ប្រេងសាំងនៅកម្ពុជាពិបាកហ្នឹងចុះថ្លៃខ្លាំងណាស់ដោយសារតែ........................................................!
ក្រុមហ៊ុនប្រេងសាំងនៅប្រទេសកម្ពុជា បានបញ្ចុះតម្លៃប្រមាណ ៣% ស្របពេលដែលប្រេងសាំងនៅលើទីផ្សារអន្តរជាតិបានធ្លាក់ថ្លៃប្រមាណ៣០%។ បញ្ហានេះ អ្នកវិភាគសេដ្ឋកិច្ចនិងគណបក្សប្រឆាំងបានអះអាងថា ការបញ្ចុះតម្លៃតិចតួចនេះ បណ្ដាលមកពីក្រុមហ៊ុនផ្គត់ផ្គង់ប្រេងសាំងនៅកម្ពុជា រួមគ្នារកស៊ី ផ្ដាច់មុខដែលប្រាសចាកខុសពីក្រឹត្យក្រមសេដ្ឋកិច្ចទីផ្សារសេរី។
ការផ្សព្វផ្សាយរបស់ក្រុមហ៊ុនប្រេងសាំងអន្តរជាតិ ដែលហៅកាត់ថា អូប៉ិច (OPEC) បានបង្ហាញថា តម្លៃប្រេងឆៅបច្ចុប្បន្ន មានតម្លៃ ៨០ដុល្លារអាមេរិកក្នុងមួយបារ៉ែល ឬស្មើនឹង ១៦០លីត្រ ដែលធ្លាក់ចុះពី ១១០ដុល្លារអាមេរិកកាលពីឆ្នាំមុន។ ការធ្លាក់ចុះតម្លៃប្រេងសាំងអន្តរជាតិនេះ បានជំរុញឲ្យតម្លៃប្រេងសាំងលក់នៅប្រទេសកម្ពុជា ធ្លាក់ថ្លៃដែរ។
អតិថិជនចូលចាក់សាំងនៅក្នុងស្ថានីយប្រេងមួយកន្លែងនៅក្នុងរាជធានីភ្នំពេញ កាលពីថ្ងៃទី៣ ខែមីនា ឆ្នាំ២០១១
សេចក្ដីជូនដំណឹងរបស់ក្រសួងពាណិជ្ជកម្ម នៅថ្ងៃទី២០ វិច្ឆិកា ឆ្នាំ២០១៤ បានឲ្យដឹងថា ក្រុមហ៊ុនធ្វើអាជីវកម្មប្រេងសាំងនៅកម្ពុជា បានបញ្ចុះថ្លៃលក់របស់ខ្លួនដោយលក់ក្នុងចន្លោះប្រេងមួយលីត្រ នឹងបញ្ចុះពី ៥.០៥០រៀល មកត្រឹម ៤.៧៥០រៀលក្នុងមួយលីត្រ។
ការអះអាងរបស់ក្រសួងពាណិជ្ជកម្មបានបញ្ជាក់ថា ការបញ្ចុះតម្លៃរបស់ក្រុមហ៊ុនផ្គត់ផ្គង់ប្រេងសាំងទាំងអស់នេះ ដោយឈរលើមូលដ្ឋានតម្លៃប្រេងសាំងនៅលើទីផ្សារអន្តរជាតិធ្លាក់ថ្លៃ និងមានការស្នើសុំរបស់អនុប្រធានគណៈកម្មការទី៩នៃរដ្ឋសភា ដែលសុំឲ្យរដ្ឋាភិបាលពិចារណាលើការបញ្ជុះតម្លៃប្រេងសាំងនេះកាល ពីថ្ងៃទី១៧ វិច្ឆិកា។ បច្ចុប្បន្ន តម្លៃប្រេងសាំងអន្តរជាតិ ក្នុងប្រេងសាំងមួយលីត្រមានតម្លៃតិចជាង ២ពាន់រៀល។
