រដ្ឋមន្ត្រីពីរក្រសួងយល់ព្រមឆ្លើយបំភ្លឺនៅសភាពីបញ្ហាគ្រប់គ្រងបរិស្ថាននិងព្រៃឈើ
ភ្នំពេញៈ ជាការឆ្លើយតបតាមការកោះហៅរបស់ប្រធាន គណៈកម្មការ ទី៣ នៃរដ្ឋសភា រដ្ឋមន្ត្រីក្រសួងបរិស្ថាន និង រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានយល់ព្រមចូលឆ្លើយបំភ្លឺនៅចំពោះមុខគណៈកម្មការនេះនៅឯវិមានរដ្ឋសភាដោយកំណត់យកថ្ងៃដាច់ដោយឡែកពីគ្នា។
ព្រះសង្ឃបានបំបួសដើមឈើដើម្បីគេចពីការបំផ្លាញរបស់ក្រុមហ៊ុនចិន។ រូបថត សហការី
លោក ប៉ុល ហំម ប្រធានគណៈកម្មការ ទី៣ នៃរដ្ឋសភា បានឲ្យដឹងថា លោកបានដាក់លិខិតកោះហៅរដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ លោក អ៊ុក រ៉ាប៊ុន និង រដ្ឋមន្រ្តីក្រសួងបរិស្ថាន លោក សាយ សំអាល់ មកឆ្លើយបំភ្លឺទាក់ទងទៅនឹងស្ថានភាពនៃការគ្រប់គ្រងបរិស្ថាននិងព្រៃឈើ។ លោកបានថ្លែងថា៖ «សាមីក្រសួងទាំងពីរបានយល់ព្រមហើយ ដោយក្រសួងបរិស្ថាននឹងមកឆ្លើយបំភ្លឺនៅចំពោះមុខគណៈកម្មការ ទី៣ នៅវិមានរដ្ឋសភានៅថ្ងៃ ទី២៤ វេលា ម៉ោង ៣ រសៀលនិង ក្រសួងកសិកម្មរុក្ខាប្រមាញ់និងនេសាទ មកឆ្លើយបំភ្លឺនៅថ្ងៃទី ២៧ នៅពេលរសៀល»។
លោកបានឲ្យដឹងទៀតថា គណៈកម្មការ ទី៣ នៃរដ្ឋសភា បានដាក់លិខិតកោះហៅ រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងរដ្ឋមន្រ្តីក្រសួងបរិស្ថាន មកឆ្លើយបំភ្លឺទាក់ទងទៅនឹងការគ្រប់គ្រងបរិស្ថាននិងព្រៃឈើនោះតាងពីមុនថ្ងៃបុណ្យអុំទូកមួយថ្ងៃ។ លោកថ្លែងថា៖ «យើងសួរគាត់ទាក់ទងទៅនឹងការគ្រប់គ្រងបរិស្ថាន ប៉ុន្តែ យើងនឹងផ្តោតទៅលើវារីអគ្គិសនីនៅអារ៉ែង»។
សូមរំឭកផងដែរថា កាលពីដើម ខែតុលា បើតាមការអះអាងរបស់លោក សម រង្ស៊ី ថ្លែងប្រាប់អ្នកសារព័ត៌មានក្រោយពីបញ្ចប់កិច្ចប្រជុំក្នុងសភាបានឲ្យដឹងថា លោកនាយករដ្ឋមន្ត្រី ហ៊ុន សែន បានបញ្ជាក់ប្រាប់ថា គម្រោងវិនិយោគវារីអគ្គិសនីស្ទឹងជាយអារ៉ែង ដែលកំពុងមានភាពចម្រូងចម្រាសនោះនឹងមិនត្រូវអនុវត្តទេនៅក្នុងរដ្ឋាភិបាលអាណត្តិ ទី៥ នេះ។
លោក អ៊ុក រ៉ាប៊ុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ បដិសេធអត្ថាធិប្បាយកាលពីម្សិលមិញ។ ចំណែក ឯលោក ថន សារ៉ាត ប្រធានផ្នែករដ្ឋបាលនៃក្រសួងកសិកម្មរុក្ខាប្រមាញ់និងនេសាទក៏បានបដិសេធធ្វើការអត្ថាធិប្បាយដែរ ដោយលោកមានប្រសាសន៍ថា លោកពុំបានដឹងទាក់ទៅនឹងការរត់សំបុត្រចេញចូលនោះទេ។
ចំណែកឯលោក សៅ សុភាព មន្ត្រីអ្នកនាំពាក្យក្រសួងបរិស្ថានពុំអាចទាក់ទងដើម្បីធ្វើការអត្ថាធិប្បាយបានទេ ពីម្សិលមិញ។
កាលពីថ្ងៃ ទី៣០ ខែកញ្ញា លោក អ៊ិត ប្រាំង រដ្ឋលេខាធិការក្រសួងរ៉ែ និងថាមពល ថ្លែងក្នុងសន្និសីទសារព័ត៌មានដោយបានបដិសេធថា គម្រោងវារីអគ្គិសនីស្ទឹងជាយអារ៉ែង ក្នុង ខេត្តកោះកុង នឹងមិនធ្វើឲ្យប៉ះពាល់ព្រៃឈើ រាប់ម៉ឺនហិកតា ដូចការចោទប្រកាន់របស់ក្រុមអង្គការសង្គមស៊ីវិលមួយចំនួននោះទេ ពីព្រោះគម្រោងនោះស្ថិតនៅក្នុងដំណាក់ការសិក្សានៅឡើយ ហើយក្រសួងនេះនៅតែរក្សាជំហរបន្តគម្រោងអភិវឌ្ឍន៍ទំបន់វារីអគ្គិសនីនេះ ដោយគ្រោងនឹងបញ្ចប់នៅក្នុង ឆ្នាំ២០២០៕ ប្រភព ៖ ភ្នំពេញប៉ុស្តិ៍
