អ្នកគ្រប់គ្រងមូស្លីម ធ្វើការព្រមានទៅលើនារីៗ ដែលស្លៀកពាក់សិចស៊ី ឬខ្លីៗ

ជាធម្មតានៅក្នុងរដូវក្ដៅ មនុស្សម្នាតែងតែស្លៀកពាក់អ្វី ដែលស្ដើងៗ ឬខ្លីៗដើម្បីកាត់បន្ថយកម្ដៅ តែសម្រាប់អ្នកគ្រប់គ្រងមូស្លីម Tyumen Oblast នៅក្នុងទីក្រុង Tyumen ប្រទេសរុស្សី ដែលមានឈ្មោះថា Fatyh Garifullin បានធ្វើការព្រមានទៅលើនារីៗ ដែលចូលចិត្ដស្លៀកបញ្ចេញសាច់ទៅវិញ។
យោងទៅតាមសារព័ត៌មានបរទេស បានឲ្យដឹងថា លោក Fatyh Garifullin បានធ្វើការបកស្រាយ ក៏ដូចជាដាស់តឿនដល់នារីវ័យក្មេងគ្រប់គ្នាថា វាពិតជាសំខាន់ណាស់ ដែលយើងត្រូវការពារខ្លួនយើង ដើម្បីឲ្យមានសុវត្ថិភាព ដូចនេះនារីគ្រប់រូបមិនគួរណា ស្លៀកពាក់សិចស៊ី ឬ ខ្លីនោះទេ។ ដោយសារតែការស្លៀកពាក់បែបនេះ អាចបង្វក់ចិត្ដបុរស ដែលអាចធ្វើឲ្យអ្នកទាំងនោះ បាត់បង់ភាពជាម្ចាស់ការបានយ៉ាងងាយស្រួល ហើយហេតុការណ៍អាក្រក់នឹងអាច កើតមានឡើងគ្រប់ពេលវេលា។ លោកបានបន្ដថា កាលពីសប្ដាហ៍មុន លោកបានធ្វើដំនើរទៅកាន់អេស៊ីប ដែលនៅទីនោះ មានសីតុណ្ហភាព លើសពី ៣០អង្សាសេ តែនារីនៅទីនោះ នៅតែស្លៀកសំពត់វែង បើប្រៀបផ្ទឹមនឹងនៅទីនេះ គឺខុសគ្នាស្រឡះ ដោយបែរជាស្លៀកសំពត់ខ្លីៗ ជាពិសេសបញ្ចេញស្នាមសាក់ នៅលើស្មានិងផ្នែកខាងក្រោយថែមទៀត។
តើប្រិយមិត្ដយល់ស្រប នឹងគំនិតរបស់អ្នកគ្រប់គ្រងនេះ ដែរ ឬទេ?