ក្រុមហ៊ុនចិន Pipo ចេញយុទ្ធសាស្ត្រវាយលុកទីផ្សារ SmartWatch តម្លៃតែ ៣២ដុល្លារមិនធ្លាប់មាន
ស្របពេលបណ្ដាក្រុមហ៊ុនអេឡិចត្រូនិកធំៗកំពុងផលិត និងចេញលក់នាឡិកាដៃឆ្លាតវៃ (SmartWatch) អមដោយបច្ចេកវិទ្យា និងមុខងារពិសេសៗ ជាមួយតម្លៃរាប់រយដុល្លារនោះ ចំណែកពេលនេះ ក្រុមហ៊ុន Pipo ដែលមានមូលដ្ឋាននៅចិន បានប្រើយុទ្ធសាស្ត្រចេញលក់ SmartWach របស់ខ្លួនក្នុងតម្លៃយ៉ាងធូរថ្លៃត្រឹមតែ ៣២ដុល្លារប៉ុណ្ណោះ។
នាឡិកាដៃឆ្លាតវៃដែលមានឈ្មោះ Pipo C2 នេះមិនដំណើរការដោយប្រព័ន្ធប្រតិបត្តិការ Android Wear របស់ Google ទេ តែបានភ្ជាប់មកជាមួយមុខងារអាចវាស់ចម្ងាយផ្លូវដែលអ្នកបានដើរ និងចំនួនជំហានជើង ក៏ដូចជាល្បឿននៃការធ្វើដំណើរជាដើម។ Pipo C2 ថែមទាំងមានមុខងារអាចធ្វើជាតេឡេបញ្ជា (remote control) ឧបករណ៍មួយចំនួនក្នុងផ្ទះទៀតផង។ Pipo C2 អាចភ្ជាប់ជាមួយស្មាតហ្វូន (Smartphone) តាម bluetooth ដែលអាចបង្ហាញ notification ផ្សេងៗពីទូរស័ព្ទមកលើអេក្រង់នាឡិកានេះបាន។
យ៉ាងណា ក្រុមហ៊ុន Pipo មិនទាន់ប្រកាសឱ្យដឹងពីពេលវេលាដែលនឹងចេញលក់នាឡិកា SmartWatch តម្លៃធូរថ្លៃរបស់ខ្លួនលើទីផ្សារទូទាំងពិភពលោកនៅឡើយទេ ប៉ុន្តែអាចនឹងចេញលក់ដំបូងនៅក្នុងប្រទេសចិនក្នុងពេលឆាប់ៗខាងមុខ៕
ប្រែសម្រួល៖ លី ឈៀន
ប្រភព៖ liliputing
