សង្ឃថៃមួយអង្គរង ការចោទប្រកាន់ថា បានកិបកេងមាសជាង ៩តោនទៅទិញ ឡានទំនើប ភូមិគ្រឹះ យន្តហោះឯកជន និង វត្ថុមានតមៃ្លផ្សេងទៀត
ប្រទេសថៃ៖ ក្រុមសង្ឃ ៤០អង្គ នៃវត្តមួយ ក្នុងសង្កាត់ Tahwi Walthana រួមជាមួយសកម្មជន Songkran Atchariyasup បានបញ្ជូនពាក្យ បណ្តឹង១ច្បាប់ ទៅឲ្យ គណៈកម្មាធិការបង្កាឧក្រិដ្ឋកម្ម DSI ដោយចោទប្រកាន់ថា សង្ឃ Phra Wirapol បានកិបកេងយកមាស ដែល ជាបច្ច័យចំនួន ៩០០០ គីឡូក្រាម ហើយចោទប្រកាន់បន្ថែមថា សង្ឃអង្គនេះ បានបោកប្រាស់ពលរដ្ឋបរិច្ចាគធនធាន ដើម្បីគំរោងសាងសង់អគារ សម្រាប់ព្យាបាលជំងឺ សម្រាប់ព្រះសង្ឃដែលមានឈ្មោះថា មន្ទីរពេទ្យ Roi Et -សំណងមួយដែលពុំមានសាងសង់ឡើយ។ ចំណែកអ្នកលក់ដូរគ្រឿងអលង្ការថៃ ក៏បានប្តឹងសង្ឃ Phra Wirapol មិនទូទាត់សងគ្រឿងអលង្ការ ដែលមានតម្លៃសរុបដល់ទៅ ២០០ លានបាត។ ខណៈពេលនោះដែរ លោក Seehanat Prayoonrat អគ្គលេខាធិការស្ថាប័នប្រឆាំងការលាងលុយថៃ (Amlo) ឲ្យដឹងថា ពួកគេកំពុងសង្ស័យថា សង្ឃ Phra Wirapol មានគណនី ២ នៅអាមេរិក និងភូមិគ្រឹះ១ខ្នង នៅកាលីហ្វ័រញ៉ា (អាមេរិក)។
ដោយឡែក តាមការបង្ហើបឲ្យដឹងពីលោក Piya Tregalnon នាយកមជ្ឈមណ្ឌលអាកាសចរណ៍បាងកក ដែលជាកន្លែងសង្ឃ Phra Wirapol ច្រើនទាក់ទងជួលយន្តហោះជិះឯកជន ឲ្យដឹងថា ទ្រព្យសម្បតិ្តរបស់សង្ឃអង្គនេះ “សម្បើម” ជាងចំនួនខាងលើឆ្ងាយណាស់ ។
លោកពោលថាៈ “៣ ឆ្នាំកន្លងហើយ ខ្ញុំតែងសញ្ជឹងគិតថា ហេតុអ្វីសង្ឃអង្គនេះ មានលុយកាក់ និងទ្រព្យសម្បត្តិច្រើនម្ល៉េះ ហើយថែមទាំងពុំមែនជាសង្ឃដែលល្បីល្បាញផង… នៅពេលដែលគាត់ត្រូវគេបកអាក្រាត ខ្ញុំសម្រេចចិត្តត្រូវនិយាយថា រឿងរ៉ាវគ្រប់យ៉ាង ព្រោះខ្ញុំគិតថា ការមានបានរបស់គាត់ ពិតជាគួរឲ្យសង្ស័យណាស់”។ តាមលោក Piya ដដែល នោះសង្ឃ Phra Wirabol ជានិច្ចកាល សងជាសាច់ប្រាក់ ៣០០.០០០ បាត សម្រាប់ការជួលយន្តហោះម្តងៗ ហើយពេលណា ក៏តែងយកចិត្តទុកដាក់រឿងទិញយន្តហោះឯកជន។
នៅថៃ យន្តហោះថ្មីមានតម្លៃពី ៥០០ លាន ទៅ ៧០០ លានបាត ហើយបើបានប្រើប្រាស់ហើយ គឺមានតម្លៃប្រមាណ ១០០ លានបាត។ មានម្តងនោះ សង្ឃអង្គនេះ បានដកបង្ហាញលុយដុល្លារក្រដាស ១០០ រាប់សិបដុំ ហើយនិយាយប្រាប់លោក Piya ថា នៅក្នុងស្បោង (ថង់យាម) មានទាំងដុំមាសទៀតផង។ ក្រៅពីនោះ ក៏នៅមានសៀវភៅសែក ២ ក្បាល ដែលបោះពុម្ភឈ្មោះ Phra Wirapol របស់ធនាគារអាមេរិក ហើយអួតថា ខ្លួនអាចដកសាច់ប្រាក់ម្តងបាន ១០ លានដុល្លារ ពីសែក១ច្បាប់ ព្រោះខ្លួនមានលុយផ្ញើនៅធនាគារច្រើនណាស់។
លោក Piya ប្រាប់បន្ថែមថា Phra Wirapol តែងបង្ហាញមោទនៈភាព នឹងកំពូលរថយន្តរបស់ខ្លួនដូចជាៈ Maybach, Mercedes-Benz 500 BMW X6 និង Mini Copper -ទាំងអស់នោះ សម្រាប់ជិះលេងក្នុងវត្ត ។ លើសពីនោះទៀត Phra Wirapol និយាយថា ខ្លួនមានទាំងនាវាកំសាន្តទៀតផង។ ថ្មីៗនេះ នេន១អង្គដែលជាដៃជើងរបស់សង្ឃអង្គនេះ បានឆ្លើយប្រាប់ DSI ថា Phra Wirapol តែងផឹកស្រា, ប្រើប្រាស់គ្រឿងញៀន ហើយរួមភេទជាមួយនារីៗជាអានិតិជនទៀតផង។
មិនទាន់អស់ទេ! សង្ឃបរាជិករូបនេះ កំពុងប្រឈមមុខនឹងបណ្តឹងរបស់ស្ត្រីម្នាក់ថា នាងត្រូវបានសង្ឃអង្គនេះ រំលោភពេលនាងមានអាយុទើប ១៥ ឆ្នាំ ហើយកូនប្រុសអាយុ ១១ ឆ្នាំ របស់នាង គឺជាកូនរបស់សង្ឃអង្គនេះ។ វរៈសេនីយ៍ទោប៉ូលីស Pong-in Intarakhao នៃស្ថាប័ន DSI ប្រាប់ថា ពួកគេមានភស្តុតាងគ្រប់គ្រាន់ ដើម្បីបញ្ជាក់ពីទង្វើរលាមកទាំងឡាយរបស់ Phra Wirapol ហើយ៕
ប្រភពពីTechnology 2day
