ឃុំខ្លួនឪពុកចុង កំហូចប៉ងរំលោភ កូនស្រី និងបំផ្លាញទ្រព្យ សម្បត្តិអ្នកដទៃ
ខេត្តស្វាយរៀង ៖ មានហេតុការណ៍ភ្ញាក់ផ្អើលមួយបានកើតឡើងកាលពីវេលាម៉ោង៤ទៀបភ្លឺ ថ្ងៃទី២៤ កក្កដា ២០១៣ នៅភូមិស្រះ ឃុំជ្រៃធំ ស្រុករមាសហែក ដោយបុរសម្នាក់ជាឪពុកចុងបានលបលួចទៅដេកជាមួយកូនស្រី(កូនស្រីប្តីមុន) តែត្រូវស្ត្រីជាម្តាយភ្ញាក់ដឹងខ្លួនទាន់ក៏ផ្ទុះជម្លោះផ្អើលអ្នកជិតខាងប្តឹងសមត្ថកិច្ចឱ្យជួយអន្តរាគមន៍ ក៏ត្រូវជននេះដេញកាប់ និងយកសាំងចាក់ដុតម៉ូតូសមត្ថកិច្ច១គ្រឿងម៉ាកយ៉ាម៉ាហាស៊ីរូសដែលមានដាក់ឯកសារមួយចំនួននៅក្នុងកែបម៉ូតូឆេះខ្ទេចអស់។
តាមសមត្ថកិច្ចបានឱ្យដឹងថា ឪពុកចុងកំហូចរូបនេះឈ្មោះកែវ ភក្តី អាយុ៣០ឆ្នាំ ជាកសិករ រស់នៅភូមិ-ឃុំកើតហេតុខាងលើ ប្រពន្ធឈ្មោះប៉ែន ម៉ៅ អាយុ៤៣ឆ្នាំ មានកូនស្រីឈ្មោះម៉ែន សោភ័ណ្ឌ អាយុ២១ឆ្នាំ (ជាកូនជាមួយប្តីមុន) ។ សមត្ថកិច្ចបានបន្តថា ឯកសារមួយចំនួននៅក្នុងកែបម៉ូតូត្រូវភ្លើងឆេះអស់មានបណ្ណត្រួតពិនិត្យក្របខណ្ឌលើកទី១ លើកទី២ និងលើកទី៣ ជារបស់លោកអនុសេនីយ៍ត្រី ពៅ សុគន្ធី នាយប៉ុស្តិ៍រដ្ឋបាលឃុំជ្រៃធំ និងអត្តសញ្ញាណបណ្ណជនជាតិខ្មែរស្ទួនចំនួន១៥សន្លឹក។
បច្ចុប្បន្នបុរសជាឪពុកចុងកំហូចរូបនេះកំពុងស្ថិតក្នុងការឃុំខ្លួនជាបណ្តោះអាសន្ននៅពន្ធនាគារខេត្តពិបទប៉ុនប៉ងមនុស្សឃាត និងបំផ្លាញទ្រព្យសម្បត្តិអ្នកដទៃ៕