ទោះជាយ៉ាងណាក៏ដោយ សមាជិកសភាមកពីគណបក្សប្រឆាំងបានលើកឡើងថា តម្លៃប្រេងសាំងនៅកម្ពុជា គឺអាចបញ្ចុះតម្លៃទាបជាងនេះទៅទៀត ប្រសិនបើក្រុមហ៊ុនផ្គត់ផ្គង់ប្រេងសាំងនៅកម្ពុជា ទាំងអស់ ពិតជាអនុវត្តរបររកស៊ីរបស់ខ្លួនស្របតាមក្រឹត្យក្រមសេដ្ឋកិច្ច ទីផ្សារសេរីនោះ។
អនុប្រធានគណៈកម្មការទីពីរនៃរដ្ឋសភា លោក សុន ឆ័យ មានប្រសាសន៍ថា អាជីវកម្មប្រេងសាំងនៅកម្ពុជា ហាក់ដូចជាការរកស៊ីផ្ដាច់មុខ ដោយក្រុមហ៊ុនទាំងអស់ព្រមព្រៀងគ្នាដោយមិនលក់បញ្ចុះថ្លៃខ្លាំង ឡើយ ទោះបីជាតម្លៃប្រេងសាំងនៅលើទីផ្សារអន្តរជាតិធ្លាក់ថ្លៃយ៉ាងណា ក៏ដោយ៖ «សំឡេង»។
បន្ថែមលើនេះ អ្នកវិភាគសេដ្ឋកិច្ចបានលើកឡើងថា លក្ខណៈសម្គាល់នៃរបបរួមគ្នាផ្ដាច់មុខ គឺជារចនាសម្ព័ន្ធមួយដែលក្នុងទីផ្សារមានសហគ្រាសតែមួយប៉ុណ្ណោះ ដែលការរកស៊ីអាស្រ័យគ្នាទៅវិញទៅមក។ របបរួមគ្នាផ្ដាច់មុខនោះ ដោយសារតែមានអំណាចសេដ្ឋកិច្ចសំខាន់ពីរ។ ទីមួយ ក្រុមហ៊ុននោះមានសមត្ថភាពផ្គត់ផ្គង់ទំនិញបានច្រើន ឬជាប្រភេទរោងចក្រ ឬក្រុមហ៊ុនធំដែលសកម្មភាពផលិត មានប្រសិទ្ធភាពបំផុត។ ទីពីរ ក្រុមហ៊ុននោះមានអំណាចក្នុងការរារាំងក្រុមហ៊ុនដទៃទៀតមិនឲ្យ ប្រកបរបររកស៊ីដូចខ្លួនបានឡើយ ដែលការរារាំងនោះ កើតឡើងតាមរូបភាពនៃការកំណត់ដោយច្បាប់ ឬការកំណត់បរិមាណផលិតជាដើម។
បញ្ហានេះ រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ លោក អូន ព័ន្ធមុនីរ័ត្ន មានប្រសាសន៍នៅក្នុងកិច្ចប្រជុំរៀបចំថវិកាជាតិនៅវិមានរដ្ឋសភានៅ ក្នុងខែវិច្ឆិកាថា ប្រទេសកម្ពុជា បានចាប់យករបបសេដ្ឋកិច្ចទីផ្សារសេរី ក្នុងនោះរាជរដ្ឋាភិបាលកម្ពុជា មិនអាចលូកដៃចូលអន្តរាគមន៍ក្នុងការទម្លាក់ថ្លៃបានឡើយ។ ទោះជាយ៉ាងណាក៏ដោយ រាជរដ្ឋាភិបាលអាចកែតម្រូវប្រព័ន្ធសេដ្ឋកិច្ចទីផ្សារបាន បន្តិចបន្តួច ក្នុងករណីដែលទីផ្សារនោះ មិនដំណើរការដោយប្រសិទ្ធភាព៖ «សំឡេង»។
