រឿងកីឡាករទៅប្រកួតនៅក្រៅប្រទេសអត់ច្បាប់ ឈានដល់ក្រសួងអប់រំ
សហព័ន្ធកីឡាប្រដាល់កម្ពុជាបានស្នើទៅក្រសួងអប់រំ យុវជន និងកីឡាដើម្បីចាត់វិធានការឲ្យមានប្រសិទ្ធភាពចំពោះកីឡាករប្រដាល់រូបណាដែលចេញទៅប្រកួតនៅក្រៅប្រទេសដោយពុំមានច្បាប់អនុញ្ញាតត្រឹមត្រូវ បន្ទាប់ពីសហព័ន្ធមួយនេះមិនអាចគ្រប់គ្រងលើកីឡាករបានល្អ។
លោក មាស សុខគ្រី អតីតស្ថាបនិកក្លិបក្រសួងមហាផ្ទៃ និងជាសមាជិកគណៈកម្មការចៅក្រម និងអាជ្ញាកណ្ដាលនៃសហព័ន្ធកីឡាប្រដាល់កម្ពុជាបានឲ្យដឹងថា សហព័ន្ធកីឡាប្រដាល់កម្ពុជាដែលមានលោក តែម ម៉ឺន ជាប្រធានបានស្នើទៅក្រសួងអប់រំ យុវជន និងកីឡារួចហើយ ហើយខាងក្រសួងក៏បានផ្ដល់សញ្ញាវិជ្ជមានដើម្បីចាត់វិធានការជុំវិញករណីនេះ។
លោកនិយាយថា ៖«កន្លងមកយើងអត់បានចាត់វិធានការក្ដៅទេ អីចឹងហើយបានជាកីឡាករមួយចំនួនបានចិត្តចេញទៅប្រកួតតាមទំនើងចិត្ត។ ពេលនេះយើងធ្វើមែនទែន យើងបានរៀបចំរួចរាល់ ហើយខាងក្រសួងក៏បានផ្ដល់ភ្លើងខៀវឲ្យយើងចាត់វិធានការហើយ»។
លោក តែម ម៉ឺន (កណ្តាល) សេន ប៊ុនថេន (ស្តាំ) និងកីឡាករបារាំង (ឆ្វេង)
លោកបានបញ្ជាក់ពីចំណាត់ការថា ៖«សហព័ន្ធចាត់វិធានការតាមផ្លូវការទូត។ យើងធ្វើលិខិតជាលាយលក្ខណ៍អក្សរផ្ញើទៅគ្រប់ច្រកចេញ-ចូលតាមព្រំដែន អាជ្ញាធរថៃ និងទៅស្ថានភាពឲ្យបានច្បាស់ថា ប្រសិនបើកីឡាករខ្មែរណាមួយចេញទៅប្រកួតនៅថៃ ឬនៅប្រទេសផ្សេងទៀតដោយគ្មានច្បាប់អនុញ្ញាតទេ ត្រូវចាត់វិធានការតាមច្បាប់ ហើយបញ្ជូនមកស្រុកខ្មែរ វិញ។ យើងនឹងចាត់វិធានការតាមផ្លូវច្បាប់ចំពោះពួកគេ»។
«សហព័ន្ធមិនមែនជាអ្នកចិញ្ចឹមកីឡាករមែន តែក៏មិនហាមឃាត់មិនឲ្យពួកគេចេញទៅប្រកួតនៅក្រៅប្រទេសដែរ សហព័ន្ធយើងគ្រាន់តែត្រូវគ្រប់គ្រងកីឡាករឲ្យមានច្បាប់ទម្លាប់ត្រឹមត្រូវក្នុងគោលបំណងរក្សាកេរ្តិ៍ឈ្មោះ តម្លៃ និងកិត្តិយសនៃក្បាច់គុនខ្មែរបុរាណ»។
«កីឡាករបើស្រលាញ់លុយពេក ដូចជាលក់ឧត្ដមគតិរបស់ខ្លួន លក់ក្បាច់គុនបុរាណខ្មែរ។ ម្យ៉ាងទៀតខាងភាគីថៃហាក់ដូចជាលួចយើងអីចឹង បើខ្លួនពិតជាមានក្បាច់គុនរបស់ខ្លួនមែន ហេតុអីចំបាច់លួចលាក់យកកីឡាករខ្មែរទៅស្ងាត់ៗធ្វើអី ម៉េចមិនធ្វើតាមផ្លូវច្បាប់ទូតឲ្យបានត្រឹមត្រូវ»។
