Apple និង Samsung ជិតឡើងកម្តៅដូចនៅឧបទ្វីបកូរ៉េ
សង្គ្រាមដណ្តើមទីផ្សាររវាង Apple និង Samsung ជិតផ្ទុះឡើងហើយ ខណៈ Samsung បានប្រកាសថានឹងបើកហាងដៃគូចែកចាយផលិតផលរបស់ខ្លួនជាច្រើនទៀត នៅលើទឹកដីរបស់អាមេរិកនាពេលឆាប់ៗខាងមុខ។
ក្រុមហ៊ុនអេឡិចត្រូនិករបស់កូរ៉េខាងត្បូង Samsung បានឲ្យដឹងក្នុងសេចក្ដីថ្លែងមួយថា នៅថ្ងៃទី ០៨ មេសា ខាងមុខ ក្រុមហ៊ុន នឹងបើកហាង Samsung Experience Shops ចំនួន ៥០០ កន្លែងក្នុងក្រុមហ៊ុន Best Buy នៅអាមេរិក។
កន្លងមក Samsung បានទទួលរងការប្ដឹងផ្ដល់យ៉ាងច្រើនរបស់ Apple ពីបទរំលោភសិទ្ធិប៉ាតង់ និងបានផ្ដល់ប្រាក់សំណងរាប់លានដុល្លារដល់ក្រុមហ៊ុន Apple។ តើនេះឬដែលបានជំរុញឲ្យ Samsung សងសឹក តាមរយៈពង្រីកទីផ្សារឲ្យកាន់តែធំ ដើម្បីប្រកួតប្រជែងជាមួយ Apple នៅអាមេរិកដែលជាមូលដ្ឋានរបស់ក្រុមហ៊ុនរូបផ្លែប៉ោមមួយនេះ?
លោក Ketrina Dunagan អនុប្រធានផ្នែកទីផ្សាររបស់ Samsung និយាយថា ក្រុមហ៊ុនរបស់លោកនឹងជួលបុគ្គលិកបន្ថែម ដើម្បីត្រៀមលក្ខណៈបង្ហាញមុខងារពិសេសៗ របស់ Smartphone ជំនាន់ថ្មី Galaxy S4 ដែលនឹងមានលក់ក្នុងពេលឆាប់ៗនេះ រួមទាំងផលិតផលមួយចំនួនទៀតដូចជា ទូរទស្សន៍, កុំព្យូទ័រយួរដៃ និង Tablet ជាច្រើនទៀតជាដើម។
កាលពីឆ្នាំទៅមិញ អត្រាលក់ ទូរសព្ទ Smartphone ទូទាំងពិភពលោកបាន ៥៤៥,២លានគ្រឿងដណ្ដើមទីផ្សារបាន៤០ ភាគរយ។ នេះបើផ្អែកតាមការវិភាគរបស់ក្រុមហ៊ុន IDC។ ចំណែកក្រុមហ៊ុនវិភាគ ComScore កាលពីថ្ងៃទី ០៦ ខែ មីនា បង្ហាញថា ទោះបីជាមានប្រជាប្រិយភាពលើទីផ្សារពិភពលោកមែន ប៉ុន្តែ Smartphone ក្រុមហ៊ុនកូរ៉េខាងត្បូងនេះ មិនអាចងើបរួចជាមួយ Smartphone របស់ Apple នៅទីផ្សារអាមេរិកទេពោលគឺមានចំណែកទីផ្សារត្រឹមតែ ២១ ភាគរយ ប៉ុណ្ណោះខណៈគូប្រជែង Apple មានរហូតដល់ ៣៨ ភាគរយ។
ចំណែកឯ Apple មានប្រតិកម្មតបយ៉ាងណាដែរលើការពង្រីកខ្លួនរបស់គូបដិបក្ខ? Apple ដែលមានទីតាំង (ហាង)ជាង ៤០០ កន្លែងលើពិភពលោក (ក្នុងនោះមាន ១៥០ ហាងនៅក្រៅប្រទេស) ហាក់មិនទាន់មានប្រតិកម្មនៅឡើយទេ ហើយបានបដិសេធមិននិយាយអ្វីទាំងអស់។
តើម្ដងនេះ Apple នឹងមានវិធានការណ៍បែបណាដើម្បីតទល់ និង Samsung? លើកនេះ Samsung ពិតជាបង្កើតព្យុះភ្លៀងពន្លិច Apple ឬយ៉ាងណា? ចុះប្រិយមិត្តយល់ថា Samsung អាចដណ្ដើមទីផ្សារអាមេរិកពី Apple បានដែរឬទេ?
