បុគ្គលិកក្រុមហ៊ុន ឋានសួគ៌បូកគោផ្នែក ចុងភៅតវ៉ាទាមទារ ដំឡើងឋានៈនិងប្រាក់ខែ
បុគ្គលិក
ផ្នែកផ្ទះបាយ និងចុងភៅចំនួន ២០នាក់
បម្រើការងារនៅក្រុមហ៊ុនឋានសួគ៌បូកគោ ក្នុងខេត្តកំពត
នាំគ្នាតវ៉ាមិនចូលធ្វើការឈានចូលដល់ថ្ងៃទី២ គិតត្រឹមថ្ងៃទី៥
ខែកញ្ញា ដោយទាមទារអោយថៅកែដំឡើងឋានៈ
និងប្រាក់ខែទៅតាមបទពិសោធន៍ការងាររបស់ពួកគេ។ការតវ៉ានេះ បានធ្វើឡើងក្រោយពីអ្នកគ្រប់គ្រងនៅក្រុមហ៊ុនឋានសួគ៌បូកគោ បានប្រជុំជាមួយបុគ្គលិក ហើយបដិសេធសំណើពួកគេដែលបានដាក់ទៅក្រុមហ៊ុន កាលពីថ្ងៃទី៤ ខែកញ្ញា។
បុគ្គលិកក្រុមហ៊ុនឋានសួគ៌បូកគោ ផ្នែកផ្ទះបាយ និងចុងភៅប្រមាណ ២០នាក់ គ្រោងដាក់ពាក្យប្ដឹងទៅមន្ទីរការងារ ខេត្តកំពត ប្រសិនបើភាគីក្រុមហ៊ុនមិនដោះស្រាយសំណើសុំដំឡើងឋានៈ និងប្រាក់ខែ។
ស្ត្រីចុងភៅផ្នែកម្ហូបត្រជាក់ ឈ្មោះ ធី ចាន់ធៀន ឲ្យដឹងថា គាត់បម្រើការងារនៅក្រុមហ៊ុនឋានសួគ៌បូកគោ ជិត ៤ឆ្នាំហើយ។ ពួកគាត់ទទួលប្រាក់ខែ ១០០ដុល្លារ ហើយធ្វើការមួយថ្ងៃ ៩ម៉ោង។ លោកស្រីថា បើថ្ងៃបុណ្យវិញ ពួកគាត់ដាំស្លស្ទើរពេញ១ថ្ងៃ១យប់ ព្រោះភ្ញៀវច្រើន អ្នកធ្វើការនៅចង្ក្រានបាយរវល់ខ្លាំង ត្រូវជួយគ្នាដើម្បីបម្រើភ្ញៀវឲ្យពេញចិត្ត។
ប្រភពដដែលបន្តថា ពីមុនមក ពួកគាត់មិនតវ៉ាដំឡើងប្រាក់ខែ និងឋានៈទេ ព្រោះក្រុមហ៊ុនទើបបើកថ្មី។ ប៉ុន្តែឥឡូវ ក្រុមហ៊ុនដំណើរការល្អ មានភ្ញៀវច្រើនរយនាក់ក្នុង១ថ្ងៃៗ ទើបពួកគាត់សុំថៅកែដំឡើងប្រាក់ខែពី ២០ ទៅ ៣០ដុល្លារ ក្នុង១ខែ និងសុំដំឡើងឋានៈឲ្យត្រូវតាមបទពិសោធន៍ការងារយូរឆ្នាំ៖ «បញ្ហា ហ្នឹង ពួកខ្ញុំបានលើកច្រើនសាហើយរយៈពេលកន្លះឆ្នាំ ចូលជិត១ឆ្នាំហើយ ប៉ុន្តែពួកគាត់អត់មានដំណោះស្រាយឲ្យពួកខ្ញុំ គឺនៅតែសន្យាៗ អត់មានបានអីផង»។
