សមរភូមិ​​សង្គ្រាម​​​​វៀតណាម​ ​(Vietnam War)​ ដែល​ចាប់​ផ្ដើម​ឡើង​នៅ​​ឆ្នាំ ១៩៥៥ ដល់​ឆ្នាំ ១៩៧៥ គឺ​ជា​​សមរភូមិ​សង្គ្រាម​​ដ៏​ជូរចត់ និង ស្វិតស្វាញ​​​មួយ​ទៀត​​របស់​កងទ័ព​​អាមេរិក​​​ក្រោយ​សង្គ្រាម​លោក​លើក​ទី​២ ​បាន​បញ្ចប់​តាំង​ពី​ឆ្នាំ ១៩៤៥។ ភាព​ជូរ​ចត់​ដោយ​សារ​កងទ័ព​របស់​ខ្លួន​រាប់​ពាន់​នាក់​បាន​​ស្លាប់ ​និង​រង​របួស​ ខណៈ​​ទាហាន​​ជា​ច្រើន​​នាក់​ផ្សេង​ទៀត​បាន​​បាត់​ខ្លួន​នៅ​​លើ​ទឹកដី​មួយ​នេះ​ទាំង​មិន​ទទួល​បាន​ជ័យជំនះ​អ្វី​សោះ។

យោង​តាម​បណ្ដាសា​ជាតិ និង កំណត់ហេតុ​​រដ្ឋបាល​របស់​អាមេរិក​ (National Archives and Records Administration) កាល​ពី​ឆ្នាំ ២០០៨​បាន​​រក​ឃើញ​ថា កងទ័ព​របស់​ខ្លួន​​សរុប​ប្រមាណ ៥៨ ២១៣ ​នាក់​បាន​ស្លាប់​នៅ​ក្នុង​​ភ្នក់​ភ្លើង​សង្គ្រាម​វៀតណាម​ដែល​អូស​បន្លាយ​អស់​​រយៈពេល ២ ទសវត្ស​នេះ​។

ប៉ុន្តែ​ចាប់​តាំង​ពី​​វៀតណាម​ខាងត្បូង​ដួល​រលំ​នៅ​ក្នុង​ឆ្នាំ ១៩៧៥ មក​រហូត​ដល់​ឆ្នាំ ២០០៦ មាន​ទាហាន​​អាមេរិក​ប្រមាណ ៧ នាក់​ទៀត​បាន​ស្លាប់​។ ដូច្នេះ​​គិត​តាំង​ពី​ឆ្នាំ ១៩៥៦ ដល់ ឆ្នាំ ២០០៦​ ទាហាន​អាមេរិក​សរុប ៥៨ ២២០ នាក់​បាន​ស្លាប់​នៅ​វៀតណាម​​ខាងត្បូង។

ខាងក្រោម​នេះ​ជា​របាយការណ៍​បង្ហាញ​ពី​ចំនួន​គ្រោះ​ថ្នាក់​​របស់​កងទ័ព​អាមេរិក​គិត​តាំង​ពី​ឆ្នាំ ១៩៥៦ ដល់​ឆ្នាំ ២០០៦៖
១) ស្លាប់​ដោយសារគ្រោះថ្នាក់​ផ្សេងៗ ៩ ១០៧ នាក់

២) អះអាង​ថា​បាន​ស្លាប់ ១ ២០១ នាក់​

៣) ស្លាប់​ដោយ​សារ​រង​របួស​ធ្ងន់ធ្ងរ ៥ ២៩៩ នាក់​

៤) ស្លាប់​ដោយសារ​ធ្វើ​អត្តឃាត ២៣៦ នាក់

៥) ស្លាប់​ដោសារជំងឺ ៩៣៨ នាក់​

៦) ស្លាប់​ក្នុង​សមរភូមិ​ ៤០ ៩៣៤ នាក់​

៧) សន្មត​ថា​បាន​ស្លាប់ (សាកសព​អាច​គាស់​​ឡើង​​វិញ​បាន) ៣៩ នាក់​

៨) សន្មត​ថា​បាន​ស្លាប់ (សាកសព​មិន​អាច​គាស់​ឡើង​វិញ​បាន​) ៩១ នាក់​

៩) ស្លាប់​ដោយសារ​ជួប​ឧបទ្ទវហេតុ​​ដែល​​បង្ក​ឡើង​ដោយ​កំហុស​បច្ចេកទេស​ ៣៨២ នាក់​

ចំនួន​កងទ័ព​សរុប​​​ដែល​បាន​ស្លាប់​​ទាំងអស់​មាន​ចំនួន ៥៨ ២២០ នាក់​៕

សូម​ចុច​ត្រង់​នេះ​ដើម្បី​មើល​ព័ត៌មាន​លម្អិត​ផ្សេងៗ​ទៀត!

ប្រែសម្រួល៖​ខេវិន

ប្រភព៖​ archives.gov