ការវាយបកដ៏អស្ចារ្យ! សាងជញ្ជាំងពីក្រដាសប្រាក់ដើម្បីឆ្លើយតបជាមួយពាក្យចចាមអារាមក្ស័យធន
Cheng Hsiao ជាម្ចាស់ក្រុមហ៊ុនមួយ នៅក្រុង Guiyang ខេត្ត Guizhou ប្រទេសចិន ។ ឆ្នាំទៅមិញ ម្ចាស់ក្រុមហ៊ុនវ័យ ៤៥ រូបនេះ បានទិញដីរបស់កសិកររាប់រយនាក់ ដើម្បីសាងសង់តំបន់ឧស្សាហកម្ម ។ ប៉ុន្តែ ប៉ុន្មានថ្ងៃមុននោះ បុគ្គលិកប៉ុន្មាននាក់របស់ក្រុមហ៊ុន បានសំរុកចូលការិយាល័យរបស់លោក ក្រោយពីលេចឮពាក្យចចាមអារាមថា លោកបានអស់លុយ ទើបពុំអាចសងបំណុលកសិករ និងទូទាត់ប្រាក់បៀវត្សឲ្យបុគ្គលិក ។
តាម Mirror នោះបុគ្គលិកអាយុ ៥៣ ឆ្នាំម្នាក់ និយាយថាៈ យើងខ្ញុំទាមទារលុយសុទ្ធភ្លាម ដើម្បីធានាថា គាត់ពុំរត់ទៅបរទេស ។
Cheng នៅបានផ្តល់ប្រាក់តៃអៀដល់បុគ្គលិក ក្រៅពីបៀវត្ស និងសង់បំណុលទាំងអស់របស់ប្រជាកសិករ
ដើម្បីវាយបកនូវពាក្យចចាមអារាម មូលបង្កាច់ លោក Cheng រកឃើញវិធីដ៏ចម្លែកមួយ ។
នៅព្រឹកថ្ងៃទី ១០ កុម្ភៈ កន្លងមកនេះ ពេលដែលបុគ្គលិក និងកសិករម្ចាស់ដីប្រមាណជិត ១០០០ នាក់ នាំគ្នាសំរុកចូលមកការិយាល័យរបស់លោក ស្រាប់តែគេពុំឃើញមានសន្តិសុខបើកទ្វា ដូចសព្វដង ។ រីឯលោក Cheng វិញបានពួនឈរពីក្រោយជញ្ជាំងដែលលោកបានស្ថាបនា ….ដុំលុយ ។ លោកក៏យកលុយទាំងនោះធ្វើការទូទាត់អស់បំណុល ហើយថែមទាំងផ្តល់លុយតៃអៀខ្លះថែមទៀត ក្នុងឱកាសបុណ្យចូលឆ្នាំថ្មីរបស់ជនជាតិចិន ។
មនុស្សម្នាទាំងអស់ច្រហរមាត់ រកពាក្យអ្វីនិយាយពុំចេញ ។ លោក Kong ដែលជាបុគ្គលិកម្នាក់និយាយថាៈ ឥឡូវ ខ្ញុំពិតជាមានវិប្បដិសារី ដែលបានសង្ស័យលើលោក Cheng ។ លោកពិតាអ្នកជំនួញ និងថៅកែដ៏អស្ចារ្យមែន ៕