អ្នកវិភាគសេដ្ឋកិច្ចវិញបានយល់ឃើញថា រាជរដ្ឋាភិបាលអាចចូលរួមអន្តរាគមន៍នៅសេដ្ឋកិច្ចទីផ្សារ ដើម្បីធានាការប្រកួតប្រជែងពេញលេញ និងធានាឲ្យមានសមធម៌សង្គម។ ទោះជាយ៉ាងណាក៏ដោយ រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ លោក អូន ព័ន្ធមុនីរ័ត្ន ធ្លាប់បានឆ្លើយតបទៅការលើកឡើងរបស់សមាជិកសភាគណបក្សប្រឆាំងថា ក្រសួងបានបើកកិច្ចប្រជុំជាមួយក្រុមហ៊ុនប្រេងសាំងនៅកម្ពុជា កន្លងទៅ គួរតែបញ្ចុះថ្លៃលក់ប្រេងសាំង ដោយសារតែការធ្លាក់ថ្លៃប្រេងនៅលើទីផ្សារអន្តរជាតិ។
ទោះជាយ៉ាងណាក៏ដោយ ប្រជាពលរដ្ឋកម្ពុជា មួយចំនួន បានត្អូញត្អែរថា តម្លៃប្រេងសាំងនៅកម្ពុជា គឺមានតម្លៃខ្ពស់ជាងប្រទេសជិតខាង បើទោះបីជារាជរដ្ឋាភិបាលកម្ពុជា បានប្រកាសថា តម្លៃប្រេងសាំងដែលលក់នៅប្រទេសកម្ពុជា បានបញ្ចុះមកត្រឹម ៤.៧០០រៀលក្នុងមួយលីត្រក្ដី។
បន្ថែមលើនេះ ការវាយតម្លៃរបស់ក្រុមអ្នកសេដ្ឋកិច្ចរកឃើញថា ប្រទេសកម្ពុជាអាចបញ្ចុះតម្លៃលក់ប្រេងសាំងនៅក្រោម ៤.០០០រៀលក្នុងមួយលីត្រ ដោយឈរលើមូលដ្ឋានពីរបាយការណ៍សេដ្ឋកិច្ចនិងហិរញ្ញវត្ថុ នាំចេញនាំចូលប្រេងសាំងនិងការយកពន្ធ។
ការវាយតម្លៃរបស់ក្រុមអ្នកសេដ្ឋកិច្ចដដែលបានបញ្ជាក់ទៀតថា បើផ្អែកលើតម្លៃទីផ្សារប្រេងឆៅអន្តរជាតិបច្ចុប្បន្ន ក្រុមហ៊ុនប្រេងសាំងដែលកំពុងប្រតិបត្តិការទាំងអស់នៅកម្ពុជា បានចំណាយលុយប្រមាណ ៨០លានដុល្លារអាមេរិក លើការនាំចូលប្រេងសាំង មានចំនួន ១.៦លានតោននៅឆ្នាំ២០១៣ ក្នុងនោះរាជរដ្ឋាភិបាលកម្ពុជា អាចប្រមូលពន្ធពីវិស័យនេះ មានចំនួនជាង ៥៤០លានដុល្លារអាមេរិក។
បើបូកបន្ថែមលើការបង់ពន្ធ និងការចំណាយថ្លៃដើមនាំចូលប្រេងសាំងពីបរទេសនោះ តម្លៃប្រេងសាំងនៅកម្ពុជា មានតម្លៃប្រមាណ ៣.៥០០រៀលប៉ុណ្ណោះក្នុងមួយលីត្រ។ ប៉ុន្តែបើធៀបនឹងតម្លៃលក់បច្ចុប្បន្ន គឺមានតម្លៃខ្ពស់ជាងនេះ ដែលមានតម្លៃរហូតដល់ ៤.៩០០រៀលក្នុងមួយលីត្រ។ តួលេខនេះ បញ្ជាក់ថា ផលចំណេញរបស់ក្រុមហ៊ុនប្រេងសាំងនៅកម្ពុជា ទាំងអស់ មានចន្លោះពីជាង ២.១០០លានដុល្លារអាមេរិក ទៅជាង ២.៤០០លានដុល្លារក្នុងមួយឆ្នាំ ឬប្រេងសាំងក្នុងមួយលីត្រ ក្រុមហ៊ុនលក់យកចំណេញពីអតិថិជនរហូតដល់ ១.៥០០រៀល៕ ប្រភពៈ RFA
