Google រកឃើញរូបមន្តថ្មី អាចបង្ហោះបាឡុង Project Loon ហោះក្នុងខ្យល់បានកន្លះឆ្នាំស្រួលចែកចាយអ៊ីនធឺណិត
ក្រោយការបង្ហោះបាឡុងចែកចាយអ៊ីនធឺណិតសាកល្បងកន្លងទៅ ឥឡូវនេះក្រុមហ៊ុន Google កំណត់បាននូវប្រព័ន្ធគ្រប់គ្រងបាឡុងធ្វើយ៉ាងណា ដើម្បីឱ្យគម្រោងកាន់តែសមត្ថភាព និងទទួលបានផលល្អប្រសើរខ្លាំងឡើង។ ក្រុមហ៊ុនក៏បានរកឃើញនូវវិធីសាស្ត្ររក្សាបាឡុងក្នុងខ្យល់ឱ្យបាន រយៈពេលវែងជាងមុនផងដែរ។ នេះគឺជាជំហានថ្មីមួយទៀត នៃការអភិវឌ្ឍគម្រោងចែកចាយអ៊ីនធឺណិតទូទាត់ពិភពលោករបស់ Google ដែលបានដំណើរការចាប់តាំងពីអំឡុងឆ្នាំ២០១៣។ រូបមន្តនៃការបង្ហោះបាឡុងចែកចាយអ៊ីនធឺណិតរយៈពេលយូរនេះ នឹងយកទៅប្រើសម្រាប់បាឡុងក្នុងបរិវេណដែនអាកាសនៃរដ្ឋ Rhode Island របស់អាមេរិក។
នៅពេលនេះ បាឡុងរបស់ Google អាចហោះបានក្នុងខ្យល់រយៈពេលអាចច្រើនជាង ៦ខែ ដែលនឹងផ្ដល់ការចែកចាយសេវាអ៊ីនធឺណិតឥតខ្សែ 4G LTE នៅទូទាំង Rhode Island។ ក្រៅពីប្រើសម្រាប់ចែកចាយសេវាអ៊ីនធឺណិត បាឡុង Loon ក៏នឹងត្រូវបានឌីហ្សាញសម្រាប់ប្រមូលយកសញ្ញា (signal) ពីអង់តែនសេវាទូរស័ព្ទនានា (traditional land-based cellular tower)។ បាឡុងក៏អាចប្រតិបត្តិនូវការបញ្ជាប់ daisy-chain configuration ពីអង់តែនក្នុងចម្ងាយឆ្ងាយមួយ ហើយអាចបន្តចែកចាយបណ្ដាក់គ្នាពីបាឡុងមួយទៅបាឡុងមួយទៀតបាន ដើម្បីពង្រីកដែនសេវាអ៊ីនធឺណិតរឹតតែធំឡើង។
បន្ទាប់មក គេនឹងបង្កើតប្រព័ន្ធមួយដើម្បីឱ្យសញ្ញារត់ចូលទៅអង់តែន (វិធីសាស្ត្រ beam signal) របស់ទូរស័ព្ទដៃ មិនថាមនុស្សកំពុងធ្វើដំណើរ ឬនៅតាមផ្ទះនោះទេ គេនឹងអាចប្រើប្រាស់អ៊ីនធឺណិតបាន។ នៅក្នុងដំណាក់កាលធ្វើតេស្តគម្រោង Project Loon ក្រុមហ៊ុន Google ឱ្យដឹងថា បាឡុងនឹងអាចផ្ដល់ប្រព័ន្ធបណ្ដាញអ៊ីនធឺណិតកម្រិត LTE ជាមួយល្បឿនទាញយក (download) 10Mbps។
គួររំលឹកដែរថា ខែវិច្ឆិកា ឆ្នាំ២០១៤ កន្លងទៅ ក្រុមហ៊ុន Google មានវិធីសាស្ត្រអាចធ្វើឱ្យបាឡុងរបស់ខ្លួនហោះក្នុងខ្យល់បានរយៈពេល ត្រឹមតែ ១៣០ថ្ងៃប៉ុណ្ណោះ ចំណែកកំណត់ត្រាថ្មីនេះ គឺហោះបានយូរជាងមុន ពោលគឺរយៈពេល ១៨០ថ្ងៃ៕
ប្រែសម្រួល៖ លី ឈៀន
ប្រភព៖ techspot
