​រុស្ស៊ី ៖ ស្រី​ស្អាត​សក់​ក្រហម នាង Anna Chapman ទើបបាន​ប្រើប្រាស់​បណ្ដាញ​សង្គម Twitter ដើម្បី​ស្នើសុំ រៀបការ​ជាមួយ Edward Snowden ជា​មនុស្ស​ដែល​កំពុង​ត្រូវបាន​តាម​ចាប់ខ្លួន ព្រោះតែ​បាន​បញ្ចេញ​ព័ត៌មាន​សម្ងាត់​ស្ដីអំពី​កម្មវិធី​តាមដាន​ពិភពលោក​របស់​រដ្ឋាភិបាល​អាមេរិក​។​ ​

នាង Anna Chapman ជា​អតីត​អ្នកស៊ើប​ការណ៍​សម្ងាត់រ​បស់​រុស្ស៊ី កាលពី​ម្សិលមិញ បាន​សរសេរ​យ៉ាងខ្លី​នៅលើ​ទំព័រ Twitter របស់ខ្លួន ៖ “Snowden , បង​ព្រម​រៀបការ​ជាមួយ​អូន ឬទេ​?”​។​ ​ដោយសារ​ជា​កូនស្រី​របស់​អ្នកការ​បរទេស​រុស្ស៊ី​ម្នាក់ នាង Chapman ត្រូវបាន​គេ​ចាប់អារម្មណ៍​យ៉ាងខ្លាំង​ពី​សំណាក់​ពិភពលោក នៅពេល​នាង​បែកធ្លាយ​អាថ៌កំបាំង​ជា​អ្នកស៊ើប​ការណ៍​សម្ងាត់រ​បស់​រុស្ស៊ី កាលពី​រដូវក្ដៅ ឆ្នាំ​២០១០​។ នាង​ធ្លាប់បាន​សារភាពថា ខ្លួន​ជា​អ្នកយកការណ៍​សម្ងាត់​ប​រទេស ហើយក៏​ត្រូវ​ចាប់​បញ្ជូនមក​រុស្ស៊ី រួម​និង​មនុស្ស ៩​នាក់​ផ្សេងទៀត ក្នុងការ​ដោះដូរ​អ្នកស៊ើប​ការណ៍ រវាង​រុស្ស៊ី និង​អាមេរិក​។ នៅ​អាមេរិក នាង Chapman មាន​សម្បក​ក្រៅ​ជា​បុគ្គលិក​អចលនទ្រព្យ នៅ​ក្រុង New York​។​ ​

បន្ទាប់ពី​ហេតុការណ៍​ខាងលើ នាង Chapman បាន​ក្លាយជា​អ្នកល្បីឈ្មោះ ក្នុងនាម​ជា​អ្នក​បង្ហាញ​ម៉ូដ និង​អ្នក​ឃោសនា​ឱ្យ​ធនាគារ​មួយ​នៅ​ក្រុង Moscow​។​ ​ចំណែក Edward Snowden អតីត​បុគ្គលិក​នៃ​ទីភ្នាក់ងារ​ស៊ើបការណ៍​សម្ងាត់​របស់​អា​មេ​រិ​ក ដែល​ធ្លាប់បាន​បញ្ចេញ​ព័ត៌មាន​អំពី​ការតាមដាន​បណ្ដា​ប្រទេស​ដោយ​សម្ងាត់​របស់​អាមេរិក បច្ចុប្បន្ន ស្ថិតនៅ​តំបន់​ព្រលានយន្ដហោះ​អន្ដរជាតិ Sheremetyevo​ក្នុង​ក្រុង Moscow ចាប់ពី​ថ្ងៃទី ២៣ មិថុនា​។ យោងតាម Wikileaks លោក Edward Snowden បានដាក់​ពាក្យសុំ​ជ្រោក​កោន​ទៅកាន់​ប្រទេស​ចំនួន ២១ រួចហើយ​៕ ​