ជម្លោះរឿងគោចូលស៊ីអំពៅ យុវជនចិត្តភ្លើងម្នាក់ទាញពូថៅមកកាប់ប្រហារស្ត្រីអ្នកជាប់ផ្ទះគ្នាម្តាយស្លាប់កូនស្រីរបួសធ្ងន់ចៅប្រុសអាយុ១ខួបកន្លះរបួសស្រាល
ខេត្តត្បូងឃ្មុំ ៖ ស្ត្រីម្នាក់បានស្លាប់ក្នុងថ្លុកឈាមយ៉ាងអាណោចអធ័ម និងកូនស្រីបានរងរបួសធ្ងន់ធ្ងរ រួមនឹងចៅប្រុស រងរបួសស្រាល បន្ទាប់ពីត្រូវបាន យុវជនចិត្តភ្លើងម្នាក់ យកពូថៅទៅកាប់ប្រហារ ក្នុងខណះពេលគ្រួសារជនរងគ្រោះ និងគ្រួសារជនដៃដល់ កំពុងឈ្លោះប្រកែកគ្នា រឿងសត្វគោរបស់គ្រួសារ ជនដៃដល់ ចូលទៅស៊ីអំពៅក្នុងចម្ការរបស់គ្រួសារជនរងគ្រោះ។
ហេតុការណ៍នេះកើតឡើង កាលពីវេលាម៉ោង៥ និង២៥នាទីល្ងាចថ្ងៃទី១៧ ខែវិច្ឆិកា ឆ្នាំ២០១៤ ស្ថិតក្នុងភូមិស្ពានជ្រៃ ឃុំដូនតី ស្រុកពញាក្រែក ខេត្តត្បូងឃ្មុំ។
អធិការនគរបាលស្រុកពញាក្រែកលោក ឱម មុន្នីវណ្ណ បានឲ្យនគរវត្តដឹងថា ជនសង្ស័យដៃដល់ ឈ្មោះ តាក សិត ភេទប្រុស អាយុ២៣ឆ្នាំ បានរត់គេចខ្លួនឆ្លងព្រែកបាត់។ ចំណែកស្ត្រីរងគ្រោះដែលស្លាប់ ឈ្មោះ ប៊ុន មុន អាយុ៥៦ឆ្នាំ ត្រូវបានជនដៃដល់កាប់ត្រូវចំនួន២ពូថៅ (ចំក្បាលផ្នែកខាងក្រោយខាងលើកញ្ចឹងក១ពូថៅ និងចំខាងលើក្បាល១ពូថៅ) បណ្តាលឲ្យស្លាប់នៅនឹងកន្លែងក្នុងថ្លុកឈាម ឯកូនស្រីឈ្មោះ ប៊ុន មុំ អាយុ២១ឆ្នាំ ត្រូវបានជនដៃដល់កាប់ត្រូវ ចំក្រោមក្លៀកខាងឆ្វេង១ពូថៅ ដាច់ឆ្អឹងជំនីអស់ពីរ បានរងរបួសយ៉ាងធ្ងន់ធ្ងរ និងចៅប្រុស(ត្រូវជាកូននារីរងគ្រោះរបួសធ្ងន់)ឈ្មោះ ស៊ី កាចន្នី មានអាយុមួយខួបកន្លះ រងរបួសស្រាល។
លោកអធិការបន្តថា អ្នកទាំងអស់មានទីលំនៅជាប់របងគ្នាក្នុងភូមិ ស្ពានជ្រៃ ឃុំ ដូនតី ស្រុកពញាក្រែក ខេត្តត្បូងឃ្មុំ។
លោកអធិការបានឲ្យដឹងបន្ថែមថា នៅមុនពេលកើតហេតុ គោរបស់គ្រួសារជនដៃដល់បានចូលទៅស៊ី អំពៅនៅក្នុងចម្ការ របស់គ្រួសារជនរងគ្រោះហើយគ្រួសារទាំងពីដែលមានផ្ទះជាប់របងនឹងគ្នាក៏បានបង្កជាជម្លោះបែងផ្សែងកើតឡើង ។ ពេលនោះជនដៃដល់ក៏ស្ទុះទៅយកពូថៅ មកកាប់ប្រហារជនរងគ្រោះបណ្តាលឲស្លាប់និងរងរបួសកូននិងចៅតែម្តង។
ទាក់ទងនឹងករណីនេះលោកអធិការស្រុកពញាក្រែក ឱម មុន្នីវណ្ណ បានបញ្ជាក់ថា បច្ចុប្បន្នសមត្ថកិច្ចនគរបាលកំពុងស្រាវជ្រាវតាមស្វែងរកចាប់ជនសង្ស័យយកមកផ្តន្ទាទោសតាមច្បាប់៕
ប្រភពពី នគរវត្ត
