ប៉ូលិសអំពាវនាវការពារសុវត្ថិភាពកូនចៅស្រីៗ ក្រោយបង្ក្រាបជនល្មើសប្រើល្បិចរំលោភក្មេងស្រីទាំងហ្វូង
បន្ទាយមានជ័យ: ប៉ូលិសខេត្តបន្ទាយមានជ័យ បានអំពាវនាវអោយឪពុកម្តាយ អាណាព្យាបាល និងអ្នកពាក់ព័ន្ធទាំងអស់ ជួយអប់រំចាត់ការការពារសុវត្ថិភាពកូន ចៅស្រី នៅជំទើរ ជំទង់ និងយុវតី ទប់ស្កាត់កុំអោយចាញ់បោក ឬធ្លាក់ខ្លួនជាជនរងគ្រោះ ដោយអំពើរំលោភសេពសន្ថវៈ ឬការបំពារបំពានបៀតបៀនប្រទូស្តកេរ្តិ៍ផ្លូវភេទ។
លោកវរសេនីយ៍ សិទ្ធ ឡោះ ស្នងការរង ទទួលជានាយការិយាល័យកណ្តាលនគរបាលព្រហ្មទណ្ឌ ខេត្ត បានអំពាវនាវដូចខាងលើ កាលពីថ្ងៃទី២៧ ខែមករា ឆ្នាំ២០១៥ ខណៈបង្ហាញមុខ និងបកអាក្រាតល្បិចកលរបស់ជនល្មើសវ័យក្មេងម្នាក់ ករណីបង្ខរំលោភក្មេងស្រីម្នាក់ បានសម្រេចកណ្តាលហ្វូងក្មេងស្រី-ប្រុស ៩ នាក់ កាលពីថ្ងៃទី៦ ខែមករា ឆ្នាំ២០១៥។ បន្ទាប់មក យុវជននោះ បានប្រព្រឹត្តប៉ុនប៉ងរំលោភក្មេងស្រីម្នាក់ទៀត កាលពីថ្ងៃទី២៦ ខែមករា ឆ្នាំ២០១៥។
លោក សិទ្ធ ឡោះ និយាយថា យោងបទបញ្ជាលោកឧត្តមសេនីយ៍ត្រី អាត់ ខែម ស្នងការ និងមានកិច្ចសម្របសម្រួលពីលោក ផាន់ វណ្ណរ័ត្ន ព្រះរាជអាជ្ញាអមសាលាដំបូងខេត្ត និងកិច្ចសហការល្អ និងនគរបាលស្រុកមង្គលបូរី អាណាព្យាបាល ឪពុកម្តាយក្មេងរងគ្រោះ ពលរដ្ឋ អាជ្ញាធរមូលដ្ឋាន រហូតដល់ព្រះសង្ឃ ពិសេសគឺការប្រើប្រាស់វិធានការជំរឿនរដ្ឋបាលចំហ ស៊ើបអង្កតសម្ងាត់ និងស្រាវជ្រាវតាមបច្ចេកទេសជំនាញនោះ ទើបកម្លាំងនគរបាលការិយាល័យជំនាញ នៃការិយាល័យកណ្តាលព្រហ្មទណ្ឌខេត្ត ចាប់បានជនល្មើសរំលោភក្មេងស្រី ដល់ទៅ ២លើកនោះ។
ជនល្មើស មានឈ្មោះ មឿន សេត ហៅ ក្រឹម ភេទប្រុស អាយុ ២១ ឆ្នាំ លំនៅភូមិតាសល់ ឃុំចំណោម ស្រុកមង្គលបូរី មានប្រពន្ធកំពុងផ្ទៃពោះ ៧ខែ។ ជននេះ បានប៉ុនប៉ងរំលោភសេពសន្ថវៈលើក្មេងស្រី អាយុ ១២ ឆ្នាំ នៅភូមិតាប៊ុន ឃុំចំណោម នៅចំណុចទំនប់តាបាងភូមិតាប៊ុន ឃុំចំណោម ស្រុកមង្គលបូរី គឺផ្លូវលំចេញពីវិទ្យាល័យរោងគោ ឆ្ពោះទៅផ្ទះវេលាម៉ោង ១២ ថ្ងៃត្រង់ ថ្ងៃទី២៦ ខែមករា ឆ្នាំ២០១៥។
