្រទ្រង់ជាតិដើម្បីចូលរួមក្នុងការបោះឆ្នោតអាណត្តិទី២ ប៉ុន្តែមិនទទួលបានអាសនៈអ្វីឡើយ។ ក្នុងឆ្នាំ២០០៧ លោកបានបញ្ចូលគណបក្សរបស់លោកក្នុងគណបក្សសិទ្ធិមនុស្សរបស់លោក កឹម សុខា ដែលក្រោយមក លោកទទួលបានតំណែងជាប្រធានគណកម្មាធិការវិន័យរបស់គណបក្សសិទ្ធិមនុស្ស។
ក្នុងបទសម្ភាសមួយជាមួយកាសែតខេមបូឌាដេលី លោក ប៉ែន សុវណ្ណ បាននិយាយថា លោកចូលរួមជាមួយគណបក្សសង្គ្រោះជាតិដើម្បីសង្គ្រោះជាតិសារជាថ្មី ដែលអាចឲ្យលោកមានឱកាសក្លាយជាអ្នកតំណាងរាស្ត្រប្រចាំមណ្ឌលកំពង់ស្ពឺ ឬជាអភិបាលខេត្តកំពង់ស្ពឺ ក្នុងករណីគណបក្សសង្គ្រោះជាតិគ្រប់គ្រងតំណែងរដ្ឋាភិបាល៕
ប្រភពពី ថ្មីៗ
