ភ្នំពេញ៖ ក្មេងទំនើងពីរក្រុម ដែលសង្គម ស្អប់ខ្ពើមនោះ បានជិះម៉ូតូដេញវាយគ្នា តាមផ្លូវសាធារណះ យ៉ាងអនាធិបតេយ្យ ហើយជ្រុលទៅបុក ម៉ូតូស្កូបពីជិះ២នាក់ ម្តាយកូនអាយុ៦ឆ្នាំ រងរបួស ធ្ងន់ កាលពីវេលាម៉ោង ០៧ និង៣០នាទីយប់ថ្ងៃទី ០៥ សីហា ២០១៣ នៅចំណុចផ្លូវលេខ៦៣ (ផ្លូវត្រសក់ផ្អែម) កែងផ្លូវព្រះស៊ីហនុ សង្កាត់ចតុមុខ ខណ្ឌដូនពេញ ។

នគរបាលមូលដ្ឋាន បាននិយាយថា ក្មេងទំនើង បង្កគ្រោះថ្នាក់ខាងលើ ជិះម៉ូតូ ម៉ាកហុងដាសេ១២៥ ពណ៌ខ្មៅ ពាក់ស្លាកលេខភ្នំពេញ 1BT-4531 ជិះម្នាក់ឯង ក្នុងចំណោម បក្ខពួក៣នាក់ តាមផ្លូវលេខ៦៣ ក្នុងទិសដៅពីជើងទៅត្បូង ជិះដេញវាយគូទំនាស់មានគ្នា២នាក់ ខណៈមកដល់ចំណុច កើតហេតុក៏បានជ្រុល ចង្កូត ទៅបុកម៉ូតូស្កូបពី ពណ៌ស ពាក់ស្លាកលេខភ្នំពេញ 1AS-9448 ជិះគ្នា២នាក់ម្តាយកូន ក្នុងទិសដៅបញ្ច្រាសគ្នា បណ្តាលឲ្យម៉ូតូទាំង២គ្រឿង ដួសរបួសធ្ងន់ម្តាយ បាក់ជើងឆ្វេង ចំណែកឯកូនរងរបួសស្រាល ដឹកតាមរថយន្តយកទៅសង្គ្រោះ នៅគ្លីនិកឯកជន ក្រោយពីបង្កគ្រោះថ្នាក់រួចជនបង្កបានរត់គេចខ្លួនឡើង ជិះម៉ូតូបក្សពួកផ្សេងទៀត គេចខ្លួនបាត់ស្រមោល គឺបន្សល់ទុកម៉ូតូនៅនឹងកន្លែងកើតតែម្តង ។

ក្រោយកើតហេតុ ម៉ូតូទាំង២គ្រឿង ត្រូវបាននគរបាល ដឹកយកទៅរក្សា ទុកនៅអធិការដ្ឋាន នគរបាលខណ្ឌដូនពេញ ដើម្បីរងចាំម្ចាស់ម៉ូតូចូលខ្លួនមកដោះស្រាយគ្នា ជាក្រោយតាមផ្លូវច្បាប់  ៕

ដោយៈ ដើមអម្ពិល