រថយន្តបុក រទេះអីវ៉ាន់ អូសស្រ្តីម្នាក់ ៥០០ម៉ែត្រ បុកម៉ូតូស្ទេប ស្លាប់ម្នាក់ របួសធ្ងន់ ៤នាក់
ភ្នំពេញ ៖ គ្រោះថ្នាកចរាចរណ៍ដ៏រន្ធត់មួយបានកើតឡើង នៅតាមបណ្តោយវិថីព្រះមុនីរ៉េត បណ្តាលឲ្យមនុស្សស្រីប្រុស ចំនួន ៤នាក់ ត្រូវរងរបួសធ្ងន់ធ្ងរ និងស្រ្តីម្នាក់បានស្លាប់បាត់បង់ជីវិត បង្កឡើងដោយសារបុរសម្នាក់ស្រវឹងស្រា ចេញ ពីក្លឹបបើករថយន្តស្ព័រ ១គ្រឿង ក្នុងល្បឿនលឿន ទៅបុករទេះដឹកក្រូចឆ្មានៅមុខវត្តស្ទឹងមានជ័យ ហើយបន្តបុកម៉ូតូ ស្ទេប នៅក្លឹបឡេហ្ស៊ី ក្នុងសង្កាត់ ស្ទឹងមានជ័យ ខណ្ឌមានជ័យ រួចរថយន្តបើករត់គេចដល់ចំណុចមុខសាកលវិទ្យាល័យ ភូមិន្ទកសិកម្មចំការដូង ជ្រុលបុកគំនរសំរាម ទៅមុខលែងរួច ។
ប្រភពព័ត៌មានពីសមត្ថកិច្ចមូលដ្ឋានបានឲ្យដឹងថា ហេតុការណ៍ភ្ញាក់ផ្អើលនេះបានបង្កឡើង កាលពីវេលាម៉ោង
២:៥០នាទីយប់រំលងអាធ្រាត្រ ឈានចូលថ្ងៃទី១៩ ខែកក្កដា ឆ្នាំ ២០១៣ ។
ប្រភពដដែលបន្តថា មុនពេលកើតហេតុបុរសម្នាក់ ឈ្មោះ សៀង រស្មីមុនី អាយុ ៤៧ឆ្នាំ ជាមេការទូទៅក្នុងក្លឹបស៊ីធី
ស្នាក់នៅភូមិខ្វា សង្កាត់ដង្កោ ខណ្ឌដង្កោ បានបើកបររថយន្តស្ព័រ ១គ្រឿង ពណ៌សពាក់ស្លាកលេខ ភ្នំពេញ ២V-
៤០០៣ ធ្វើដំណើរតាមបណ្តោយវិថីព្រះមុនីរ៉េត ពីកើតទៅលិច ក្នុងល្បឿនយ៉ាងលឿន ។
ខណៈពេលរថយន្តខាងលើមកដល់មុខវត្តស្ទឹងមានជ័យ រថយន្តក៏បានរេចង្កូតទៅបុករ៉ឺម៉កដឹកក្រូចឆ្មារ ១គ្រឿង ធ្វើឱ្យ
បុរសអ្នកបើករ៉ឺម៉ក ត្រូវបោកក្បាលនឹងថ្នល់ សន្លប់របួសធ្ងន់ និងស្រ្តីម្នាក់បានប៉ោងទៅទើរលើរថយន្តបង្ក បើកអូសពី
ចំណុចកើតហេតុជាង ៥០០ម៉ែត្រ ទើបធ្លាក់ពីលើរថយន្ត រងរបួសធ្ងន់ ។ បន្ទាប់មករថយន្តបង្កបានព្យាយាមបើករត់
ជ្រុលទៅបុកម៉ូតូស្តេប ១គ្រឿងទៀត ជិតទីស្នាក់ការនគរបាលប៉ុស្តិ៍ស្ទឹងមានជ័យ បណ្តាលឱ្យបុរសម្នាក់ និងស្រ្តីម្នាក់
រងរបួសបាក់ដៃបាក់ជើង ស្ថិតក្នុងស្ថានភាពធ្ងន់ធ្ងរ ហើយស្រ្តីម្នាក់ទៀតដែលរួមដំណើរជាមួយគ្នាត្រូវស្លាប់បាត់បង់ជីវិត
ពេលបញ្ជូនទៅដល់មន្ទីរពេទ្យ ។
ចំណែករថយន្តបង្កបានបន្តបើកអូសម៉ូតូស្តេប ពីចំណុចកើតហេតុជាង ៣គីឡូម៉ែត្ររហូតទៅដល់ចំណុចមុខខ្លោងទ្វារ
វត្តសំបួរមាស ក្នុងសង្កាត់ដង្កោ ខណ្ឌដង្កោ ទើបម៉ូតូខ្ទាតចេញពីរថយន្ត ហើយរថយន្តបង្កបានបន្តបើកគេចខ្លួន រហូត
ដល់មុខសាលាសាកលវិទ្យាល័យភូមិន្ទកសិកម្មចំការដូង បានរេចង្កូតជ្រុលទៅបុកគំនរសំរាម ទៅមុខលែងរួច ។
បន្ទាប់ពីបន្តដំណើរទៅមុខលែងរួច ជនបង្កខាងលើត្រូវបាននគរបាលប៉ុស្តិ៍ស្ទឹងមានជ័យដែលជិះម៉ូតូដេញតាមក្រោយ
បានចាប់បុរសអ្នកបើកបរ វាយខ្នោះយកទៅកាន់ទីស្នាក់ការ នគរបាលប៉ុស្តិ៍ស្ទឹងមានជ័យ រង់ចាំប្រគល់ឱ្យសមត្ថកិច្ច
ជំនាញដែលចុះធ្វើការវាស់វែងករណីគ្រោះថ្នាក់ចរាចរណ៍បុករះនេះ ដើម្បីនាំយកទៅឃុំខ្លួនបណ្តោះអាសន្ននៅការិយា-
ល័យចរាចរណ៍ជើងគោករាជធានីភ្នំពេញ ៕
