ការ​រិះគន់​មួយ​គត់​របស់​សាធារណជន​មួយ​ចំនួន​ទៅ​លើ​លោក Tim Cook នាយក​ប្រតិបត្តិ​បច្ចុប្បន្ន​របស់​ក្រុមហ៊ុន Apple គឺ​ថា ការ​គ្រប់គ្រង​ក្រុមហ៊ុន​របស់​លោក មិន​ដូច​នឹង​យុទ្ធសាស្ត្រ​ដែល​លោក Steve Jobs បាន​ប្រើ​សម្រាប់​ដឹកនាំ​ក្រុមហ៊ុន​នោះ​ទេ។ លោក Cook មិន​សូវ​មាន​យុទ្ធសាស្ត្រ​ច្រើន មិន​មាន​ចក្ខុវិស័យ​ដូច​លោក Jobs ហើយ​ដឹកនាំ​ក្រុមហ៊ុន​មិន​ឃើញ​មាន​អ្វី​ប្លែក​ប្រៀបធៀប​មុខមាត់​ក្រុមហ៊ុន​ចាប់​តាំង​ពី​លោក Jobs ចែកឋាន​ឡើយ។

ទោះជា​យ៉ាងណា​ នេះ​មិនមែន​សបញ្ជាក់​ថា លោក Cook មិន​មាន​ភាព​ខ្លាំង​របស់​ខ្លួនឯង​ផ្ទាល់​ក្នុង​ការ​ដឹកនាំ​ក្រុមហ៊ុន Apple នោះ​ទេ។ បើ​តាម​ការ​សរសេរ​ជីវប្រវត្តិ​របស់​លោក Cook នៅ​ក្នុង​ព្រឹត្តិបត្រព័ត៌មាន Wall Street បាន​លើក​ឡើង​ថា Jobs បាន​ប្រាប់​ទៅ​លោក Time Cook មុន​ពេល​លោក​ចែកឋាន​ថា គាត់ (Cook) មិន​គួរ​សួរ​ខ្លួន​ឯង​ថា “តើ Steve Jobs នឹង​ធ្វើ​អ្វី?” នៅ​ពេល​កំពុង​ធ្វើការ​សម្រេច​ចិត្ត​ដ៏​សំខាន់​ពាក់ព័ន្ធ​ពាក់ព័ន្ធ​អនាគត​របស់ Apple នៅះ​ឡើយ។

លោក Cook បាន​ពន្យល់​ថា “ខ្ញុំ​បាន​ធ្វើ​តាម​គាត់ (ដំបូន្មាន​របស់ Steve Jobs)”។ «ខ្ញុំ​គិត​ថា លោក Jobs ធ្វើ​ដូច្នេះ គឺ​ដោយសារតែ​គាត់​ចង់​ផ្ទេរ​ភារកិច្ច ដែល​ជា​បន្ទុក​ដ៏​ធំ​មក​លើ​ខ្ញុំ»។

ដោយសារ Cook មិន​មែន​ជា​លោក Steve Jobs គាត់​ដឹង​ថា គាត់​មិន​អាច​ដឹកនាំ​ក្រុមហ៊ុន Apple បាន​ដូច​ជា​លោក Jobs នោះ​ទេ។ ផ្ទុយទៅវិញ គាត់​បាន​សម្រេចចិត្ត បង្កើត​អង្គ​ព្រមព្រៀង​មូលមតិ​គ្នា និង​ជំរុញ​កិច្ច​សហ​ប្រតិបត្តិការ ក្នុង​ចំណោម​មនុស្ស​មាន​សមត្ថភាព​ខ្ពស់ និង​ទេពកោសល្យ​ជាច្រើន​រូប​ក្នុង​ក្រុមហ៊ុន មាន​ដូច​ជា​លោក Jony Ive, លោក Craig Federighi, លោក Eddy Cue និង លោក Phil Schiller។

​ព្រឹត្តិបត្រព័ត៌មាន​បាន​រាយការណ៍​ថា៖ «ខណៈ​ដែល​លោក Jobs ជា​នាយក​ប្រតិបត្តិ​ធ្វើ​ឱ្យ​សំបូរ​ភាព​ចម្រូងចម្រាស​រវាង​បុគ្គលិក ចំណែក​លោក Cook វិញ​គឺ​មាន​ភាព​ជា​អ្នក​បង្រួបបង្រួម​ជាង»។ នេះ​គឺ​រួម​ចំណែក​ធ្វើឲ្យ​លោក Cook មាន​ការ​សម្រេចចិត្ត​យឺតយ៉ាវ ប៉ុន្តែ​ក៏​បាន​កាត់​បន្ថយ​នូវ​ភាព​វឹកវរ​ជាង​ស្ទីល​នៃ​ការ​គ្រប់គ្រង​របស់​លោក Jobs៕

ប្រែ​សម្រួល៖ លី ឈៀន

ប្រភព៖​ yahoo