កំពុងរៀបការ និយាយឈ្មោះ សង្សារចាស់ កូនក្រមុំប្តឹងលែងលះ
ព្រឹត្តិការណ៍គួរឱ្យភ្ញាក់ផ្អើល និងមិននឹកស្មានដល់មួយបានកើតឡើងដោយសារតែកូនកំលោះរបូតមាត់និយាយហៅឈ្មោះសង្សារចាស់ខ្លួន ខណៈកំពុងរៀបការជាមួយកូនក្រមុំស្រស់ស្អាតម្នាក់ផ្សេងទៀត ហើយកូនក្រមុំកើតទុក្ខមិនសុខចិត្តបោះបង់ផ្កាចោលរត់យំខ្សឹកខ្សួលប្តឹងតុលាការសុំលែងលះបង្កឱ្យភ្ញៀវស្រឡាំងកាំងយ៉ាងខ្លាំង ។
បណ្តាញផ្សព្វផ្សាយបាននិយាយថា នាង Zhou Ting និងលោក Zhao Lei បានជួបគ្នា ហើយមានទំនាក់ទំនងស្នេហា ខណៈកំពុងសិក្សានៅសាកលវិទ្យាល័យមួយ ហើយពួកគេបានយល់ព្រមរៀបអាពាហ៍ពិពាហ៍នឹងគ្នា ដោយធ្វើឡើងនៅសណ្ឋាគារលំដាប់កំពូលមួយក្នុងទីក្រុងប៉េកាំង ប្រទេសចិន ។ ពិធីអាពាហ៍ពិពាហ៍នេះ មានគូស្វាមីភរិយាក្មេងៗជាច្រើនចូលរួមអបអរសាទរសប្បាយអឺងកង និងប្រកបដោយភាពរ៉ូមែនទិចមានលក្ខណៈបែបអឺរ៉ុប ។
អ្វីដែលធ្វើឱ្យភ្ញៀវចូលរួមក្នុងពិធីមង្គលការ ក៏ដូចជាកូនក្រមុំមានការភ្ញាក់ផ្អើល និងចម្លែកចិត្តនោះ គឺនៅពេលល្ងាចនៃពិធីសម្បថ កូនកំលោះ Zhao Lei បានបន្លឺវាចាសុំកូនក្រមុំ Zhou Ting រៀបការ ដោយមិនប្រើឈ្មោះ Zhou Ting នោះទេ ស្រាប់តែនិយាយឈ្មោះសង្សារចាស់របស់ខ្លួនទៅវិញ ថា «Xiao Ling តើអ្នកនឹងរៀបការជាមួយខ្ញុំទេ?» ។ ពាក្យនេះអ្នកណាក៏ឮដែរ ហើយដឹងថា Xiao Ling គឺជាសង្សារចាស់របស់ Zhao Lei និងជាស្នេហាដំបូងផងដែរ ហើយអ្នកទាំង២បានបែកគ្នាដោយសារតែនាង Xiao Ling ត្រឡប់ទៅរស់នៅក្រៅប្រទេស ។
គ្រាន់តែឮកូនកំលោះហៅឈ្មោះអតីតសង្សារជំនួសឈ្មោះខ្លួនដែលកំពុងរៀបការពេញច្បាប់ នាង Zhou Ting បានច្រានលោក Zhao Lei ខ្ទាតចេញ ហើយរត់ចេញទៅក្រៅសាលរៀបការ រួចទ្រហោយំជាខ្លាំង និងបានប្តឹងទៅតុលាការសុំលែងលះ ព្រោះតែនាងឈឺចាប់នឹងការក្បត់ទំនុកចិត្ត... មិនទាន់រៀបការចប់ផង កូនកំលោះហ៊ានបញ្ឈឺចិត្ត ក្បត់ចិត្តនាង (កូនក្រមុំ) នៅនឹងមុខទៅហើយ រឿងអីដែលត្រូវស៊ូទ្រាំរំលេចស្នាមញញឹមក្លែងក្លាយ ធ្វើដូចជាគ្មានរឿងអីកើតឡើងបាន?
ប៉ុន្មានថ្ងៃក្រោយមកមន្ត្រីខាងតុលាការយល់ថា អ្នកទាំង២ លោក Zhao និងនាង Zhou ពិតជាបានស្រឡាញ់គ្នាចិត្តនឹងចិត្ត និងមានទំនាក់ទំនងស្រស់ស្អាត ដូច្នេះតុលាការមិនសម្រេចឱ្យលែងលះទេ ដោយព្យាយាមសម្របសម្រួល ហើយជាមួយគ្នានេះខាងក្រុមគ្រួសារ និងមិត្តភក្តិរបស់អ្នកទាំង២បានព្យាយាមសម្របសម្រួលយ៉ាងស្វិតស្វាញ និងបានស្នើសុំឱ្យកូនក្រមុំដកពាក្យបណ្តឹងវិញ ព្រោះជាកំហុសអចេតនាលើកដំបូងរបស់ Zhao Lei ពេលនោះពាក្យបណ្តឹងក៏ត្រូវបានដកចេញ ហើយអ្នកទាំង២ក៏យល់ព្រមរួមរស់ជាមួយគ្នា។ នេះចាត់ទុកជាមេរៀនមួយផងដែរ សម្រាប់កូនកំលោះ កូនក្រមុំផ្សេងទៀតដែលរៀបអាពាហ៍ពិពាហ៍កុំសូវនិយាយអ្វីផ្តេសផ្តាសពេក ។ សូមជូនពរឱ្យអ្នកទាំង២នេះរស់នៅជាមួយគ្នាមានសុភមង្គលជារៀងរហូត ៕
