សាលាដំបូងភ្នំពេញ ជំនុំជម្រះបណ្តឹង បរិហារកេរ្តិ៍ដែល ឧកញ៉ា កុក អាន ប្តឹង
ភ្នំពេញៈ សាលា
ដំបូងរាជធានីភ្នំពេញ កាលពីថ្ងៃសុក្រ បានលើកយកសំណុំរឿងលោកឧកញ៉ា
កុក អាន ប្រធានក្រុមហ៊ុន អានកូ ប្រាដ័រ ដែលប្តឹងលោក ហេង ឈាង
អតីតអគ្គនាយករងក្រុមហ៊ុន អានកូ ប្រាដ័រ និងអ្នកស្រី ទេព កុលាប
សាកលវិទ្យាធិការនៃសាកលវិទ្យាល័យភ្នំពេញអន្តរជាតិ (PPIU) ពីបទ
«បរិហារកេរ្តិ៍ជាសាធារណៈ» កាលពីអំឡុង ឆ្នាំ២០១២ និងទាមទារជំងឺចិត្ត
១ លានដុល្លារអាមេរិក មកធ្វើការជំនុំជម្រះប៉ុន្តែ
បានសម្រេចលើកការប្រកាសសាលក្រមទៅពេលក្រោយ។
សវនាការជំនុំជម្រះដឹកនាំដោយលោកចៅក្រម
កែវ មុនី និងមានតំណាងអយ្យការលោកស្រីព្រះរាជអាជ្ញារង ស៊ឺ វណ្ណនី
ដែលធ្វើកំបាំងមុខលោក ហេង ឈាង និងអ្នកស្រី ទេព កុលាប ជាចុងចម្លើយ
ប៉ុន្តែនៅចំពោះមុខមេធាវីតំណាងពីររូបមានលោកមេធាវី ពិន វណ្ណៈ
និងមេធាវី អ៊ីវ ប៉ូលី ចំណែកលោកឧកញ៉ា កុក អាន
ជាភាគីដើមចោទក៏អវត្តមានដែរ តែមានលោកមេធាវី ឡុង ដារ៉ា
ជាតំណាងចូលរួម។
លោកចៅក្រម កែវ មុនី បានថ្លែងថា
សំណុំរឿងនេះជនជាប់ចោទឈ្មោះ ហេង ឈាង ភេទប្រុស អាយុ ៤៣ឆ្នាំ និង
ឈ្មោះ ទេព កុលាប ភេទស្រី អាយុ ៣៨ឆ្នាំ (ជាភាគីចុងចម្លើយ)
ត្រូវតំណាងអយ្យការចោទប្រកាន់ពីបទ «បរិហារកេរ្តិ៍ជាសាធារណៈ»
តាមមាត្រា ៣០៥
នៃក្រមព្រហ្មទណ្ឌកម្ពុជាបន្ទាប់ពីត្រូវប្តឹងពីឈ្មោះ កុក អាន
ភេទប្រុស អាយុ ៦០ឆ្នាំ ជាភាគីដើមចោទ។
នៅក្នុងសវនាការលោកមេធាវី ឡុង ដារ៉ា
តំណាងឲ្យដើមចោទបានឡើងថ្លែងនិងលើកពីមូលហេតុនៃការប្តឹងរបស់
កូនក្តីថា លោក ឧកញ៉ា កុក អាន បានប្តឹងប្តីប្រពន្ធរបស់ ហេង ឈាង ចំនួន ២
ករណី។ បណ្តឹង ទី១ ចុះថ្ងៃ ទី២២ ខែវិច្ឆិកា ២០១១ លោកឧកញ៉ា
ប្តឹងអ្នកទាំង ២ ពីបទ «ឆបោកប្រាក់» ក្រោយមកតុលាការបានប្តូរបទចោទ
ទៅជាបទ «រំលោភលើទំនុកចិត្តថ្នាក់អភិបាលពិសេស» វិញ។
សំណុំរឿងនេះកំពុងស្ថិតនៅតុលាការកំពូល។ បណ្តឹង ទី២ ចុះថ្ងៃ ទី២០
ខែធ្នូ ឆ្នាំ២០១៣ លោកឧកញ៉ា កុក អាន បានប្តឹងប្តីប្រពន្ធលោក ហេង ឈាង
ពីបទ «បរិហារកេរ្តិ៍ជាសាធារណៈ»
ពាក់ព័ន្ធនឹងការនិយាយប៉ះពាល់នឹងលោកឧកញ៉ា ដែលបានចោទប្រកាន់ថា
លោកឧកញ៉ា កុក អាន
បានឃុបឃិតជាមួយចៅក្រមទាំងអស់ដែលពាក់ព័ន្ធក្នុងរឿងក្តីរបស់គាត់
