ឧបទ្ទវហេតុយន្តហោះធ្លាក់ពាក់ព័ន្ធនឹងការធ្វើអត្តឃាតរបស់អ្នកបើកបរមានច្រើនករណី
ករណីបាត់ខ្លួនយន្តហោះMH370 បានធ្វើឲ្យពិភពលោកនៅតែបន្តតាមដាន ត្បិតអីអ្នកជំនាញនៅមិនទាន់រកឃើញបំណែកយន្តហោះនោះនៅឡើយ បើទោះបីជាបានរុករកអស់ពេលមួយឆ្នាំហើយក្តី។
ជុំវិញមូលហេតុបណ្តាលឲ្យមានសោកនាដកម្មនេះកើតឡើង គេមិនទាន់អាចវាយតម្លៃច្បាស់លាស់នៅឡើយទេ ប៉ុន្តែមានអ្នកវិភាគមួយចំនួនបានលើកហេតុផលថា ហេតុការណ៍នោះគឺអាចបណ្តាលមកពីការធ្វើអត្តឃាតរបស់អ្នកបើកបរ ព្រោះកន្លងមកក៏មានករណីបែបនេះកើតឡើងយ៉ាងច្រើនផងដែរ។
ខាងក្រោមនេះគឺជាករណីដែលអ្នកបើកបរយន្តហោះធ្វើអត្តឃាតក្នុងពេលកំពុងបើកបរ៖
ខាងក្រោមនេះគឺជាករណីដែលអ្នកបើកបរយន្តហោះធ្វើអត្តឃាតក្នុងពេលកំពុងបើកបរ៖
១) ករណីនៅប្រទេសរុស្ស៊ី ឆ្នាំ១៩៧៦៖ អ្នកបើកបរយន្តហោះម្នាក់បានលួចយន្តហោះខ្នាតតូច Antonov 2 biplane ហើយបានហោះហើរទៅបុកនឹងផ្ទះល្វែងនៅតំបន់ Novosibirsk ជាទីដែលអតីតប្រពន្ធ (លែងលះ)ខ្លួន រស់នៅ។ ក្នុងហេតុការណ៍នោះ បណ្តាលឲ្យមនុស្សចំនួន ២នាក់ស្លាប់។
២) ករណីនៅប្រទេសកូឡុំប៊ីឆ្នាំ១៩៧៩៖ បុគ្គលិកមេកានិចម្នាក់ បានចូលលួចយន្តហោះយោធា HS-748 ក្រោយពេលរូបគេត្រូវបានគេបណ្តេញចេញពីការងារ។ ក្រោយពេលលូចបានហើយបុគ្គលិកម្នាក់នោះក៏បានហោះទៅបុកនឹងលំនៅដ្ឋានប្រជាពលរដ្ឋនៅទីក្រុងBogota បណ្តាលឲ្យមនុស្ស ៤នាក់បានស្លាប់។
៣) ករណីនៅប្រទេសរុស្ស៊ីឆ្នាំ១៩៩៤៖ វិស្វករយន្តហោះម្នាក់បានលួចយកយន្តហោះ Antonov 26 ពីមូលដ្ឋានទ័ពអាកាសនៅ Kubinka ជិតទីក្រុងមូស្គូ។ វិស្វករយន្តហោះបានហោះក្រឡឹងទីក្រុង Kubinkaរហូតដល់អស់សាំង ហើយក៏បានធ្លាក់ផ្ទុះស្លាប់តែម្តង។
៤) ករណីនៅប្រទេសម៉ារ៉ុកឆ្នាំ ១៩៩៤៖ យន្តហោះយោធាមួយគ្រឿងឈ្មោះATR-42 បានហោះបុកភ្នំ បន្ទាប់ពីចេញដំណើរពីប្រលានយន្តហោះបានបន្តិច បណ្តាលឲ្យមនុស្សប្រមាណ ៤៤នាក់បានស្លាប់។ ករណីនេះត្រូវបានអ្នកជំនាញអះអាងថា អាចបណ្តាលមកពីការធ្វើអត្តឃាតរបស់អ្នកបើកយន្តហោះ។
៥) ករណីនៅប្រទេសឥណ្ឌូណេស៊ី ឆ្នាំ ១៩៩៩៖ យន្តហោះ Boeing 737មួយគ្រឿងបានធ្លាក់នៅពេលធ្វើដំណើរពីឥណ្ឌូណេស៊ីទៅសិង្ហបុរីបណ្តាលឲ្យមនុស្សប្រមាណ១០៤នាក់បានស្លាប់។ ទាក់ទងនឹងហេតុការណ៍នេះ អ្នកជំនាញបានសន្និដ្ឋានថា អ្នកបើកបរយន្តហោះប្រហែលជាធ្វើអត្តឃាត ដោយបានបិទប្រអប់ខ្មៅ(ជាប្រព័ន្ធកត់ត្រាទិន្នន័យ) មុនពេលបើកយន្តហោះដាំក្បាលចុះក្រោម។
៦) ករណីនៅប្រទេសបុតស្វាន់ណាឆ្នាំ ១៩៩៩៖ អ្នកបើកបរយន្តហោះបានប្រកាសតាមវិទ្យុទាក់ទងថា ខ្លួននឹងបើកយន្តហោះATR-42ទៅបុកនឹងយន្តហោះផ្សេងទៀត។ បានបន្តិចក្រោយមក ក៏មានហេតុការណ៍កើតឡើងមែនដោយយន្តហោះនោះបានបុក ទៅនឹងយន្តហោះចំនួន២គ្រឿងទៀតនៅប្រលានយន្តហោះ Gaboroneដែលចតនៅទីនោះ ប៉ុន្តែមិនមានអ្នកផ្សេងស្លាប់នោះទេ គឺមានតែអ្នកបើកបរនោះប៉ុណ្ណោះដែលបានស្លាប់។
៧) ករណីនៅអាមេរិកឆ្នាំ ១៩៩៩៖ យន្តហោះ Boeing 767របស់ក្រុមហ៊ុនអេហ្ស៊ីបបានធ្លាក់នៅមហាសមុទ្រAtlantic បន្ទាប់ពីចេញដំណើរពីប្រលានយន្តហោះ JFKក្នុងទីក្រុងញីវយ៉កសហរដ្ឋអាមេរិក បណ្តាលឲ្យមនុស្សប្រមាណ ២១៧នាក់បានស្លាប់។ ជុំវិញបញ្ហានេះក៏គេសន្និដ្ឋានថា បណ្តាលមកពីការធ្វើអត្តឃាតរបស់អ្នកបើកបរដែរ។
៨) ករណីនៅប្រទេសណាមីប៊ី៖ យន្តហោះដឹកអ្នកដំណើរERJ-190របស់ក្រុមហ៊ុនអាកាសចរណ៍ប្រទេស ម៉ូហ្សាមប៊ីក មួយគ្រឿងបានធ្លាក់នៅក្នុងប្រទេសណាមីប៊ីពេលហោះហើរពីប្រទេស ម៉ូហ្សាមប៊ីក ទៅកាន់ប្រទេសអង់ហ្គោឡា បណ្តាលឲ្យមនុស្សប្រមាណ៣៣នាក់បានស្លាប់។ ឆ្លងកាត់ការស៊ើបអង្កេតរួចមក អ្នកជំនាញបានបញ្ជាក់ថា ហេតុការណ៍នេះគឺស្ថិតក្រោមចេតនារបស់អ្នកបើកបរយន្តហោះ៕
ប្រែសម្រួល៖រស្មី
ប្រភព៖ www.bbc.com
