ស្ត្រីអូស្ត្រាលី ធ្លាក់ក្នុងអន្លង់ ស្នេហ៍ជាមួយ ស្ពានបុរាណ ចំណាស់៦០០ឆ្នាំ
មានរឿងរ៉ាវមិនគួរឱ្យជឿថ្មីមួយទៀតបានធ្វើឱ្យមានការភ្ញាក់ផ្អើលយ៉ាងខ្លាំង គឺស្ត្រីជនជាតិអូស្ត្រាលីម្នាក់បានសម្រេចចិត្តរៀបអាពាហ៍ពិពាហ៍ជាមួយស្ពានបុរាណមួយដែលមានអាយុកាល៦០០ឆ្នាំ នៅភាគខាងត្បូងប្រទេសបារាំង ។តាមប្រភពព័ត៌មានពីកាសែតអង់គ្លេសចេញផ្សាយកាលពីថ្ងៃទី៧ កក្កដា ២០១៣ បានឱ្យដឹងថា ស្ត្រីជនជាតិអូស្ត្រាលីដែលរៀបការជាមួយស្ពាន មានឈ្មោះថា ជូឌី រ៉ូស មានមុខរបរជាអ្នកចម្រៀងមិនសូវល្បីឈ្មោះម្នាក់បានធ្លាក់ក្នុងអន្លង់ស្នេហ៍យ៉ាងជ្រៅជាមួយស្ពាន Le Pont du Diable រឺហៅថាស្ពាន The Devil’s Bridge ។
កញ្ញា ជូឌី រ៉ូស បានសរសេរនៅលើគេហទំព័ររបស់នាងឱ្យដឹងពីមូលហេតុដែលនាំឱ្យនាងធ្លាក់ចូលក្នុងអន្លង់ស្នេហ៍ជាមួយស្តានបុរាណនេះថា ខ្ញុំធ្លាប់បានធ្វើដំណើរមកកាន់ស្ពាននេះ កាលពី១០ឆ្នាំមុន ភាពរំញ័រនៃស្ពាន សំឡេងខ្យល់បក់, ភាពសង្ហារបស់ស្ពាន ភាពរឹងមាំ ធ្វើឱ្យខ្ញុំមានអារម្មណ៍ត្រេកត្រអាល ឃើញភ្លាមស្រឡាញ់ភ្លែត ហើយចង់រៀបការជាមួយស្ពាននេះតែម្តង ។
ដោយសារតែមិនអាចទប់ចិត្តបាន ខ្ញុំក៏សម្រេចចិត្តរៀបការជាមួយស្ពាននេះដោយមានមិត្តជិតស្និទ្ធចំនួន១៤នាក់ ព្រមទាំងមានអាជ្ញាធរក្នុងតំបន់ចូលរួម ហើយខ្ញុំក៏បានស្លៀកពាក់ឈុតកូនក្រមុំមានបាច់ផ្កា និងចិញ្ជៀនដែលមានរង្វង់មូល១ម៉ែត្រត្រៀមបំពាក់ឱ្យស្ពាននោះ។ ទោះបីជាមានការរៀបការបែបនេះក្តីក៏រដ្ឋាភិបាលបារាំងមិនទទួលស្គាល់និងចុះសំបុត្រអាពាហ៍ពិពាហ៍ឱ្យនាង ជូឌី រ៉ូស ជាផ្លូវការដែរ បើទោះជាថ្មីៗនេះប្រទេសបារាំងទើបតែទទួលស្គាល់អាពាហ៍ពិពាហ៍ភេទដូចគ្នាក៏ដោយ ។
ចំណែកកូនក្រមុំចម្លែករូបនេះនៅតែទទូចទាមទារដោយលើកឡើងថា អាពាហ៍ពិពាហ៍របស់នាងត្រូវតែមានភាពស្របច្បាប់ដូចគេឯងដែរ ។ ទាក់ទងទៅនឹងរាត្រីទឹកឃ្មុំ កញ្ញា ជូឌី រ៉ូស បានឱ្យដឹងថា ខ្ញុំពុំបានស្នាក់នៅជាមួយស្ពាននោះទេនៅពេលយប់ តែខ្ញុំបានថើបលាស្ពានមុននឹងខ្ញុំត្រឡប់មកផ្ទះវិញ ៕