ប៉ូលិសឲ្យដឹងថា ជនល្មើសសម្ងំចាំ ហើយស្ទុះចេញមកដេញតាមក្មេងស្រីសិស្សសាលានេះ អោយឈប់។ នាងខំជិះកង់កាន់តែលឿន តែជនល្មើសនៅតែតាមទាន់។ ដោយចាប់ដៃនាងជាប់ក្នុងបំណង់រំលោភ។ តែនាងបានអង្វរជនល្មើសថា ទៅរើសស្បែកជើងសិន ហើយនាង ក៏ខំរត់គេចរួចទៅផ្ទះ លោតចោលកង់ និងសៀវភៅ។
ក្រោយកើតហេតុនេះ ឪពុកក្មេងស្រីរងគ្រោះ បានប្តឹងកម្លាំងប៉ូលិសខេត្ត និងស្រុក បានចុះទៅដល់ ហើយឃាត់ខ្លួនជនល្មើសនេះ ក្នុងបទល្មើសជាក់ស្តែង។ នៅយប់ដដែល ជនល្មើសបានសារភាពថា ខ្លួនប៉ុនប៉ងរំលោភក្មេងស្រីអាយុ១២ឆ្នាំនេះមែន។
លោក សិទ្ធ ឡោះ បន្តថា សមត្ថកិច្ចបន្តឈ្លេចសួរចម្លើយជននេះ ដែលសង្ស័យបំភ័យបញ្ឆោតចាប់បង្ខំរំលោភសេពសន្ថវៈក្មេងស្រីម្នាក់ ក្នុងចំណោមក្មេងស្រី ៦នាក់ និងក្មេងប្រុស ៣ នាក់ ជាសិស្សសាលាបឋមសិក្សាដងត្រាង ឃុំចំណោម កាលពីម៉ោង ២ រសៀល ថ្ងៃទី៦ ខែមករា ឆ្នាំ២០១៥ នៅខាងលិចវត្តដងត្រាង ១៦០ ម៉ែត្រ។
យោងតាមក្មេងស្រីរងគ្រោះ ពលរដ្ឋ និងព្រះសង្ឃ បានចង្អុលបង្ហាញថា ជនល្មើសនេះ ពាក់របាំងម៉ាស់មុខ បានជិះម៉ូតូម៉ាកហុងដាខ្មៅ ឆ្នាំ២០០៥ ឌ្រីមអត់ស្លាក មានបូមពណ៌ក្រហម និងពាក់ស្បែកជើងចាស់ ពេលធ្វើសកម្មភាពលើកមុន និងលើកនេះ។ ពេលនោះ ជនល្មើស បានជិះម៉ូតូទៅប្រាប់ក្មេងៗ សិស្សសាលាដងត្រាង ១ ហ្វូងថា បើលោកគ្រូអត់បង្រៀន ត្រូវប្រញាប់ទៅផ្ទះទៅ។
ជនល្មើសបន្តថា ពេលនោះ ខ្លួនបានជិះម៉ូតូទៅចាំស្ទាក់ផ្លូវមុន។ ខណៈក្មេងៗ ជិះកង់ទៅដល់ ខ្លួនក៏បំភ័យ បញ្ឆោតថា នៅខាងមុខ មានចោរប្លន់ ចាំចាប់សម្លាប់ក្មេងៗ។ ដូច្នេះប្រញាប់នាំគ្នាយកកង់លាក់ ហើយទាំងអស់គ្នា ( គឺក្មេងស្រី ៦ នាក់ អាយុក្រោម ១០ ឆ្នាំ ) ត្រូវចូលពួនក្នុងគុម្ពោតព្រៃមក។
