បុរសចិត្តសឿង Kim Ki-jong យកកាំបិតមុតស្រួចឆូតមុខអ្នកការទូតអាមេរិកប្រចាំកូរ៉េខាងត្បូងជាអ្នកណា?
ជនដៃដល់ដែលបានយកកូនកាំបិតប្រវែងជាងមួយចំអាម ឆូតមុខឯកអគ្គរដ្ឋទូតសហរដ្ឋអាមេរិកកាលពីព្រឹកថ្ងៃព្រហស្បតិ៍សប្ដាហ៍មុននោះ មានប្រវត្តិជាអ្នកជាតិនិយម ដែលជំទាស់នឹងវត្តមានបរទេសនៅលើទឹកដីខ្លួន ហើយចង់ឲ្យកូរ៉េខាងត្បូង និងកូរ៉េខាងជើង ដែលជាបងប្អូនគូសត្រូវគ្នា រួបរួមគ្នាវិញ។ លោកមិនមែនជាមនុស្សឡប់សតិទេ។
លោក Kim Ki-jong ជាអ្នកដែលមានចិត្តលុះ ហ៊ានប្រថុយនឹងកងការពារមន្ត្រីបរទេសធំៗ ហើយធ្លាប់យកដុំក្រួសមួយក្ដាប់ ប្រុងគប់តម្រង់ក្បាលឯកអគ្គរាជទូតជប៉ុនប្រចាំប្រទេសកូរ៉េខាងត្បូង។ លោកជាអ្នកដែលគេស្គាល់មុខឡើងសាំទៅហើយ រឿងទាមទារ និងស្រែកប្រឆាំងនឹងបរទេស។
លោក Kim បានចូលរួមក្នុងចលនាទាមទារ «ប្រជុំកោះដុកដូ – the Dokdo Islands» ដែលកំពុងប្រទាញប្រទង់គ្នារវាងកូរ៉េខាងត្បូង និងប្រទេសជប៉ុន។ នៅក្នុងសៀវភៅដែលលោកនិពន្ធដោយផ្ទាល់ដៃ ក្រោមចំណងជើងថា «Dokdo and US, and 2010» លោកបានបំផុសឲ្យកូរ៉េទាំងពីរឆាប់ត្រូវរ៉ូវគ្នា ដើម្បីយកកោះនេះមកវិញព្រោះកាលពីប្រទេសទាំងពីរមិនទាន់បែងចែកគ្នាជាពីរ កោះនេះជាកម្មសិទ្ធិរបស់កូរ៉េទេ។
ក្រុមសកម្មជនដើម្បីការបង្រួបបង្រួមកូរ៉េទាំងពីរ បានឲ្យដឹងថាតាមពិតលោក Kim ជាអ្នកដែលមានចិត្តចង់ឃើញមាតុប្រទេសរបស់ខ្លួនបានរួបរួមគ្នាជាធ្លុងមួយ ហើយដោយសុទ្ធចិត្តទៀតផង។ ប៉ុន្តែអាស្រ័យដោយសារកន្លងមក មនុស្សនេះរាងអាក្រក់សំដីបន្តិច រហូតដល់ជ្រុលដៃប្រើហិង្សាចំពោះអ្នកមុខអ្នកការបរទេស ហេតុនេះហើយបានជាស្ថាប័នដើម្បីការផ្សះផ្សាកូរ៉េទាំងពីរ ពិបាកយកលោក Kim ធ្វើជាត្រីមុខ៕
ប្រែសម្រួល ៖ អន សំអាង
ប្រភព៖ HuffPost Korea