ហើយសម្តីនេះត្រូវបានដកស្រង់និងចុះផ្សាយនៅក្នុងកាសែត ៣
មានកាសែតកោះសន្តិភាព កាសែតកម្ពុជាថ្មី និងកាសែត ឌឺឃែមបូឌា ដេលី
កាលពីថ្ងៃ ទី៧ ខែកក្កដា ឆ្នាំ២០១២។
លោក ឡុង ដារ៉ា លើកឡើងថា៖
«ការនិយាយនិងលើកឡើងរបស់លោក ហេង ឈាង
ដែលចុះផ្សាយនៅទំព័រកាសែតទាំងនេះ គឺមានចេតនាមូលបង្កាច់
បង្ខូចកេរ្តិ៍ឈ្មោះនិងបានធ្វើឲ្យប៉ះពាល់ដល់កេរ្តិ៍ឈ្មោះនិង
កិត្តិយសយ៉ាងធ្ងន់ធ្ងរដល់កូនក្តីខ្ញុំ។
ហេតុនេះកូនក្តីខ្ញុំសូមឲ្យតុលាការជួយរកយុត្តិធម៌ដល់រូបគាត់
និងប្តឹងទាមទារជំងឺចិត្តចំនួន ១ លានដុល្លារអាមេរិក»។
ជាការឆ្លើយតបទៅនឹងការលើកឡើងរបស់
មេធាវីលោកឧកញ៉ា កុក អាន នេះ មេធាវីទាំង ២
រូបតំណាងឲ្យចុងចោទបានបដិសេធនិងច្រានចោលការចោទនេះទាំងស្រុង។
លោកមេធាវី ពិន វណ្ណៈ បានថ្លែងថា
ការបំភ្លឺរបស់លោក ហេង ឈាង
ហើយដែលត្រូវគេដកស្រង់យកមកចុះផ្សាយដោយកាសែតទាំង ៣
នោះមិនអាចចាត់ទុកជា «ការបរិហារកេរ្តិ៍ជាសាធារណៈ» ទេ។ ប៉ុន្តែ
គឺជាការបំភ្លឺឆ្លើយតបទៅនឹងប្រសាសន៍របស់លោកឧកញ៉ា កុក អាន
ដែលផ្តល់សម្ភាសន៍ដល់អ្នកយកព័ត៌មាន (មុនកូនក្តីលោកបំភ្លឺ)
ហើយដែលត្រូវបានចុះផ្សាយក្នុងកាសែតកម្ពុជាថ្មី កាលពីថ្ងៃ ទី៧
ធ្នូ ឆ្នាំ២០១២ ដែលថា
«អ្វីទាំងអស់ដែលពាក់ព័ន្ធនឹងការបាត់បង់ប្រាក់យ៉ាងសន្ធឹក
សន្ធាប់ពីក្រុមហ៊ុន អានកូ ត្រូវ បានបើកកកាយអស់ហើយ
ហើយក្នុងនាមលោកជាជនរងគ្រោះ
ត្រូវតែមកចូលរួមដោយក្តីក្លាហានដើម្បីការពារប្រយោជន៍ក្រុមហ៊ុន
ផង និងការពារសច្ចភាពផង»។
លោកឧកញ៉ាបញ្ជាក់ថា៖ «លោកស្រឡាញ់ ហេង ឈាង
និងប្រពន្ធគាត់ដូចជាកូន ព្រមទាំងបានប្រគល់ភារកិច្ចធំឲ្យគេធ្វើ
ប៉ុន្តែនៅពេលមានវិបត្តិធ្ងន់ធ្ងរយ៉ាងនេះក្នុងក្រុមហ៊ុន
លោកមិនអាចទទួលយកបានឡើយ»។
លោក ពិន វណ្ណៈ បន្ថែមថា
រឿងក្តីនេះអ្នកស្រី ទេព កុលាប មិនពាក់ព័ន្ធទេ។
ក្នុងការសន្និដ្ឋានរបស់មេធាវីរូបនេះ
លោកសំណូមពរឲ្យលោកចៅក្រមជំនុំជម្រះលើកការចោទប្រកាន់ចំពោះកូន
ក្តីលោកទាំង ២ នាក់ប្តីប្រពន្ធ។
លោកមេធាវី អ៊ីវ ប៉ូលី
មេធាវីការពារក្តីឲ្យប្តីប្រពន្ធលោក ហេង ឈាង បានថ្លែងដែរថា
រឿងនេះវាពាក់ព័ន្ធទៅនឹងការចោទប្រកាន់របស់លោក កុក អាន ដែលថា
កូនក្តីលោកបានលួចប្រាក់ពីក្រុមហ៊ុនគាត់
