ទឹម រដ្ឋា បរិយាយពីជីវិតពិត មុននិងក្រោយ ចូលសិល្បៈ
រាជធានីភ្នំពេញ៖ តារាសម្តែង និងជាតារាម៉ូដែល រាងខ្ពស់ស្រឡះ កញ្ញា ទឹម រដ្ឋា ក្រោយពីបានបន្សាត់ខ្លួនចូលសិល្បៈជិត១០ឆ្នាំមក នាងទទួលបានភាពជោគជ័យគួរឲ្យកត់សម្គាល់ជាមួយនឹងអាជីពដើរម៉ូដ សម្តែង និងធ្វើជាពិធីការិនី ខណៈដែលមានរូបសម្បត្តិដ៏ស្រស់ស្អាត ជាអំណោយពីធម្មជាតិផងនោះ បានស្ទួយឲ្យនាងមានភាពលេចធ្លោយ៉ាងឆាប់រហ័សក្នុងពិភពសិល្បៈ។
ការបោះជំហានចូលវិថីសិល្បៈរបស់តារាមួយចំនួន គឺផ្តើមចេញពីប្រវត្តិមិនដូចគ្នានោះទេ ជាក់ស្តែងដូចជាតារាដើរម៉ូដ និងជាពិធីការិនីកញ្ញា ទឹម រដ្ឋា ជាដើម នាងបានផ្តើមចេញពីអ្នករត់តុម្នាក់នៅក្នុងហាងលក់គុយទាវមួយ ដែលជាហាងម្តាយរបស់នាងផ្ទាល់។ លុះក្រោយមក នាងបានបន្សាត់ខ្លួនចូលប្រឡូកសិល្បៈតាមរយៈការប្រលងកញ្ញាឯកប្រីសស្តុន ហើយទទួលបានជ័យលាភីលេខ២ ។
កញ្ញា ទឹម រដ្ឋា បានរៀបរាប់ឲ្យដឹងថា នាងមានស្រុកកំណើតនៅខេត្តបាត់ដំបង ជាកូនច្បងនៅក្នុងគ្រួសារ ដែលមានបងប្អូន៣នាក់ ស្រី២ ប្រុស។ នាងមានឪពុលឈ្មោះ អាន វណ្ណា អាយុ៤៨ឆ្នាំ មានមុខរបរជាទាហាន ឈរជើងនៅគីរីរម្យ និងមានម្តាយឈ្មោះ ផាន់ ឌៀម អាយុ៤៧ឆ្នាំ ជាមេផ្ទះ អតីតជាអាជីវករ។
កញ្ញា ទឹម រដ្ឋា បានបោះបង់ការសិក្សានៅថ្នាក់ទី១១ បន្ទាប់ពីឪពុកម្តាយផ្លាស់មករកស៊ីនៅរាជធានីភ្នំពេញ ជាមួយនឹងលោកឪពុក ដែលត្រូវគេផ្លាស់ទីតាំងក្នុងក្របខណ្ឌការងារ។ នាងបានបន្តឲ្យដឹងទៀតថា នាងក៏ធ្លាប់ជាអ្នករត់តុគុយទាវ កាហ្វេ ម្នាក់ដែរ ខណៈដែលម្តាយរបស់នាងបានបើកហាងលក់បបរ គុយទាវ និងកាហ្វេ នៅម្តុំផ្សារចោមចៅ និងក្រោយមក ឪពុកម្តាយនាងបានផ្លាស់លំនៅដ្ឋាន និងមកលក់គុយទាវ កាហ្វេ នៅម្តុំផ្សារ សេនជូរី ពោធិ៍ចិនតុងវិញ។
ដោយបានជំរុញ និងលើកទឹកចិត្តពីបងប្អូន មិត្តភក្តិ នាងក៏បានសម្រេចចិត្តចូលរួមប្រលងកញ្ញាឯកប្រីសស្តុន ហើយទទួលបានជ័យលាភីលេខ២ ។ ប៉ុន្តែតំណែងនេះ បានត្រឹមតែជួយឲ្យនាងបានសម្តែងតួរាយរងក្នុងឈុតខារ៉ាអូខេតិចតួចប៉ុណ្ណោះ។ លុះដល់ឆ្នាំ២០០៥ នាងបានសម្រេចចិត្តចូលរួមប្រលងក្នុងកម្មវិធី ស្រីស្រស់ ប្រុសស្អាតម្តងទៀត របស់ស្ថានីទូរទស្សន៍ស៊ីធីអិន ដោយជាប់តំណែងជាស្រីស្អាតប្រចាំនៅរាជធានីភ្នំពេញ។
ផ្តើមចេញពីចំណុចនេះ ទើបធ្វើឲ្យតារារូបនេះ មានសំណាងបានសម្តែងចម្រៀងខារ៉ាអូខេក្នុងបទ “ចាំទាំងត្រដរ” របស់តារាចម្រៀងសម្បូររោមដើមទ្រូង គឺលោក ឆន សុវណ្ណរាជ ក្នុងដើមឆ្នាំ២០០៩ ។ បន្ទាប់ពីនោះ នាងបានក្លាយជាតារាលំដាប់ជួរមុខយ៉ាងឆាប់រហ័ស ក្រោយពីមានមុខសម្តែងតួឯកផ្ទួនៗ ក្នុងរឿងភាគ។
ចាប់តាំងពីឆ្នាំ២០០៩ និងក្រោយពីជាប់ឈ្មោះជាតារាបង្ហាញម៉ូដនៅក្នុងក្រុម camboodia soper modell ទើបនាងមានឱកាសសម្តែងភាពយន្តជាបន្ទបន្ទាប់បានជាង១០រឿង។ ខ្សែរឿងដែលតារារូបនេះបានសម្តែង រួមមាន “ប្រពន្ធខ្មោច” ដែលជារឿងបើកអាជីពសម្តែងរបស់នាងនៅចុងឆ្នាំ២០០៩ និងរឿងបន្តបន្ទាប់ មានដូចជា រឿង “រាមកេរ្តិ៍”, រឿង “នគរស្រីលវោ” ជាដើម។ កញ្ញា ទឹម រដ្ឋា បានសំដែងជាតួឯកលើកដំបូងក្នុងរឿង “ដងស្ទឹងទឹកភ្នែក” ប៉ុន្តែមហាជនតិចតួចណាស់ ដែលកត់សម្គាល់ចំពោះការសម្តែងរបស់នាងនាពេលនោះ។ ក្រោយមក តារារូបនេះ ទើបចាប់ផ្តើមល្បីសុះសាយនៅចុងឆ្នាំ២០០៩ ប៉ុណ្ណោះ តាមរយៈការសម្តែងខ្សែរឿងភាគ ក្នុងរឿង “ខ្ញុំជាអ្នណា?” ,រឿង “ដងវិថីតារា” រឿង “ផ្កាក្នុងផ្កា” និងរឿងចុងក្រោយ “អ្នកមានគុណ” ដោយនាងសម្តែងជាតួអង្គកាចឆ្នាសឆ្នើម។ នៅពេលថ្មីៗនេះដែរ នាងបានក្លាយជាពិធីការិនីទូរទស្សន៍ ក្នុងកម្មវិធី “រង្វាន់១ម៉ឺនប្រាំពាន់ដុល្លារ”៕
Resource by : khmerstation.com
