ស្ត្រីម្នាក់ត្រូវបានគេ វាយបាក់កនិងបាក់ឆ្អឹង ជំនីប្រកាច់និងបានស្លាប់ ពេលបញ្ជូនមកដល់មន្ទីរពេទ្យ
ខេត្តកំពង់ឆ្នាំង ៖ ស្ត្រីម្នាក់ត្រូវបានអ្នកឃ្វាលគោប្រទះឃើញប្រកាច់ និងមានរបួសជាច្រើនកន្លែង ហើយបានស្លាប់ពេលបញ្ជូនមកដល់មន្ទីរពេទ្យបង្អែកខេត្តកំពង់ឆ្នាំង ។ ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោងជាង២រសៀល ថ្ងៃទី១ ខែតុលា ឆ្នាំ២០១៤ នៅភូមិត្រពាំងមាស ឃុំត្រងិល ស្រុកកំពង់លែង ខេត្តកំពង់ឆ្នាំង ។
ស្ត្រីរងគ្រោះមានឈ្មោះ យន យៀង អាយុ៥៤ឆ្នាំ រស់នៅភូមិស្នោ ឃុំខុនរ៉ង ស្រុកបរិបូរណ៌ មកវ៉ៃថ្មនៅភូមិទំពាំងមាស ឃុំត្រងិល ស្រុកកំពង់លែង ខេត្តកំពង់ឆ្នាំង ។
តាមប្រភពពីសមត្ថកិច្ចបានអោយដឹងថា ក្រោយវេលាកើតហេតុ មានអ្នកស្រុកឡើងទៅឃ្វាលគោលើភ្នំ ក៏មានឮសំឡេងមនុស្សស្រែកអោយជួយ ពេលទៅមើលឃើញស្ត្រីឈ្មោះ យន យៀង កំពុងតែដេកប្រកាច់ ក៏បានហៅអ្នកភូមនៅក្បែរនោះមកជួយដឹកមកសង្គ្រោះនៅមណ្ឌលសុខភាព ប៉ុន្តែដោយសារស្ថានភាពធ្ងន់ធ្ងរពេក គ្រូពេទ្យបានបញ្ជូនមកសង្គ្រោះបន្តនៅមន្ទីរពេទ្យបង្អែកខេត្តកំពង់ឆ្នាំង ហើយត្រូវបានស្លាប់នៅមន្ទីរពេទ្យបង្អែកខេត្ត ។ ក្រោយពីស្លាប់សាកសពជនរងគ្រោះត្រូវបានដឹកទៅលំនៅដ្ឋាននៅស្រុកបរិបូរណ៌ ។
ប្រភពបានបន្តថា ដោយសារក្រុមគ្រួសារមានការសង្ស័យករណីស្លាប់របស់ជនរងគ្រោះ រាយការណ៍ទៅនគរបាលស្រុកបរិបូរណ៌ អោយធ្វើការពិនិត្យសាកសព ដោយសហការជាមួយនគរបាលការិយាល័យបច្ចេកទេស នៃស្នងការដ្ឋាននគរបាលខេត្ត បានពិនិត្យឃើញថា ការស្លាប់របស់ជនរងគ្រោះ មានស្នាមវាយត្រង់ក បណ្តាលអោយបាក់ក បាក់ឆ្អឹងជំនីរ និងស្នាមជាំជាច្រើនកន្លែងទៀត ដែលគេសន្និដ្ឋានថា ជាករណីឃាតកម្មមកលើស្ត្រីរូបនេះ ។ នៅកន្លែងកើត ហេតុសមត្ថកិច្ចបានរកឃើញមានដែកស្បៃ ដំបង ហើយជនរងគ្រោះត្រូវបានវាយនៅជើងភ្នំ រួចអូសយកទៅលើភ្នំចំងាយពីប្រមាណ៥០ម៉ែត្រ ជនរងគ្រោះបានគ្របនឹងដើមកន្ទ្រាំងថែត.។
ប្រជាពលរដ្ឋនៅភូមិឃុំកើតហេតុបានអោយដឹងថា ស្ត្រីរងគ្រោះមកវាយថ្មនៅទីនោះ គឺនៅជាមួយនិងកូនចិញ្ចឹមម្នាក់ ឈ្មោះ រ៉ា ភេទប្រុស ហើយកូនចិញ្ចឹម និងជនរងគ្រោះនោះពុំសូវដែលត្រូវគ្នានោះទេ ឈ្លោះគ្នាសឹងរាល់ថ្ងៃ ។ នៅមុនពេលកើតហេតុ កូនប្រុសចិញ្ចឹមនេះក៏នៅជាមួយគ្នាដែរ ប៉ុន្តែក្រោយពេលកើតហេតុ កូនចិញ្ចឹមឈ្មោះ រ៉ា នេះបានគេចខ្លួនបាត់តាំងពីថ្ងៃ១ ខែតុលា មកម្ល៉េះ ។ នៅពេលនេះ សមត្ថកិច្ចកំពុងធ្វើការស្រាវជ្រាវ និងស៊ើបអង្កេតបន្តដើម្បីឈានទៅចាប់ខ្លួនជនដៃដល់យកមកផ្តន្ទាទោស ៕
ប្រភពពី នគវត្ត
Read more: http://www.cambodiapage.info/?p=43440#ixzz3EyRqksH7
