ហ៊ុយ ច័ន្ទរាជនី ប្រកាសទទួលថត ឈុតក្តៅសាច់
ភ្នំពេញៈ
បើទោះជាដឹងថា
សំឡេងនៃការរិះគន់នៅតែបន្តកើតមានក្នុងឈុតសម្តែងស្រើបស្រាល
សិចស៊ីលែងល្វែងខាងលើរបស់ កញ្ញា ឌុច លីដា នៅក្នុងរឿង ស្បែកគង់
ក្តី តែស្រីស្អាតជំនាន់ទី១០ឆ្នាំ២០១១ តួឯកក្នុងរឿង
«ផ្ទះស្នេហ៍» កញ្ញា ហ៊ុយ ច័ន្ទរាជនី
បានប្រកាសពីជំហរទទួលយកការសម្តែងតាមគន្លង របស់ កញ្ញា ឌុច លីដា
ពិសេសឈុតឆាកលែងខ្លួន។ក្នុងជំហរដ៏ម៉ឺងម៉ាត់នោះ ស្រីស្អាតដ៏ស្រស់សោភា មានវ័យ១៩ឆ្នាំ កញ្ញា ហ៊ុយ ច័ន្ទរាជនី បញ្ជាក់ថា៖«មិនទៅខ្លាចទេ ចំពោះឈុតសម្តែង ដូចជា លីដា នៅក្នុងរឿងស្បែកគង់ ឲ្យតែមានផលិតកម្មហៅថត ខ្ញុំនឹងពិចារណាភ្លាម ហើយខ្ញុំក៏ដឹងដែរថា ការថតឈុតបែបនេះ ប្រាកដជាចៀសមិនផុតពីការរិះគន់ឡើយ»។
ស្រីស្អាត ដែលសម្ផស្សមុខមានមន្តស្នេហ៍ទាក់ទាញ និងជាថៅកែហាងលក់អាហារសមុទ្រនៅកោះពេជ្រ ច័ន្ទរាជនី បានលើកជាឧទាហរណ៍មកបង្ហាញមហាជនផងដែរ ពីឈ្មោះតារាសិល្បៈដែលទទួលបានភាពលេចធ្លោ ក្នុងទីផ្សារសម្តែង ដោយសារហ៊ានថតឈុតសិចស៊ី។
នាងរៀបរាប់ឈ្មោះថា មានដូចជា បងស្រី សាន សុម៉ាលី អ្នកបង ចន ច័ន្ទលក្ខិណា បងស្រីវ៉ាង ស្រីណូ និងចុងក្រោយ ឌុច លីដា ជាដើម»។
កញ្ញា ហ៊ុយ ច័ន្ទរាជនី បានលាន់មាត់ថា លីដា នាងមានប្រជាប្រិយភាពហក់ឡើងខ្លាំងនៅឆ្នាំ២០១៤នេះ ពិសេសក្រោយពីនាងថតរឿងស្បែកគង់ ក្នុងឈុតស្រើបស្រាល។
ទន្ទឹមនឹងទំនោរចិត្តទាមទាររកភាពលេចធ្លោក្នុងអាជីពសម្តែងនេះ ស្រីស្អាតជំនាន់ទី១០ម្នាក់នេះ បានអះអាងដដែលថា៖«អត់ខ្លាចសោះ ចំពោះការថតសម្តែងដូច ឌុច លីដា ក្នុងរឿងស្បែកគង់ ព្រោះនោះជាការសម្តែងបែបបច្ចេកវិទ្យាអត់មានប៉ះពាល់អ្វីដល់នាង ខ្ញុំឡើយ ផ្ទុយទៅវិញអាចជួយយឹតយោងកេរ្តិ៍ឈ្មោះកាន់តែល្បីល្បាញថែមទៀត ផង»។
បន្ថែមលើការទទូចនោះ កញ្ញា ហ៊ុយ ច័ន្ទរាជនី បានសម្តែងក្តីសង្ឃឹមប្រយោលថា នាងនឹងទទួលបានប្រជាប្រិយភាពល្បីល្បាញដូច ឌុច លីដា ប្រសិនបើនាងបានសម្តែងឈុតប្លែកៗដូចនេះ។
ឱកាសទទួលបានតំណែងជាតួឯកក្នុងវីដេអូភាគចាក់បញ្ចាំងលើកញ្ចក់ ទូរទស្សន៍ ក្រោយពីទទួលជ័យលាភីជាប់ជាស្រីស្អាតឆ្នាំ២០១១ ហ៊ុយ ច័ន្ទរាជនី ចាប់បានមិនតិចជាង ៥រឿងនោះទេ។ មោទនភាពខ្លាំងនោះ គឺគ្រាន់តែទទួលបានការបំពាក់ព័ទ្ធឆៀងជាស្រីស្អាតភ្លាមនោះ រាជនី ក៏ទទួលបានឱកាសឡើងគ្រងតំណែងតួឯកភ្លែត ក្នុងរឿង «ស្នេហ៍គ្រាដំបូង» ដែលការសម្តែងរបស់រាជនីនោះទៀតសោត ភាគច្រើនចាក់បញ្ចាំងនៅក្នុងកញ្ចក់ទូរទស្សន៍ CTN។
ទទួលស្គាល់ពីឱកាសលេចមុខលើកញ្ចក់ទូរទស្សន៍នេះ រាជនី បានថ្លែងទាំងមោទនភាពថា៖«ដូចជាកម្រដែរ សម្រាប់អ្នកទទួលបានជ័យលាភី ទទួលបានឱកាសសម្តែងភាពយន្តជាតួឯកភ្លាម ប៉ុន្តែខ្ញុំពេលនោះ ខ្ញុំបានភ្លាម ហើយខ្ញុំក៏សប្បាយចិត្តណាស់ដែរ បានទទួលឱកាសសម្តែងជាតួឯកភ្លាមៗក្នុងរឿងស្នេហ៍គ្រាដំបូង សម្តែងជាមួយតួល្បីដូចជាបង សក្ខណា បង នី មុល្លិកា ជាដើម»។
រាជនី បន្តថា៖«ដូចជាចុងក្រោយនេះ រឿង ផ្ទះស្នេហ៍ ដែលខ្ញុំសម្តែងក៏ចាក់បញ្ចាំងនៅក្នុងកញ្ចក់ទូរទស្សន៍ផងដែរ»។
រាជនី ថា ការទាក់ឆក់យកបេះដូងមហាជនឲ្យសើចសប្បាយតាមរយៈការសម្តែង បែបក្រមិចក្រមើម វាហាក់មានកម្រិត ប៉ុន្តែបើសម្តែងដូច លីដានោះក៏ល្អដែរ។ នាងទទូចទៀតថា៖ «មើល ឌុច លីដា ឆ្នាំ២០១៤នេះ ពេលនាងសម្តែងរឿងសិចស៊ីភ្លាម នាងកាន់តែល្បី»៕
_______________________
ប្រភពព័ត៌មានពី៖ ខ្មែរប៉ុស្តិ៍