កម្មករលាងចាន ឈ្មោះ អ៊ិត មានិត ឲ្យដឹងថា ពួកគាត់តវ៉ាក្រោយពីអ្នកគ្រប់គ្រង ប្រជុំមិនទទួលសំណើពួកគាត់។ លោកថា ពួកគាត់នៅចង្ក្រានបាយ ធ្វើការលើសម៉ោងក្នុង១ថ្ងៃមិនតិចជាង ២ម៉ោងចំពោះថ្ងៃធម្មតា។ ប៉ុន្តែបើថ្ងៃបុណ្យ ពួកគាត់មិនបានឈប់ដូចគេឯង ហើយធ្វើការស្ទើរដល់ភ្លឺ ក៏ថៅកែមិនលើកទឹកចិត្តដែរ។ មូលហេតុនេះ ទើបបុគ្គលិកនៅចង្ក្រានបាយ ទាំងចុងភៅ និងកម្មករប្រមាណ ២០នាក់ មិនចូលរួមធ្វើការនៅថ្ងៃទី៤ និងថ្ងៃទី៥ ខែកញ្ញា រង់ចាំការសម្រេចពីអ្នកគ្រប់គ្រងក្រុមហ៊ុនឋានសួគ៌បូកគោ៖«ខាង អូតែល គាត់អត់ឲ្យពួកខ្ញុំចូលទៅក្នុងក្រុមហ៊ុន តែខ្ញុំចូលសួរគាត់ថា តើក្រុមហ៊ុនបញ្ឈប់ដេញខ្ញុំឬអត់? គាត់ថា ក្រុមហ៊ុនមិនដេញទេ តែសំខាន់ពេលដែលយើងស្ថិតនៅក្នុងការតវ៉ា គឺគាត់អត់ឲ្យបាយទឹក ហើយនិងអត់ឲ្យកន្លែងស្នាក់នៅ»។
ពាក់ព័ន្ធបញ្ហានេះ តំណាងក្រុមហ៊ុនឋានសួគ៌បូកគោ យក់ សេដ្ឋា មិនធ្វើអត្ថាធិប្បាយទេនៅថ្ងៃទី៥ ខែកញ្ញា។
សមាជិកក្រុមប្រឹក្សាខេត្តកំពត អ្នកស្រី សំ ចរិយា ថ្លែងថា បុគ្គលិកក្រុមហ៊ុនឋានសួគ៌បូកគោ ប្ដឹងមកដល់ក្រុមប្រឹក្សាខេត្តឲ្យជួយអន្តរាគមន៍។ លោកស្រីនឹងលើកពាក្យបណ្ដឹងនេះពិភាក្សានៅក្នុងការប្រជុំថ្នាក់ ខេត្ត៖ «ខាងបូកគោហ្នឹង ត្រូវមានគោលនយោបាយ បើថាចង់ដេញគាត់ចេញ ក៏ត្រូវគិតជូនគាត់គោលនយោបាយ ៣ខែ ៥ខែអ៊ីចឹងទៅ ដើម្បីឲ្យគាត់ទម្រាំរកការងារថ្មី»។
មន្ត្រីស៊ើបអង្កេតអង្គការលីកាដូ (Licadho) លោក យន់ ផល្លី ឲ្យដឹងថា បុគ្គលិកក្រុមហ៊ុនឋានសួគ៌បូកគោ កំពុងរៀបចំដាក់ពាក្យប្ដឹងទៅមន្ទីរការងារខេត្តកំពត ឲ្យជួយដោះស្រាយការទាមទាររបស់ពួកគេ។ លោកថា ទោះជាយ៉ាងណា ក្រុមហ៊ុននោះមិនទាន់មានការរំលោភសិទ្ធិមនុស្សធ្ងន់ធ្ងរនៅឡើយ៖ «រឿង ទាក់ទិននឹងតវ៉ា បើសិនគាត់នៅបន្តតវ៉ា ឲ្យគេមានដំណោះស្រាយ គាត់មានតែចុះមកក្រោមទេ ដើម្បីយើងដាក់បណ្ដឹងទៅតាមនីតិវិធីទៅ គឺទៅមន្ទីរការងារ ដើម្បីឲ្យខាងមន្ទីរការងារ គេមានវិធានការមកវិញ»។
បុគ្គលិកចុងភៅក្រុមហ៊ុនឋានសួគ៌បូកគោ មួយចំនួនឲ្យដឹងថា ពួកគាត់មានសញ្ញាបត្រចុងភៅ ទើបសុំឲ្យក្រុមហ៊ុនវាយតម្លៃការងារ បទពិសោធន៍ការងារ ហើយផ្តល់ប្រាក់ខែតាមសញ្ញាបត្រដែលមាន៕
ប្រភពពី វិទ្យុអាស៊ីសេរី
