មន្ត្រីអូស្ត្រាលីថាកម្ពុជា ទទួលជំនួយប្រមាណ ៣៥លានដុល្លារជាថ្នូរ នឹងការទទួលជនភៀសខ្លួន
មន្ត្រីជាន់ខ្ពស់អូស្ត្រាលីឲ្យដឹងថារដ្ឋាភិបាលប្រទេសអូស្ត្រាលីបានចំណាយទឹកប្រាក់ជំនួយបន្ថែមចំនួន៣៥លានដុល្លារសម្រាប់រយៈពេល៤ឆ្នាំ ជាថ្នូរនឹងការផ្ទេរជនភៀសខ្លួនពីប្រទេសរបស់ខ្លួនមកកម្ពុជា។រដ្ឋាភិបាលកម្ពុជា និងអូស្ត្រាលីសម្រេចចុងក្រោយក្នុងការចុះហត្ថលេខាលើអនុស្សរណៈទទួលយកជនភៀសខ្លួនពីប្រទេសអូស្ត្រាលីមកតាំងទីលំនៅក្នុងប្រទេសកម្ពុជា នៅថ្ងៃទី២៦ ខែកញ្ញា ឆ្នាំ២០១៤ វេលាម៉ោង៣រសៀលនៅទីស្តីការក្រសួងមហាផ្ទៃ។
មុនពេលធ្វើដំណើរមកកម្ពុជាដើម្បីចុះហត្ថលេខាលើអនុស្សរណៈយោគយល់គ្នានេះ លោក ស្កុត ម៉ូរីសុន (Scott Morrison) រដ្ឋមន្ត្រីក្រសួងអន្តោប្រវេសន៍ និងកិច្ចការពារព្រំដែនអូស្ត្រាលី ប្រាប់សារព័ត៌មានអូស្ត្រាលីABCថាប្រទេសអូស្ត្រាលីនឹងផ្តល់ជំនួយបន្ថែមចំនួន៣៥លានដុល្លារលើជំនួយដែលមានស្រាប់ជាង៧៩លានដុល្លារ សម្រាប់គម្រោងលើផ្នែកអង្ករ ការដោះមីន និងកំណែទម្រង់ប្រព័ន្ធបោះឆ្នោតជាដើម។លោកបន្តថារដ្ឋាភិបាលអូស្ត្រាលីនឹងចំណាយលើការស្នាក់នៅផ្សេងៗទៀតដល់ជនភៀសខ្លួន។
VODមិនអាចសុំការអត្ថាធិប្បាយពីរដ្ឋមន្ត្រីក្រសួងមហាផ្ទៃ លោក ស ខេង ភ្លាមៗបាននៅឡើយទេ។
លោក ស្កុត ម៉ូរីសុន ឲ្យដឹងទៀតថាការផ្ទេរជនភៀសខ្លួនមកកម្ពុជាអាចនឹងត្រូវធ្វើឡើងនៅចុងឆ្នាំ២០១៤នេះ ដោយមិនមានការកំណត់ចំនួនឡើយ។លោកបន្តថាការផ្ទេរជនភៀសខ្លួននេះនឹងជួយប្រទេសអូស្ត្រាលីអាចសម្រេចនូវគោលនយោបាយ«មិនមាននរណាម្នាក់មកតាំងទីលំនៅក្នុងប្រទេសអូស្ត្រាលី»។ក្នុងរយៈពេលប៉ុន្មានខែថ្មីៗនេះ ប្រទេសអូស្ត្រាលីបានណែនាំគោលនយោបាយចម្រូងចម្រាសមួយក្នុងគោលបំណងលុបបំបាត់លំហូរទូកជនភៀសខ្លួនពីប្រទេសឥណ្ឌូនេស៊ី។
សារព័ត៌មានBBCរាយការណ៍ថាជនភៀសខ្លួនទាំងនោះមកពីប្រទេសអាហ្គានីស្ថាន ស្រីលង្កា អ៊ីរ៉ាក់ និងអ៊ីរ៉ង់ ដែលបានធ្វើដំណើរមកតំបន់កោះអូស្ត្រាលីតាមរយៈទូកពីប្រទេសឥណ្ឌូនេស៊ី។
រហូតមកដល់ពេលនេះ សង្គមស៊ីវិលជាតិ និងអន្តរជាតិ បានរិះគន់ទៅលើគម្រោងនៃការចុះកិច្ចព្រមព្រៀងទទួលយកជនភៀសខ្លួននេះ ដោយសារពួកគេយល់ថាកម្ពុជាមិនមានសមត្ថភាពគ្រប់គ្រាន់ និងមិនមានហេដ្ឋារចនាសម្ព័ន្ធក្នុងការទទួលយកជនភៀសខ្លួនពីអូស្ត្រាលី មកស្នាក់នៅនៅពេលនេះ។ ចំណុចខ្វះខាតមួយចំនួនទៀត ដែលកម្ពុជាមិនអាចបំពេញតម្រូវការជនភៀសខ្លួនបាន រួមមានអត្រាមិនមានការងារធ្វើខ្ពស់ ប្រព័ន្ធអប់រំនៅមានកម្សោយ ប្រព័ន្ធសុខាភិបាលមិនគ្រប់គ្រាន់ បញ្ហាអំពើពុករលួយ ការគោរពសិទ្ធិមនុស្សនៅមានកម្រិត និងបញ្ហាដីធ្លី។
កាលពីថ្ងៃព្រហស្បតិ៍ រដ្ឋមន្ត្រីក្រសួងមហាផ្ទៃ លោក ស ខេង មានប្រសាសន៍ថាកម្ពុជានឹងទទួលយកជនភៀសខ្លួនតិចតួចសិនក្នុងដំណាក់កាលសាកល្បង មុននឹងឈានទៅយករាប់រយនាក់។លោកបន្តថារដ្ឋាភិបាលនឹងបន្តធ្វើការងារនេះ ដើម្បីធានាថាកិច្ចព្រមព្រៀងមានអត្ថប្រយោជន៍ដល់កម្ពុជា។
លោក ស្កុត ម៉ូរីសុន(Scott Morrison) មានប្រសាសន៍ថាការរៀបចំជនភៀសខ្លួនមកកម្ពុជាជាការស្ម័គ្រចិត្ត ហើយអ្នកណាដែលជ្រើសរើសទៅកម្ពុជា សម្រេចដោយខ្លួនឯង។លោកបញ្ជាក់ថាការតាំងទីលំនៅនឹងមានលក្ខណៈអចិន្ត្រៃយ៍សម្រាប់អ្នកដែលជ្រើសរើសយកការរៀបចំនេះ។
រដ្ឋាភិបាលអូស្ត្រាលី គ្រោងនឹងផ្ទេរជនភៀសខ្លួនចំនួន១០០០នាក់ ចេញពីមណ្ឌលឃុំឃាំង Nauru ដើម្បីធ្វើឲ្យមណ្ឌលនេះទូលាយជាងមុន ដោយសារតែបច្ចុប្បន្នមានមនុស្សជាប់ឃុំនៅក្នុងនោះ រហូតដល់ទៅ១១៤៦ នាក់៕
ប្រភពពី vodhotnews
