តើចិន ជប៉ុនអាចធ្វើការជាមួយគ្នា ដើម្បីបន្ថយភាពតានតឹងដែរឬទេ?
រដ្ឋមន្រ្តីការបរទេសចិន និងជប៉ុនបានជួបពិភាក្សាគ្នា ជាផ្លូវការ កាលពីថ្ងៃសៅរ៍ម្សិលមិញ ក្នុងទីក្រុងប៉េកាំង។ ជំនួបលើកទីមួយ រវាងមន្រ្តីជាន់ខ្ពស់ ចិន និងជប៉ុនធ្វើឡើង នៅមួយថ្ងៃក្រោយប្រទេសទាំងពីរបានសន្យាចូលរួមកាត់បន្ថយភាពតានតឹងដែលជប៉ុន និងចិនកំពុងមានជាមួយគ្នា។
នាយករដ្ឋមន្រ្តីជប៉ុនធ្វើដំណើរទៅចូលរួមកិច្ចប្រជុំកំពូលស្តីពីសហប្រតិបត្តិការសេដ្ឋកិច្ចអាស៊ី ប៉ាស៊ីហ្វិកនៅទីក្រុងប៉េកាំង នៅថ្ងៃចន្ទទី ១០វិច្ឆិកា
©REUTERS/Kim Kyung-Hoon
ចាប់តាំងពីចិន និងជប៉ុនមានភាពតានតឹងនឹងគ្នា ក្នុងរយៈពេលពីរឆ្នាំចុងក្រោយ នេះជាលើក ទីមួយ ដែលមន្រ្តីជាន់ខ្ពស់របស់ចិន និងជប៉ុនបានជួបពិភាក្សាគ្នាជាផ្លូវការ។ នៅក្នុងជំនួប ជាមួយរដ្ឋមន្រ្តីការបរទេសជប៉ុន ដែលធ្វើនៅក្រៅក្របខ័ណ្ឌកិច្ចប្រជុំ ត្រៀមបើកវេទិការសហប្រតិបត្តិការសេដ្ឋកិច្ចអាស៊ី ប៉ាស៊ីហ្វិក ក្នុងទីក្រុងប៉េកាំង រដ្ឋមន្រ្តីការបរទេសចិនបានអះអាងថា កិច្ចព្រមព្រៀងដែលប្រទេសទាំងពីរបានធ្វើជាមួយគ្នាកាលពីថ្ងៃសុក្រ បញ្ជាក់ពីការបោះជំហានទៅមុខ យ៉ាងសំខាន់។ នេះបើតាមការចុះផ្សាយរបស់កាសែតចិនថ្មី។
កាលពីថ្ងៃសុក្រ នៅក្នុងសេចក្តីថ្លែងការណ៍ ពីរផ្សេងគ្នា ចិន និងជប៉ុនបានលើកឡើងថា ប្រទេសជិតខាងទាំងពីរ យល់ព្រមឲ្យមានការចរចាឡើងវិញ ខាងផ្នែកនយោបាយ ការទូត និងសន្តិសុខ។ តាមទូរទស្សន៍ជប៉ុនវិញ លោករដ្ឋមន្រ្តីការបរទេស ជប៉ុនបានវាយតម្លៃថា ការពិភាក្សាជាមួយរដ្ឋមន្រ្តីការបរទេសចិនបានជួយបើកផ្លូវ ដើម្បីឲ្យចិន ជប៉ុនត្រលប់ទៅមានទំនាក់ទំនងធម្មតានឹងគ្នាវិញ។
លោកស៊ីនហ្សូ អាបេ នាយករដ្ឋមន្ត្រីជប៉ុន ធ្លាប់បានបង្ហាញចេតនា ចង់បើកកិច្ចចរចាជាមួយលោកប្រធានាធិបតីចិន ស៊ី ជីនពីង ប៉ុន្តែប៉េកាំងតែងបដិសេធរហូតមក។ ប៉េកាំង បដិសេធ ដោយសារតែរឿងអតីតកាលប្រវត្តិសាស្រ្ត និងដោយសារជម្លោះដីកោះសេនកាគូ ឬដែលចិនហៅទៀវយូ។
កន្លងមក ទីក្រុងតូក្យូធា្លប់អះអាងថា ប្រជុំកោះសេនកាគូមិនមែនជាប្រភពជម្លោះរវាងចិន និងជប៉ុន ពីព្រោះថា ប្រជុំកោះជាកម្មសិទ្ធិផ្តាច់មុខរបស់ជប៉ុន ដែលគេមិនត្រូវលើកយកមកនិយាយចរចាអ្វីទាំងអស់។ ប៉ុន្តែ កាលពីពេលថ្មីៗ រដ្ឋាភិបាលជប៉ុនទើបបានប្តូរជំហរ ដោយបានទទួលស្គាល់ថា ពិតជាមានភាពតានតឹងជាមួយចិន ដោយសាររឿងប្រជុំកោះមែន។ នៅក្នុងសេចក្តីប្រកាសព័ត៌មានមួយ ទីក្រុងតូក្យូបានបង្ហាញចេតនាចង់បង្កើតយន្តការពិភាក្សា មួយជាមួយចិន នៅក្នុងករណីមានវិបត្តិ ពោលគឺដើម្បីជៀសវាងកុំឲ្យសា្ថនភាពអាក្រក់ កាន់តែធ្លាក់ដុនដាប។
ការប្តូរជំហររបស់ជប៉ុន រួមផ្សំនឹងកិច្ចព្រមព្រៀង កាលពីថ្ងៃសុក្រ ដើម្បីចូលរួមកាត់បន្ថយភាពតានតឹងរវាងប្រទេសទាំងពីរ អាចធ្វើឲ្យជឿថា នឹងអាចមានជំនួបកំពូលរវាងលោកប្រធានាធិបតីចិន និងលោកនាយករដ្ឋមន្រ្តីជប៉ុន នៅក្រៅក្របខ័ណ្ឌជំនួបកំពូលAPEC នៅថ្ងៃចន្ទ។ ប៉ុន្តែ យ៉ាងណាក៏ដោយ រហូតមកដល់ព្រឹកថ្ងៃអាទិត្យ នៅមិនទាន់មានភាគី ណាមួយបានប្រកាស ឬបញ្ជាក់ថា នឹងមាន ជំនួបកំពូលចិន ជប៉ុន នៅថ្ងៃចន្ទស្អែកដែរ ឬយ៉ាងណានោះទេ៕ ប្រភព ៖ rfi