ពេលនោះ ខ្លួនបានពាក់របាំងមុខកុំអោយក្មេងៗស្គាល់ ហើយសម្លុតអោយក្មេងស្រី ៤ នាក់ ស្រាតខោអាវ។ ឯក្មេងស្រី ២ នាក់ទៀត និងក្មេងប្រុស ៣ នាក់ អោយឈរជុំវិញតែបិទភ្នែកទាំងអស់គ្នា ហើយកុំស្រែក ព្រោះខ្លាចចោរឮ។ ធ្វើដូច្នោះហើយ ខ្លួនក៏ចាប់រំលោភក្មេងស្រីម្នាក់ បានសម្រេច ក្នុងនោះ អោយក្មេងៗដទៃ ជួយចាប់ដៃជើងកន្ធែក និងចុកមាត់ផង។ បន្ទាប់មក ខ្លួនបានបង្គាប់អោយក្មេងៗ នៅទីនោះសិន ហើយខ្លួន ក៏ចាកចេញទៅមុន។
ជនល្មើសនិយាយបន្តថា ខ្លួនធ្លាប់សេពគ្រឿងញៀន កាលទៅស៊ីឈ្នួលនៅប្រទេសថៃ ហើយមានជំងឺផ្លូវចិត្តផង។ តែការប្រព្រឹត្តល្មើសរំលោភសេពសន្ថវៈ ២លើកនេះ គឺដោយសារខ្លួនផឹកស្រាស្រវឹង។ ម្យ៉ាងទៀត ដោយសារប្រពន្ធ កំពុងមានផ្ទៃពោះ ៦-៧ខែ ពុំអាចរួមដំណេកបាន។
លោកឧត្តមសេនីយ៍ត្រី អាត់ ខែម ស្នងការនគរបាលខេត្តបន្ទាយមានជ័យ ចាត់ទុកអំពើល្មើសរបស់ជនល្មើសថា ឃោរឃៅ អាក្រក់លាមក និងប្រើល្បិចកលងាយៗ ដោយគិតទុកមុនក្នុងការរំលោភបំពានផ្លូវភេទក្មេងស្រី។ ហេតុនេះ សូមអំពាវនាវដល់ឪពុកម្តាយ អាណាព្យាបាល អ្នកពាក់ព័ន្ធ និងក្មេងស្រីពីកុមារតូច ដល់យុវវ័យត្រូវប្រុងប្រយ័ត្នខ្ពស់នូវសុវត្ថិភាព។
លោកស្នងការ ក៏បានព្រមានជនទាំងឡាយណា ប៉ុនប៉ងប្រព្រឹត្តល្មើសបែបនេះ ឬបែបណាក៏ដោយ ក៏សមត្ថកិច្ចនៅតែបង្ក្រាប ចាប់ដាក់ក្នុងសំណាញ់ច្បាប់ទាល់តែបាន។
គួរបញ្ជាក់ថា ក្នុងការស្រាវជ្រាវបង្ក្រាប និងសង្គ្រោះក្មេងៗរងគ្រោះករណីនេះ អង្គការការពារកុមារ (Child Protect Unit: CPU) បានជួយឧបត្ថម្ភ គាំទ្រសមត្ថកិច្ច និងសង្គ្រោះ ស្តារសម្បទារក្មេងរងគ្រោះផងដែរ៕ ប្រភពៈ CEN
ក្មេងស្រីរងគ្រោះកាលពីថ្ងៃទ ២៦ មករា ២០១៤ និង ក្មេងស្រីរងគ្រោះកាលពីថ្ងៃទ ៦មករា ២០១៥ (រូបថត៖ សូផុន)
ជនល្មើសឈ្មោះ មឿន សេតហៅក្រឹមអាយុ ២១ឆ្នាំ ប្រើល្បិចនិងគំនិតឃោរឃៅ អាក្រក់លាមក រំលោភក្មេងស្រីទាំងហ្វូង (រូបថត៖ សូផុន)
លោកវរសេនីយ៍ សិទ្ធ ឡោះ ស្នងការរង ប៉ូលិសខេត្តបន្ទាយមានជ័យ ង្ហាញមុខនិងហែកល្បិចជនល្មើស ហើយអំពាវនាវអោយការពារសុវត្ថិភាពកុមារ (រូប: សូផុន)