ហើយការអះអាងពីចំនួនប្រាក់ដែលបាត់បង់មានការប្រែប្រួលមិនប្រាកដ
គឺចាប់ពីចំនួន ៧ លានរហូតទៅដល់ជាង ៣០ លាន និងឡើងដល់ជាង ៥៨
លានដុល្លារអាមេរិកក៏ប៉ុន្តែរហូតមកទល់នឹងពេលនេះ
ខាងតុលាការមិនទាន់រកឃើញប្រាក់ដែលបានបាត់ដូចការអះអាងរបស់លោក
ឧកញ៉ា កុក អាន ទេ។
លោកមេធាវី អ៊ីវ ប៉ូលី បានបន្តថា៖
«ការដែលលោកឧកញ៉ា កុក អាន បានចោទប្រកាន់លោក ហេង ឈាង ថា
បានលួចលុយពីក្រុមហ៊ុននោះមកដល់ពេលនេះតុលាការរកមិនឃើញលុយដែល
បាត់នោះទេ ដែលធ្វើឲ្យប៉ះពាល់យ៉ាងធ្ងន់ធ្ងរ ដល់កេរ្តិ៍ឈ្មោះ
និងកិត្តិយសរបស់លោក ហេង ឈាង»។
លោកមេធាវី ប៉ូលី បន្ថែមថា៖
«លិខិតបំភ្លឺរបស់លោក ហេង ឈាង ដែលបានចុះផ្សាយនោះ
គឺជាការឆ្លើយបំភ្លឺតបទៅនឹងការចោទប្រកាន់របស់ឧកញ៉ា កុក អាន
និងជាស្វ័យការពារខ្លួនលោកផង។
វាមិនមែនជាការបរិហារកេរ្តិ៍លោកឧកញ៉ានោះទេ។ រឿងនេះ
គ្មានភ័ស្តុតាងគ្រប់គ្រាន់ និងលើសពីវិមតិសង្ស័យទៅទៀត។ ហេតុនេះ
ខ្ញុំសូមសំណូមពរឲ្យលោកចៅក្រមលើកការចោទប្រកាន់ចំពោះកូនក្តី
ខ្ញុំ ទាំង ២ នាក់ប្តីប្រពន្ធ»។
ទោះយ៉ាងណាតំណាងអយ្យការ លោកស្រី ស៊ឺ វណ្ណនី
បានសន្និដ្ឋានដោយបាន «សំណូមពរឲ្យលោកចៅក្រមជំនុំជម្រះ
ធ្វើការវិនិច្ឆ័យរឿងក្តីនេះទៅតាមច្បាប់»។
បន្ទាប់ពីបញ្ចប់ការសាកសួរមេធាវីតំណាង
ភាគីទាំង ២ យ៉ាងតានតឹងអស់ពេលជិត ២ ម៉ោងរួចមក
លោកប្រធានចៅក្រមជំនុំជម្រះ កែវ មុនី
ក៏បានសម្រេចលើកការប្រកាសសាលក្រមនៃសំណុំរឿងនេះ ទៅធ្វើនៅថ្ងៃ
ទី១៩ ខែកញ្ញា ២០១៤ ខាងមុខនេះ។
គួរបញ្ជាក់ថា
ពាក់ព័ន្ធនឹងបណ្តឹងព្រហ្មទណ្ឌរបស់លោកឧកញ៉ា កុក អាន លោក ហេង ឈាង
ត្រូវសាលាឧទ្ធរណ៍កាលពីថ្ងៃ ទី២៨ ខែឧសភា ឆ្នាំ២០១៤
ផ្តន្ទាទោសដាក់ពន្ធនាគារ ៣ឆ្នាំ
និងបង្គាប់ឲ្យសងសំណងរដ្ឋប្បវេណីជាង ២៣
លានដុល្លារនិងសងជំងឺចិត្តដល់ដើមបណ្ដឹងរដ្ឋប្បវេណីចំនួន ២៥
ម៉ឺនដុល្លារអាមេរិកទៅលោកឧកញ៉ា កុក អាន ក្រោមការចោទប្រកាន់ពីបទ
«រំលោភលើទំនុកចិត្តថ្នាក់អភិបាលពិសេស»។ ប៉ុន្តែលោក ហេង ឈាង
បានជំទាស់នឹងការសម្រេចនេះហើយបានប្តឹងសារទុក្ខទៅតុលាការកំពូល។
ថ្មីៗនេះលោក ហេង ឈាង
ត្រូវបានរួចទោសនិងត្រូវបានដោះលែងពីពន្ធនាគារបន្ទាប់ពីបានជាប់
ឃុំអស់ពេល ៣ឆ្នាំ នៅគុក ព្រៃស
ប៉ុន្តែសំណុំរឿងនេះមិនទាន់បញ្ចប់នៅឡើយ៕
ប្រភពពី ភ្នំពេញប៉ុស្តិ៍
