ឪពុកយំស្រណោះ កូនអាយុ3ឆ្នាំត្រូវ គេចាប់ពង្រត់
លោកតាអាយុ៩៦ឆ្នាំជនជាតិឥណ្ឌា ក្លាយជាមនុស្សល្បីនៅទូទាំងពិភពលោក ជាឪពុកមានអាយុច្រើនបំផុត ហើយជួបរឿងអកុសល ព្រោះកូនប្រុសច្បងរបស់គាត់ត្រូវគេលួចយកទៅបាត់អស់រយៈពេលជាង៥០ថ្ងៃហើយ ។ លោកតា រា៉មជិត រា៉ហាហ្វ ដែលមានប្រពន្ធឈ្មោះ សាគុន តាឡា អាយុ៦០ឆ្នាំ រៀបរាប់ថា ប្រពន្ធរបស់គាត់បានទៅមន្ទីរពេទ្យក្បែរផ្ទះ ព្រោះមានជំងឺផ្តាសាយ ហើយបានគេងលក់១៥នាទីនៅស្ថានីយរថយន្តដឹកអ្នកដំណើរ ដោយមានកូនប្រុសឈ្មោះវីក្រាមជីត អាយុ៣ឆ្នាំ ស្ថិតនៅក្នុងដៃ ប៉ុន្តែក្រោយពីភ្ញាក់ពីដំណេក ស្រាប់តែបាត់កូន ។
មានរយៈពេលជាង៥០ថ្ងៃហើយ ដែលកូនប្រុសរបស់លោកតារា៉មជីត រា៉ហាហ្វ បាត់ខ្លួន និងនៅតែរកមិនឃើញ ។ គេសន្និដ្ឋានថា ក្មេងប្រុសនោះអាចត្រូវក្រុមជនពាលចាប់យកទៅជួញដូរឱ្យធ្វើជាអ្នកសុំទាន ឬអាចត្រូវគេចាប់ពង្រត់ ។ប៉ូលិសមូលដ្ឋាននិយាយថា ពួកគេបានផ្ញើរូបថតក្មេងប្រុសដល់ប៉ូលិសនៅទូទាំងប្រទេសជួយតាមរក ប៉ុន្តែគ្មានតំរុយទេ ។ ចំណែកលោកតារា៉មជីត ជាឪពុកក្មេងប្រុសនោះដែលមានកូនប្រុសទី២ អាយុ៩ខែ បាននិយាយថា គាត់នៅតែបន្តរកកូនរបស់គាត់ទៀតរហូតដល់រកឃើញ ៕
