ប្រកាស រឿងនាងក្អយ ជួលរថយន្ត គេជិះហើយស៊ីដាច់ នៅថ្ងៃទី១២ កក្កដាខាងមុខ
រាជធានីភ្នំពេញ៖ សំណុំរឿងនាង ជួន ចាន់រតនា (ហៅក្អយ) ជួលរថយន្តគេជិះរួចយកទៅបញ្ចាំបាត់កាលពីអំឡុងឆ្នាំ២០១១កន្លងទៅ បានត្រូវសាលាដំបូងរាជធានីភ្នំពេញបើកសវនាការជំនុំជម្រះចំនួន២ករណីជាបន្តបន្ទាប់ ដោយកំបាំងមុខជនជាប់ចោទ នៅរសៀលថ្ងៃទី២៦ ខែមិថុនា ឆ្នាំ២០១៣ ប៉ុន្តែសាលក្រមត្រូវប្រកាសនៅថ្ងៃទី១២ ខែកក្កដា ឆ្នាំ២០១៣ ។
សំណុំរឿងទី១ លេខ១៣៨៣ ចុះថ្ងៃទី១០ ខែឧសភា ឆ្នាំ២០១១ មានដើមបណ្តឹងឈ្មោះ ទៀង គង់ និងសំណុំរឿងទី២ លេខ ១៩៦២ ចុះថ្ងៃទី២៧ ខែមិថុនា ឆ្នាំ២០១១ មានដើមបណ្តឹងឈ្មោះហ៊ី ប៉េងគ្រី។
ក្នុងសំណុំរឿងទី១ ដើមបណ្តឹងបានចោទប្រកាន់ថា កាលពីថ្ងៃទី១៩ ខែធ្នូ ឆ្នាំ២០១០ នាងក្អយបានជួលរថយន្តម៉ាកឡិចស៊ីស RX300 មួយគ្រឿងជិះ ក្នុងកិច្ចសន្យារយៈពេល៤ខែ ប៉ុន្តែនៅថ្ងៃទី១៩ ខែមេសា ឆ្នាំ២០១១ នាងក្អយ បានយករថយន្តនោះទៅបញ្ចាំក្នុងតម្លៃ៨០០០ដុល្លារអាមេរិក។ ក្រោយមកសមត្ថកិច្ចបានឃាត់ខ្លួនអ្នកទទួលបញ្ចាំ និងដកហូតរថយន្តនោះបាន ទើបបែកធ្លាយដល់ដើមបណ្តឹងថា នាងក្អយ បានយករថយន្តនេះទៅបញ្ចាំ។
ដោយឡែកក្នុងសំណុំរឿងទី២ ដើមបណ្តឹងបានចោទប្រកាន់ថា កាលពីថ្ងៃទី១៧ ខែតុលា ឆ្នាំ២០១០ នាងក្អយ និងបុរសម្នាក់ឈ្មោះ លីវ រ៉ាម៉ូ បានលក់រថយន្តមួយគ្រឿងក្នុងតម្លៃ១៥០០០ដុល្លារ។ ក្រោយមកនៅថ្ងៃទី២ ខែមីនា ឆ្នាំ២០១១ ដើមបណ្តឹងបានយករថយន្តនេះទៅលក់បន្តឲ្យឈ្មោះ ហ៊ែល ក្នុងតម្លៃ១៥៤៥០ដុល្លារ ប៉ុន្តែក្រោយមកបែកធ្លាយថារថយន្តនេះមានបញ្ហា ដោយនាងក្អយ បានជួលរថយន្តគេមកជិះប៉ុណ្ណោះ ដូច្នេះទើបដើមបណ្តឹងបានទៅសួរនាំពីបញ្ហានេះ ហើយនាងក្អយក៏បានចេញហ្សែកមួយសន្លឹកតម្លៃ១៥៤៥០ដុល្លារ តែពេលដើមបណ្តឹងទៅបើកនៅធនាគារ គឺពុំមានទឹកប្រាក់គ្រប់គ្រាន់នោះទេ។
មេធាវីឈ្មោះ តាំង ម៉េងស្រូយ តំណាងឲ្យដើមបណ្តឹងឈ្មោះ ហ៊ី ប៉េងគ្រី បានទាមទារប្រាក់១៥៤៥០ដុល្លារ និងជំងឺចិត្ត ១៥០០០ដុល្លារ ព្រមទាំងសូមឲ្យតុលាការផ្តន្ទាទោសនាងក្អយ និងគូកនតាមច្បាប់៕ ប្រភព ann
