ឡានមួយកៀរ ឡានមួយកិនមនុស្ស ជិត៦០ម៉ែត្រ ស្លាប់ពីររបួសមួយ
បាត់ដំបង ៖ យ៉ាងហោចណាស់ក៏មានមនុស្សចំនួន២នាក់បានស្លាប់ក្នុងចំណោមមនុស្ស៣នាក់ដោយមាននារីម្នាក់បានអូសជាប់ទៅជាមួយកង់រថយន្តចំងាយប្រហែល៦០ម៉ែត្រ ដោយសារតែមានការប៉ះទង្គិចរវាងម៉ូតូជាមួយរថយន្ត១គ្រឿងហើយខ្ទាតមនុស្សចូលទៅក្រោមរថយន្តមួយគ្រឿងទៀតកាលពីព្រលប់ថ្ងៃទី២២ ខែកក្កដា ឆ្នាំ២០១៣ វេលាម៉ោង៦និង១០នាទីត្រង់ចំណុចភូមិក្បាលថ្នល់ ឃុំកំពង់ព្រៀង ស្រុកសង្កែ ខេត្តបាត់ដំបង តាមបណ្តោយផ្លូវជាតិលេខ៥។
ស្ត្រីម្នាក់ដែលជាអ្នកលក់ចាប់ហួយនៅទីនោះបាននិយាយថា នៅមុនពេលកើតហេតុគឺមានភ្លៀងធ្លាក់យ៉ាងខ្លាំង ហើយក៏មានម៉ូតូ១គ្រឿងម៉ាកណៃហត ពណ៌ខ្មៅ ជិះគ្នា៣នាក់បានចូលទៅជ្រកភ្លៀងនៅទីនោះដែរ។
ប្រភពដដែលបានបន្តថា ក្រោយពីដំណក់ភ្លៀងអន់ថយពួកគេទាំង៣នាក់បានចេញដំណើរបន្តដោយជិះម៉ូតូឆ្លងថ្នល់ឆ្ពោះទៅលិចដើម្បីទៅក្រុងបាត់ដំបង នៅក្នុងខណៈនោះដែរ ក៏មានរថយន្តម៉ាកកាមរីពណ៌ស១ គ្រឿងពាក់ស្លាកលេខភ្នំពេញ 2E 0743 បានបើកបរយ៉ាងលឿនក្នុងទិសដៅស្របគ្នាហើយបានកៀរទៅលើម៉ូតូបណ្ដាលឲ្យជនរងគ្រោះទាំង៣នាក់ខ្ទាតទៅកណ្ដាលថ្នល់ទាំងអស់ចំពេលដែលរថយន្តតូរីស១គ្រឿងពណ៌ស្លែ ពាក់ស្លាកលេខ បន្ទាយមានជ័យ2A 4495 កំពុងធ្វើដំណើរច្រាស់ទិសគ្នានោះមកដល់ល្មមហើយក៏បានបុកទៅលើមនុស្សទាំង៣នាក់នោះបណ្ដាលឲ្យដួលដេកក្នុងថ្លុកឈាមពេញផ្លូវ ដោយក្នុងនោះក៏មានស្ត្រីម្នាក់កល់ជាប់ពីមុខកង់ឆ្វេង ហើយអូសទៅជាមួយរថយន្តប្រហែល៦០ម៉ែត្រ ទើបរថយន្តអស់ល្បឿនក៏ឡើងកិនសពស្ត្រីនោះតែម្តង។
ជនរងគ្រោះទាំង៣នាក់គឺ១.ឈ្មោះ ម៉ែន ភារ៉ា ភេទប្រុសអាយុប្រហែលជាង៤០ឆ្នាំ រស់នៅក្រុងភ្នំពេញទំនងជាមន្ត្រីយោធា ព្រោះមានស្លៀកពាក់ឯកសណ្ឋានជាយោធា ហើយបានមកបើកភោជនីយដ្ឋាននៅក្នុងឃុំព្រៃខ្លូត ស្រុករុក្ខគិរី (ស្លាប់)២.ស្ត្រីដែលជាប់ជាមួយកង់រថយន្ត អត់ទាន់មានអ្នកណាស្គាល់អត្តសញ្ញាណឡើយអាយុប្រហែលជិត៤០ឆ្នាំ (ស្លាប់) និងទី៣.ឈ្មោះ ណើយ ស្រីម៉ៅ ភេទស្រីអាយុ២៦ឆ្នាំ ជាស្ត្រីមេម៉ាយ កូន២រស់នៅភូមិព្រៃដំរី ឃុំព្រៃតូចស្រុកមោងឬស្សី (របួសធ្ងន់)
ក្នុងនោះផងដែរ លោកប៉ែនថុលដែលជាអ្នកបើកបររថយន្តកាមរីបានធ្វើការបដិសេធថា រថយន្តរបស់លោកពុំមានការ ការប៉ះពាល់ជាមួយជនរងគ្រោះឡើយប៉ុន្តែសមត្ថកិច្ចបានរកឃើញ ស្នាមកៀរដោយដាច់រលាត់ថ្នាំនៅជាប់រថយន្ត។
ខណៈដែលសមត្ថកិច្ច ស្រុកសង្កែទៅដល់គឺអ្នកបើកបររថយន្តតូរីសបានរត់គេចខ្លួនបាត់ទៅហើយ ចំណែកស្ត្រីដែលរបួសក៏ត្រូវបានបញ្ជូនទៅកាន់មន្ទីរពេទ្យដើម្បីជួយសង្គ្រោះ រីឯសពបុរសដែលសង្ស័យថាជាមន្ត្រីយោធា ក៏ត្រូវបានសាច់ញាតិបងប្អូនមកទទួលយកត្រឡប់ទៅកាន់ក្រុងភ្នំពេញវិញ ដោយឡែកតែសពស្ត្រីដែលអត់ស្គាល់អត្តសញ្ញាណគឺបច្ចុប្បន្នត្រូវបានសមត្ថកិច្ចយកទៅតម្កល់ទុកក្នុងវត្តកាន់រទេះ ដើម្បីរង់ចាំបងប្អូនមកទទួលយកហើយចំពោះរថយន្តទាំង២និងម៉ូតូព្រមទាំងអ្នកបើកបររថយន្តកាមរី ក៏ត្រូវបានបញ្ជូនទៅការិយាល័យចរាចរផ្លូវគោកខេត្តផងដែរ៕ប្រភពពី កម្ពុជាថ្មី