លោកបន្តថា ប្រសិនបើនៅតែបណ្ដែតបណ្ដោយឲ្យកីឡាករចេញទៅប្រកួតនៅក្រៅប្រទេសដូចជាប្រទេសថៃជាដើមដោយគ្មានច្បាប់គ្រប់គ្រងត្រឹមត្រូវទេនោះ វាប្រៀបដូចជាយកក្បាច់គុនមរតកដូនតាខ្មែរ កិត្តិយស និងមុខមាត់ប្រទេសជាតិទៅចាក់ចោល និងបន្ទាបបន្ថោកនៅស្រុកគេ ពីព្រោះកីឡាករខ្មែរមួយចំនួនដែលចេញទៅប្រកួតគ្មានគិតអ្វីក្រៅពីតែពីរឿងលុយ។ ពួកគេមានមេខ្យល់ដឹកនាំយកទៅប្រកួតដើម្បីជាល្បែងភ្នាល់តែប៉ុណ្ណោះ។ កន្លងមកមានកីឡាករណាម្នាក់ធ្លាប់ទទួលបានជ័យជម្នះទេពេលចេញទៅប្រកួតម្តងៗ? អត់មានទេឃើញតែចាញ់។
លោកបន្តរៀបរាប់ថា ម្យ៉ាងទៀតកីឡាករល្អៗមួយចំនួនដូចជា សេន ប៊ុនថេន និងវង្ស ណយជាដើម្បីសុទ្ធតែជាកីឡាករល្អ ប៉ុន្តែទៅប្រកួតពេលណាក៏បរាជ័យដែរដោយសារតែគ្មានអ្នកចាត់ចែងការប្រកួតឲ្យបានត្រឹមត្រូវ។ ភាពអនាធិបតេយ្យបែបនេះ យូរៗពួកគេក្លាយជាកីឡាករអន់អស់។
កន្លងមកសហព័ន្ធកីឡាប្រដាល់កម្ពុជាធ្លាប់ចាត់វិធានការដែរចំពោះកីឡាករមួយចំនួនដែលចេញទៅប្រកួតនៅក្រៅប្រទេស ប៉ុន្តែវិធានការទាំងនោះហាក់ធូររលុងដែលបណ្ដាលឲ្យកីឡាករនៅតែបានចិត្តចេញទៅប្រកួតដោយគ្មានសុំការអនុញ្ញាតពីក្លិប និងសហព័ន្ធឡើយ។
វង្ស ណយ លើឆាកប្រដាល់នៅប្រទេសថៃកាលពីប៉ុន្មានថ្ងៃមុន (រូបថត វង្ស ណយ)
ជារឿយៗកីឡាករមួយចំនួនចេញទៅប្រកួតនៅប្រទេសថៃមិនសុំការអនុញ្ញាតពីក្លិបរបស់ខ្លួន និងសហព័ន្ធកីឡាប្រដាល់កម្ពុជាឡើយ បើទោះជាសហព័ន្ធមិនមានការកាត់លុយលើឯកសារក៏ដោយ។
ជាក់ស្តែង សេន ប៊ុនថេនអត់បានចេញទៅប្រកួតនៅ Thai Fight ម្តងហើយដោយសារមិនបានសុំការអនុញ្ញាតពីក្លិបនិងសហព័ន្ធ។ ប៉ុន្តែបន្ទាប់ពីមកពីប្រទេសបារាំង សេន ប៊ុនថេនចេញទៅប្រកួតនៅថៃទាល់តែបានដោយចាញ់ពិន្ទុ ហើយរងការរិះគន់យ៉ាងខ្លាំងពីមហាជន និងសហព័ន្ធចំពោះការពាក់ខ្សែក្បាលដូចថៃ។ នៅថ្ងៃទី២៥ ខែតុលាខាងមុខនេះ សេន ប៊ុនថេនឈ្មោះប្រកួតនៅថៃទៀត ខណៈសហព័ន្ធ និងក្លិបដែលជាអាណាព្យាបាលអត់ដឹងទៀត។ កាលពីប៉ុន្មានថៃមុនជើងខ្លាំង វង្ស ណយ បានចេញទៅប្រកួតនៅថៃដោយគ្មានការអនុញ្ញាតទៀត ហើយលទ្ធផលចាញ់ដោយសន្លប់ពាក់កណ្តាលទី៕
អត្ថបទ៖ ជាន ចាន់រ៉ា
