បាត់ម៉ូតូជាង១០ម៉ោង ម្ចាស់រកឃើញវិញ ចាប់ទាំងមនុស្សនិងម៉ូតូ
រាជធានីភ្នំពេញ ៖ ចោរស្រីម្នាក់ត្រូវម្ចាស់ម៉ូតូចាប់បានប្រគល់ឱ្យសមត្ថកិច្ចនគរបាលប៉ុស្តិ៍ស្ទឹងមានជ័យកាលពីវេលាម៉ោង២ និង៥៥នាទីរសៀលថ្ងៃទី២៤ កក្កដា ២០១៣ នេះ ស្ថិតនៅភូមិទ្រា សង្កាត់ស្ទឹងមានជ័យ ខណ្ឌមានជ័យ បន្ទាប់ពីធ្វើសកម្មភាពលួចម៉ូតូម៉ាកស្មាស់ជិះដើរលេងយ៉ាងរំភើយ ហើយត្រូវបានម្ចាស់ម៉ូតូប្រទះឃើញ ។
ចោរស្រីខាងលើនេះឈ្មោះមាស ចន្នី អាយុ១៩ឆ្នាំ មានទីលំនៅភូមិទ្រា សង្កាត់ស្ទឹងមានជ័យ ខណ្ឌមានជ័យ ។ ចំណែកឯម្ចាស់ម៉ូតូឈ្មោះសៀន វុទ្ធី អាយុ២០ឆ្នាំ មានទីលំនៅក្នុងសង្កាត់ស្ទឹងមានជ័យដូចគ្នា ។
គួរបញ្ជាក់ថា កាលពីវេលាទៀបភ្លឺថ្ងៃទី២៥ កក្កដា កន្លងមក នៅក្បែរស្តាម៉ាកតេលា ស្ថិតនៅតាមបណ្តោយផ្លូវមុន្នីរ៉េតក្នុងសង្កាត់ស្ទឹងមានជ័យ ម្ចាស់ម៉ូតូបានដេកលក់នៅទីនោះមួយភាំង ភ្ញាក់ឡើងក៏បាត់ម៉ូតូនោះតែម្តង ៕
